លោក ចេហ្វ ដៃហ្គល (Jeff Daigle) មន្ត្រីទទួលបន្ទុកកិច្ចការសាធារណៈនៃស្ថានទូតសហរដ្ឋអាមេរិកនៅភ្នំពេញ បានថ្លែងប្រាប់វិទ្យុអាស៊ីសេរីថា គេមានក្តីបារម្ភណាស់ដោយសារតែការចាប់ខ្លួន លោក ដាំ សិទិ្ធ នោះ បានធ្វើឡើង នៅពេលដែលមានដំណើរការបោះឆ្នោតជាតិ នាពេលខាងមុខនេះ ។
លោក ចេហ្វ ដៃហ្គល ថ្លែងដូច្នេះថា ៖ «យើងមានការព្រួយបារម្ភចំពោះការចាប់ខ្លួននេះ ហើយយើងកំពុងបន្តតាមដានចំពោះបញ្ហានេះដែរ ពីព្រោះថា ការចាប់ខ្លួននេះអាចធ្វើឲ្យប៉ះពាល់ដល់សេរីភាពសារព័ត៌មាននិងការផ្សាយព័ត៌មាននៅមុនការបោះឆ្នោតនៅកម្ពុជា» ។
លោក ដាំ សិទ្ធិ ចាងហ្វាងការផ្សាយរបស់កាសែតមនសិការខ្មែរ និងជាបេក្ខជនតំណាងរាស្ត្ររបស់គណបក្សសមរង្ស៊ីប្រចាំក្រុងភ្នំពេញ ត្រូវបានចាប់ខ្លួនកាលពីថ្ងៃអាទិត្យ ទី៨ មិថុនា កន្លងទៅនេះ ពីបទចោទប្រកាន់រឿងផ្សាយព័ត៌មានមិនពិតតាមបណ្តឹងរបស់លោក ហោ ណាំហុង ឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេស ។
ចប្ចុប្បន្ននេះ លោក ដាំ សិទិ្ធ កំពុងត្រូវបានឃុំខ្លួន នៅពន្ធនាគារព្រៃស ។
នេះអាចជាលើកដំបូងហើយរបស់មន្រ្តីទូតបរទេសទាក់ទងនឹងការចាប់ខ្លួនលោក ដាំ សិទិ្ធ ដែលជាអ្នកកាសែតនិងមន្រ្តីជាន់ខ្ពស់គណបក្សប្រឆាំងរូបនេះ ប៉ុន្តែទោះជាយ៉ាងណាក៏ដោយ មន្ត្រីស្ថានទូតសហរដ្ឋអាមេរិក មិនបានបញ្ជាក់ថា ការចាប់ខ្លួននោះនឹងអាចមានផលប៉ះពាល់ដល់ដំណើរការនៃការបោះឆ្នោត នាខែកក្កដាខាងមុខនេះឬយ៉ាងណានោះទេ ។
ការចាប់ខ្លួនលោក ដាំ សិទិ្ធ នេះ បានរងការចោទប្រកាន់ពីមជ្ឈដ្ឋាននានាជាច្រើន ទាំងសហគមន៍ជាតិនិងអន្តរជាតិ ថា ជាការខុសច្បាប់ និងមានចរិតនយោបាយដែលអាចនឹងធ្វើឲ្យមានការប៉ះពាល់ដល់ដំណើរការបោះឆ្នោត សេរីភាពនៃសារព័ត៌មាន និងដំណើរការប្រជាធិបតេយ្យខ្មែរ ហើយបានអំពាវនាវឲ្យរដ្ឋាភិបាលយកចិត្តទុកដាក់ដោះស្រាយបញ្ហានេះ ។
លោក ខៀវ កាញារីទ្ធ អ្នកនាំពាក្យរដ្ឋាភិបាលនិងជារដមន្រ្តីសារព័ត៌មាន បានមានប្រសាសន៍តបនឹងប្រតិកម្មនោះថា វាជារឿងរ៉ាវរបស់តុលាការ តែទោះជាយ៉ាងណាក៏ដោយ ក្រសួងរបស់លោកបានសុំឲ្យតុលាការដោះលែងលោក ដាំ សិទិ្ធ ឲ្យនៅក្រៅឃុំជាបណ្ដោះអាសន្ន ប៉ុន្តែរហូតមកទល់ពេលនេះ គេនៅមិនទាន់ឃើញមានការឆ្លើយតបពីតុលាការនៅឡើយទេ ៕