ក្រុមសកម្មជនការពារសិទ្ធិជនផ្ទុកមេរោគអេដស៍នៅសហរដ្ឋអាមេរិកបានថ្លែងថា គោលការណ៍ថ្មីនេះគឺជាជំហានដ៏សំខាន់មួយសម្រាប់ប្រទេសនេះ និងជាការចាប់ផ្តើមជីវិតថ្មីសម្រាប់គ្រួសារច្រើនរាប់មិនអស់ដែលត្រូវបានកាត់ផ្តាច់ទំនាក់ទំនងពីគ្នា ដោយសារតែបញ្ហារឹតបន្តឹងក្នុងការផ្តល់ទិដ្ឋាការក្នុងរយៈពេលកន្លងទៅនេះ។
ចាប់ពីឆ្នាំ១៩៨៧មក ជនដែលមានផ្ទុកមេរោគអេដស៍មិនត្រូវបានផ្តល់ទិដ្ឋាការឲ្យចូលសហរដ្ឋអាមេរិកឡើយ បន្ទាប់ពីសភាអាមេរិកបានណែនាំឲ្យក្រសួងសុខាភិបាលដាក់បញ្ចូលមេរោគអេដស៍ទៅក្នុងបញ្ជីជំងឺឆ្លងដ៏គ្រោះថ្នាក់មួយមក។
សហរដ្ឋអាមេរិកគឺជាប្រទេសមួយក្នុងចំណោមប្រទេសចំនួន១៣ ដែលមានការរឹតត្បិតក្នុងការផ្តល់ទិដ្ឋាការដល់ជនដែលមានផ្ទុកមេរោគអេដស៍។
ប្រភពព័ត៌មាន CNN បានរាយការណ៍ថា យោងតាមគោលការណ៍ថ្មីនេះ ជនដែលមានផ្ទុកមេរោគអេដស៍នឹងទទួលបានទិដ្ឋាការចូលសហរដ្ឋអាមេរិកក្នុងរយៈពេល៣០ថ្ងៃ ចាប់ពីថ្ងៃទី៤ ខែមករា នេះតទៅ។ ប៉ុន្តែក្នុងទិដ្ឋាការនោះ នឹងមិនមានបង្ហាញជាសាធារណៈថា អ្នកធ្វើដំណើរជាជនផ្ទុកមេរោគអេដស៍នោះឡើយ៕