មន្ត្រីជាន់ខ្ពស់ផ្នែកស៊ើបអង្កេតរបស់សមាគមការពារសិទ្ធិមនុស្សអាដហុក លោក ចាន់ សុវ៉េត បានមានប្រសាសន៍កាលពីរសៀលថ្ងៃពុធ ទី៩ ខែធ្នូ ថា លោកបានធ្វើដំណើរទៅខេត្តឧត្តរមានជ័យ កាលពី២ថ្ងៃមុន ជួបមន្ត្រីនគរបាលនិងអភិបាលរងខេត្តនោះ ដោយបានស្នើសុំឲ្យអាជ្ញាធរខេត្តបែងចែកដីធ្លីមួយចំនួនទៅឲ្យក្រុមប្រជាពលរដ្ឋមួយចំនួននៅអូរបាត់មាន់ ដែលពីមុនបានជំទាស់មិនព្រមទទួលយកដីថ្មី ប៉ុន្តែបន្ទាប់ពីតវ៉ាមួយរយៈពួកគេបានសុខចិត្តទទួលយកវិញនោះ។
លោក ចាន់ សុវ៉េត មានប្រសាសន៍ដូច្នេះ ៖ «ចំណុចសំខាន់ទី១ គឺស្នើសុំឲ្យខាងអាជ្ញាធរហ្នឹងទទួលយកនូវអ្នកដែលនៅសេសសល់ប្រមាណជា១០គ្រួសារជាងហ្នឹងឲ្យអាចបានទទួលយកនូវដីធ្លីហ្នឹងផងដែរ។ មួយទៀតនោះស្នើសុំបញ្ឈប់តាមចាប់ខ្លួនអីៗផ្សេងៗហ្នឹង គឺកុំឲ្យមានការចាប់ខ្លួនបន្តទៀត។ យើងសំណូមពរថា ឲ្យខេត្តហ្នឹងបញ្ចប់ទៅរឿងបញ្ហាជាមួយប្រជាពលរដ្ឋហ្នឹង»។
តំណាងអ្នកភូមិអូរបាត់មាន់មួយរូបដែលសុំមិនបញ្ចេញឈ្មោះបានមានប្រសាសន៍ថា ពួកគេបានសុខចិត្តទទួលយកដីធ្លីដោះដូរថ្មីដែលអាជ្ញាធរខេត្តចែកឲ្យ គឺដីភូមិទំហំ ៣០ម x ៥០ម និងដីស្រែមួយហិកតាសម្រាប់មួយគ្រួសារនោះហើយ បន្ទាប់ពីពួកគេបានលើកគ្នាទៅតវ៉ានៅរាជធានីភ្នំពេញ ជាច្រើនថ្ងៃ ប៉ុន្តែពុំមានមន្ត្រីណាជួយដោះស្រាយទាល់តែសោះនោះ។
តំណាងអ្នកភូមិសុំមិនបញ្ចេញឈ្មោះឲ្យដឹងដូច្នេះ ៖ «ប្រជាជនគេសុខចិត្តទទួលយកហើយ ព្រោះទោះបីជាមិនទទួលយកក៏មិនដឹងមានអីពឹងដែរ ការដោះស្រាយចេះតែយឺតយ៉ាវពេក»។
ទោះយ៉ាងណាមិនអាចទំនាក់ទំនងសុំការបំភ្លឺបញ្ហានេះជាមួយលោក វ៉ា ប៉ារ៉ានីន ជាអគ្គលេខាធិការសាលាខេត្តឧត្តរមានជ័យ ទទួលបន្ទុកដោះស្រាយបញ្ហានោះបានទេ។ ប៉ុន្តែលោក ឈឹម ស៊ីវុធ ជំនួយការអភិបាលខេត្តឧត្តរមានជ័យ បានមានប្រសាសន៍ថា តាមលោកបានជួបមន្ត្រីដោះស្រាយបញ្ហានៅទីនោះបានប្រាប់លោកថា អាជ្ញាធរបានដោះស្រាយរួចរាល់ហើយសម្រាប់ប្រជាពលរដ្ឋដែលបានបណ្តេញចេញពីតំបន់អូរបាត់មាន់នោះ។
លោក ឈឹម ស៊ីវុធ មានប្រសាសន៍ដូច្នេះ ៖ «លោក ប៉ារ៉ានីន ក៏ឆ្លើយប្រាប់ខ្ញុំថា គាត់រៀបចំអស់ហើយអត់មានអ្វីនៅសេសសល់ទៀតទេ»។
លោក ឈឹម ស៊ីវុធ បានមានប្រសាសន៍ទៀតថា ចំពោះការស្នើសុំឲ្យមានការដោះលែងនិងបញ្ឈប់ការតាមចាប់ខ្លួនប្រជាពលរដ្ឋនោះ មិនមែនជាសមត្ថកិច្ចរបស់ខេត្តទេ គឺជាបន្ទុករបស់តុលាការនិងបណ្តឹងរបស់មន្ត្រីរដ្ឋបាលព្រៃឈើ។
មន្ត្រីខេត្តឧត្តរមានជ័យ បានឲ្យដឹងថា គេបានរកឃើញប្រជាពលរដ្ឋតែជាង៣០គ្រួសារប៉ុណ្ណោះដែលត្រូវបែងចែកដីថ្មី ប៉ុន្តែអង្គការសិទ្ធិមនុស្សបានរកឃើញថា មានអ្នកភូមិលើសទៅជាង៧០គ្រួសារក្រោយពីការបណ្តេញចេញដើម្បីយកដីទៅឲ្យក្រុមហ៊ុនAngkor Sugar។
អង្គការសិទ្ធិមនុស្សក្រៅរដ្ឋាភិបាលបានឲ្យដឹងថា ចាប់តាំងពីអាជ្ញាធរបានបណ្តេញអ្នកភូមិអូរបាត់មាន់ឲ្យចាកចេញពីលំនៅកាលពីខែកញ្ញា រហូតមកដល់ពេលនេះ គឺមានអ្នកភូមិចំនួន៤នាក់ហើយដែលបានចាប់ខ្លួន៕