តំណាងប្រជាពលរដ្ឋភូមិ៣បឹងកក់ សង្កាត់ស្រះចក ខណ្ឌដូនពេញ បានឲ្យដឹងនៅថ្ងៃ៧ កុម្ភៈថា សាលារាជធានីភ្នំពេញ មិនទាន់ចាត់ការលើពាក្យបណ្តឹងរបស់ពួកគេនៅឡើយទេរហូតមកទល់ពេលនេះ ដែលអ្នកភូមិបានដាក់ពាក្យប្តឹងទៅលោកអភិបាលរាជធានីភ្នំពេញ កែប ជុតិមា ដើម្បីស្នើសុំឲ្យជួយរៀបចំប្រព័ន្ធលូបង្ហូរទឹកស្អុយដូចដើមវិញ ព្រោះក្រុមហ៊ុនស៊ូកាគូ បានបូមខ្សាច់ចាក់បឹងកក់លុបប្រព័ន្ធលូបង្ហូរទឹកចាស់នោះ។
អ្នកស្រី តាំង ភួង ជាតំណាងប្រជាពលរដ្ឋនៅភូមិ៣ បានមានប្រសាសន៍ថា ទឹកលូស្អុយនៅតែបន្តលិចផ្ទះរបស់ប្រជាពលរដ្ឋ ធ្វើឲ្យពួកគេពិបាករស់នៅ ក្មេងៗឈឺកាន់តែច្រើន បើទោះបីជាខាងសាលាខណ្ឌបានយកម៉ាស៊ីនបូមទឹកលូនោះចេញក្តី ព្រោះម៉ាស៊ីនមានកម្លាំង៤សេស មិនអាចបូមទាន់នឹងកម្លាំងទឹកលូហូរចូលច្រើននោះឡើយ។
អ្នកស្រី តាំង ភួង បានឲ្យដឹងដូច្នេះ ៖ «អត់មានទំនាក់ទំនងអីជាមួយយើងផង គ្រាន់តែឃើញសាលាខណ្ឌគេចុះមកអត់និយាយអីមួយម៉ាត់គេក៏ទៅវិញ ទៅហើយក៏បានម៉ាស៊ីនតូចមួយយកមកបូមមក។ មិនអស់ទេម៉ាស៊ីនតូចមួយ ប៉ុន្មានថ្ងៃហើយបូមមិនទាន់ស្រកផង»។
ប្រជាពលរដ្ឋភូមិ៣បឹងកក់ បានដាក់ពាក្យបណ្តឹងទៅសាលារាជធានីភ្នំពេញ កាលពីថ្ងៃទី២ កុម្ភៈ កន្លងទៅនេះ នៅខណៈដែលពួកគេបានឡើងទៅតវ៉ានៅមុខសាលារាជធានីភ្នំពេញ។ អ្នកស្រី តាំង ភួង បានទទូចសុំទៅលោកអភិបាលរាជធានីឲ្យជួយដោះស្រាយជូនពួកគេអំពីករណីនេះផង។
ប្រភពផ្សេងទៀតបានបញ្ជាក់ថា ការបង្ហូរទឹកស្អុយចូលលំនៅរបស់អ្នកភូមិ ធ្វើឡើងនៅក្នុងគំនាបបង្ខំឲ្យអ្នកស្រុករើទីលំនៅចេញពីទីនោះផងដែរ។
ក្រុមហ៊ុនស៊ូកាគូ បានទទួលសិទ្ធិវិនិយោគតំបន់បឹងកក់ ដែលមានផ្ទៃដីចំនួន១៣៣ហិកតាពីរដ្ឋាភិបាលចំនួន៩៩ឆ្នាំក្នុងឆ្នាំ២០០៧ ហើយប៉ះពាល់ដល់ប្រជាពលរដ្ឋជាង៤ពាន់គ្រួសារ ក្នុងនោះកន្លងមកមានប្រជាពលរដ្ឋជាង១ពាន់គ្រួសារត្រូវបានបណ្តេញចេញ៕