ស្ថានភាពយោធានៅតំបន់ជាំតែចម្ងាយប្រមាណ១៥គីឡូម៉ែត្រភាគខាងត្បូងឈៀងខាងកើតពីប្រាសាទព្រះវិហារ បន្ទាប់ពីមានការប៉ះទង្គិចគ្នារវាងកងទាហានខ្មែរ-ថៃកាលពីព្រឹកថ្ងៃអាទិត្យ ទី២៤ មករាមក មានសេចក្តីរាយការណ៍ថា ការប្រឈមមុខដាក់គ្នានៅតំបន់នោះបានវិលទៅរកសភាពស្ងប់ស្ងាត់ធម្មតាវិញហើយ។
មេបញ្ជការកងយោធពលខេមរភូមិន្ទប្រចាំកងពលធំអន្តរាគមន៍លេខ៣ ដែលកំពុងគ្រប់គ្រងយោធាខ្មែរនៅជុំវិញប្រាសាទព្រះវិហារ លោកឧត្តមសេនីយ៍ទោ ស្រី ឌឹក បានមានប្រសាសន៍កាលពីព្រឹកថ្ងៃច័ន្ទ ទី២៥ ខែមករាថា កាលពីរសៀលថ្ងៃអាទិត្យ បន្ទាប់ពីមានការប៉ះទង្គិចគ្នារួចមក មេបញ្ជាការថ្នាក់កងពលនៃយោធាខ្មែរ-ថៃ បានធ្វើដំណើរទៅជួបប្រជុំគ្នានៅតំបន់ជាំតែនោះ ដោយបានជជែកដើម្បីបញ្ចៀសចេញកុំឲ្យទាហានទាំងសងខាងមានការប៉ះទង្គិចគ្នាជាថ្មី។ ការជជែកនៃមេបញ្ជាការយោធាខ្មែរ-ថៃ គឺមានលក្ខខណ្ឌមួយចំនួនដែលបានព្រមព្រៀងគ្នាទាំងសងខាង។
លោកឧត្ដមសេនីយ៍ទោ ស្រី ឌឹក បានឲ្យដឹងដូច្នេះ ៖ «ក្រោយការជួបគ្នាទៅវាធម្មតាជាមួយថៃហ្នឹង យើងសុំឲ្យថយទៅក្រោយវិញ... ហើយឈប់ឲ្យគាត់កាន់ GPS ហ្នឹងដើរទៀត ហើយយើងវាឲ្យថយបន្តិចមកដែរ។ និយាយរួមយើងថយយ៉ាងម៉េចក៏ដោយវាស្ថិតនៅក្នុងដីរបស់យើងទេ កន្លែងយើងឈរជើង។ យើងឯកភាពគ្នា គាត់(ថៃ)នៅខាងក្រោម យើងនៅដីយើង ប៉ុន្តែគ្រាន់តែយើងនិយាយជាមួយគាត់ថា ឯកភាពរក្សាស្ថានភាពនឹងន៎ នៅកន្លែងណាសូមឲ្យនៅកន្លែងហ្នុង ហើយសូមឲ្យបង្កើតកន្លែងថ្មី គោរពការល្បាត។ បើចង់ល្បាត ចង់រុកហ្នឹងប្រាប់មកខាងនេះ(ខ្មែរ)ផង យើងរួមដំណើរជាមួយចៀសវាងការប៉ះទង្គិច»។
ប្រភពពីមន្ត្រីយោធានៃតំបន់ប្រតិបត្តិការសឹកខេត្តព្រះវិហារសុំមិនបញ្ចេញឈ្មោះដែលកំពុងប្រចាំការពារព្រំដែនខ្មែរនៅតំបន់ជាំតែនោះ បានឲ្យដឹងថា កាលពីព្រឹកថ្ងៃច័ន្ទ ស្ថានភាពប្រឈមុខដាក់គ្នា ដោយទាហានខ្មែរ-ថៃ បានវិលទៅរកការស្ងប់ស្ងាត់ ដោយទាហានទាំងសងខាងអាចចេញចូលរកគ្នា។ អ្វីដែលប្លែកគឺទាហានថៃបានបើកចំហឲ្យទាហានខ្មែរអាចចូលទៅលេងក្នុងបន្ទាយយោធារបស់ខ្លួនបាន ដែលទង្វើបែបនេះពុំធ្លាប់មានពីមុនមកទាល់តែសោះនោះ។
មន្ត្រីយោធាខ្មែរបានអះអាងថា ការប៉ះទង្គិចគ្នានោះ គឺនៅពេលដែលទាហានថៃបានជម្រុលចូលមកក្នុងព្រំដែនខ្មែរជម្រៅ៣០០ម៉ែត្រនិងពួនស្ទាក់វាយប្រហារទាហានខ្មែរមុនផង។ មន្ត្រីយោធាខ្មែរ បានអះអាងថា ទាហានខ្មែរមិនបានរងរបួសនិងស្លាប់ក្នុងការប៉ះទង្គិចនោះទេ។
ព័ត៌មានចេញពីកងទ័ពខ្មែរដែលនិយាយតៗគ្នាក្រៅផ្លូវការថា ទាហានថៃបានស្លាប់ចំនួន៣នាក់ ប៉ុន្តែកាសែតរបស់ប្រទេសថៃបានអះអាងកាលពីព្រឹកថ្ងៃច័ន្ទ ២៥ មករាថា ទាហានថៃ២នាក់បានរងរបួសប៉ុណ្ណោះ មិនបានអះអាងថា មានស្លាប់នោះទេ៕