សហជីពកម្មករសុំឲ្យអាជ្ញាធរផ្សព្វផ្សាយពីវិធីការពារជំងឺផ្ដាសាយថ្មី

ដោយ មុំ សុផុន

2009-10-24

ប្រធានសហជីពសេរីកម្មករបានផ្ញើលិខិតមួយទៅក្រសួងការងារនិងបណ្តុះបណ្តាលវិជ្ជាជីវៈ ដើម្បីសុំឲ្យចាត់វិធានការផ្សព្វផ្សាយអំពីវិធីការពារទប់ស្កាត់ជំងឺផ្តាសាយប្រភេទថ្មីដែលបង្កឡើងដោយមេរោគ A(H1N1) ទៅដល់និយោជក កម្មករ និងយោជិត នៅតាមបណ្តារោងចក្រនិងសហគ្រាសនានានោះ។

AFP/TANG CHHIN SOTHY

អ្នកដំណើរពាក់ម៉ាសមុខ ខណៈដើរកាត់ផ្សារមួយ នៅក្នុងរាជធានីភ្នំពេញ កាលពីថ្ងៃ៦ តុលា ២០០៩។

នៅក្នុងលិខិតរបស់លោក ជា មុនី ប្រធានសហជីពសេរីកម្មករនោះ បានសសេរថា ដោយការឆ្លងនៃជំងឺ A(H1N1) ពីមនុស្សម្នាក់ទៅមនុស្សម្នាក់ទៀតតាមផ្លូវដង្ហើមនោះ ធ្វើឲ្យមានការព្រួយបារម្ភទៅដល់កម្មករ កម្មការិនីរាប់ម៉ឺននាក់ ដែលកំពុងបម្រើការងារនៅតាមរោងចក្រ សហគ្រាស អាចនឹងទទួលរងនូវការឆ្លងយ៉ាងលឿន ប្រសិនបើមានកម្មករណាម្នាក់បានឆ្លងមេរោគ A(H1N1) ហើយដោយពុំមានវិធានការការពារតាមក្បួនខ្នាតត្រឹមត្រូវ។

ជំងឺគ្រុនផ្តាសាយប្រភេទថ្មី A(H1N1) បានរីករាលដាលមកដល់កម្ពុជា ដែលមកដល់ថ្ងៃទី២០ ខែតុលា ឆ្នាំ២០០៩ អ្នកកើតជំងឺគ្រុនផ្តាសាយ A(H1N1) សរុបចំនួនជាង២០០ករណីហើយ ដែលក្នុងនោះមានមនុស្សចំនួន៣នាក់ស្លាប់ដោយសារតែជំងឺនេះ។

កាលពីពេលថ្មីៗកន្លងមកនេះ ក្រសួងសុខាភិបាលនៃប្រទេសកម្ពុជាបានប្រកាសថា នឹងមានយុទ្ធនាការចែកខិត្តប័ណ្ណជាច្រើនម៉ឺនសន្លឹកអំពីវិធីការពារការរីករាលដាលនៃជំងឺផ្តាសាយប្រភេទថ្មីដែលបង្កឡើងដោយមេរោគ A(H1N1) ដល់ប្រជាពលរដ្ឋក្នុងអំឡុងបុណ្យអុំទូក បណ្តែតប្រទីប សំពះព្រះខែនិងអកអំបុក នាពេលខាងមុខនេះ៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។