យោងតាមសេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំកម្ពុជា ចេញផ្សាយថ្ងៃ១២ ខែមីនា ឆ្នាំ២០១០ គម្រោងនេះគឺដើម្បីធ្វើឲ្យកាន់តែប្រសើរឡើងនូវគុណភាពនិងប្រយោជន៍នៃការអប់រំជាមូលដ្ឋាន និងបង្កើនលទ្ធភាពចូលរៀនសម្រាប់កុមារទាំងអស់ ជាពិសេស ក្រុមកុមារដែលស្ថិតក្នុងគ្រួសារខ្វះលទ្ធភាព ដូចជាក្រុមជនជាតិភាគតិច កុមារីនិងអ្នកក្រីក្រខ្លាំងជាដើម។
ក្នុងពិធីសម្ពោធគម្រោងកាលពីរាត្រីថ្ងៃព្រហស្បតិ៍ ទី១១ ខែមីនា នៅនិវេសនដ្ឋានរបស់ឯកអគ្គរដ្ឋទូតសហរដ្ឋអាមេរិកនៅកម្ពុជា គឺលោកស្រី ខារ៉ល រ៉តលី (Carol A. Rodly) រួមនឹងលោក អ៊ឹម សុទ្ធី រដ្ឋមន្ត្រីក្រសួងអប់រំយុវជននិងកីឡា បានថ្លែងសរសើរពីសក្តានុពលរបស់គម្រោងថ្មីនេះ។
ឯកអគ្គរដ្ឋទូតអាមេរិក លោកស្រី ខារ៉ល រ៉តលី មានប្រសាសន៍ថា ៖ "គម្រោងនេះនឹងផ្តល់ដល់សិស្សានុសិស្សកម្ពុជានូវឱកាសដែលពួកគេត្រូវការដើម្បីសម្រេចសក្តានុពលពេញលេញរបស់ពួកគេ ហើយសហរដ្ឋអាមេរិកសង្ឃឹមថា នឹងធ្វើការងារជាមួយដៃគូអប់រំទាំងអស់ក្នុងរយៈពេល៥ឆ្នាំខាងមុខ"។
ព័ត៌មានបន្តថា គម្រោងនេះនឹងអាចជួយសិស្សានុសិស្សចំនួន១២ម៉ឺននាក់នៅថ្នាក់បឋមសិក្សា និង មធ្យមសិក្សាបឋមភូមិ នៅខេត្តកំពង់ចាម ក្រចេះ និងខេត្តសៀមរាប ហើយអង្គការអប់រំពិភពលោកជាអ្នកអនុវត្តនិងសហការជាមួយក្រសួងអប់រំ៕