ទាហានជើងទឹកអាមេរិកមកហ្វឹកហាត់ដល់ទាហានជើងទឹកខ្មែរ
ដោយ មុំ សុផុន
2009-07-22
កងនាវិកនៃនាវា USS Safeguard របស់កងនាវាចរណ៍សហរដ្ឋអាមេរិក ដែលមាននិវេសដ្ឋាននៅកោះហាវ៉ៃសហរដ្ឋអាមេរិកចំនួន១៦នាក់ បានមកហ្វឹកហាត់និងដកស្រង់បទពិសោធន៍ហែលទឹកនិងមុជទឹកដល់កងទាហានជើងទឹកនៃកងយោធពលខេមរភូមិន្ទនៅទីបញ្ជាការកងទ័ពជើងទឹកឆ្នេរសមុទ្ររាមក្នុងអំឡុងពេលចូលចតនោះ។
លោកស្រី Carol Rodley ឯកអគ្គរដ្ឋទូតអាមេរិកចុះទស្សនាទាហានជើងទឹកអាមេរិកហ្វឹកហាត់ទាហានជើងទឹកខ្មែរនៅឆ្នេរសមុទ្ររាម ខេត្តព្រះសីហនុ នាថ្ងៃទី២១ កក្កដា ២០០៩។
លោកស្រី Carol Rodley ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានមានប្រសាសន៍នៅពេលដែលចុះទៅទស្សនកិច្ចការហ្វឹកហាត់នៅឯឆ្នេរសមុទ្ររាម នៅថ្ងៃទី២១ ខែកក្កដានេះថា ការចុះជួយហ្វឹកហាត់នេះ គឺជាការបង្កើននូវកិច្ចសហប្រតិបត្តិការរវាងកងទ័ពកម្ពុជានិងសហរដ្ឋអាមេរិក។
លោកស្រី Carol Rodley ថ្លែងយ៉ាងដូច្នេះ ៖ «ផលប្រយោជន៍គឺមិនបានតែផ្នែកម្ខាងទេ គឺត្រូវទាំងពីរខាង។ នៅពេលដែលកងនាវិកអាមេរិកធ្វើវគ្គបណ្ដុះបណ្ដាលទៅប្រទេសផ្សេងទៀត គឺគេក៏ទទួលបានការបណ្ដុះបណ្ដាលពីប្រទេសនោះផងដែរ។ គេស្វែងយល់ពីបរិស្ថាន ជាទូទៅនៅកន្លែងណាក៏ដោយ ប៉ុន្តែនៅទីនេះគេនឹងស្វែងយល់ពីបរិស្ថាននៅទីនេះ ព្រោះអីអ្នកនៅទីនេះគឺដឹងអំពីបរិស្ថាននៅទីនេះច្រើនជាងអ្នកនៅពីក្រៅ។ ជាការពិតណាស់ គេផ្ដល់ផលប្រយោជន៍ដល់កងនាវិកកម្ពុជា ទន្ទឹមនឹងនេះ គេក៏ទទួលបានផលប្រយោជន៍ពីកងនាវិកកម្ពុជាផងដែរ»។
ចំណែកលោកឧត្តមនាវីទោ អ៊ុក សីហា មេបញ្ជាការកងទ័ពជើងទឹកមូលដ្ឋានសមុទ្ររាម បានមានប្រសាសន៍ថា កងទាហានជើងទឹកនៃកងយោធពលខេមរភូមិន្ទចំនួន ២០នាក់ បានចូលរួមហ្វឹកហាត់និងដកស្រង់បទពិសោធន៍ជំនាញហែលទឹកនិងមុជទឹកពីកងទាហានជើងទឹករបស់សហរដ្ឋអាមេរិក។
លោកបានថ្លែងទៀតថា នេះជាលើកទីពីរហើយដែលកងនាវិកនៃនាវា USS Safeguard នេះ បានមកបង្ហាត់បង្រៀនដល់ទាហានជើងទឹកខ្មែរ។
លោកឧត្តមនាវីទោ អ៊ុក សីហា បានថ្លែងទៀតថា ការបង្ហាត់បង្ហាញរបស់ទាហានជើងទឹកអាមេរិកនេះ គឺជាការបង្កើនចំណេះដឹងនិងបទពិសោធន៍ដល់ទាហានជើងទឹកខ្មែរ ៖ «ជារួមឥឡូវនេះ យើងកំពុងតែហ្វឹកហ្វឺនរួមគ្នាអំពីការមុជទឹក។ វាល្អណាស់សម្រាប់កងទ័ពជើងទឹក ព្រោះជារួម យើងបានទទួលចំណេះដឹងបន្ថែមអំពីការហ្វឹកហ្វឺនមុជទឹក។ វាជាបញ្ហាសំខាន់សម្រាប់កងទ័ពជើងទឹក ក្នុងការហ្វឹកហ្វឺននេះ។ ជារួមទៅ កាលណាយើងរៀនសូត្រ យើងទទួលការចេះដឹងហើយ គ្រាន់តែឥឡូវនេះ យើងកំពុងតែឲ្យបងប្អូនជំរុញការស្វែងយល់បន្ថែម ហើយខិតខំយកពេលវេលាសម្រាប់ការហ្វឹកហ្វឺននេះ ដើម្បីបង្កើនសមត្ថភាព»។
លោក Charles Ennes មន្ត្រីទទួលបន្ទុកការងារសង្គ្រោះនិងក្រុមមុជទឹករបស់នាវា USS Safeguard បានមានប្រសាសន៍ឲ្យដឹងថា ក្រុមអ្នកជំនាញរបស់នាវា USS Safeguard គឺបង្ហាត់លើផ្នែកមុជទឹក ការប្រើប្រាស់ឧបករណ៍ ការជួយសង្គ្រោះនៅក្នុងទឹក ការជួសជុលគ្រឿងម៉ាស៊ីន ជាដើម។
សូមបញ្ជាក់ថា នេះជាលើកទីប្រាំហើយដែលនាវាកងទ័ពជើងទឹករបស់សហរដ្ឋអាមេរិកបានមកចូលចតជាផ្លូវការនៅក្នុងកំពង់ផែប្រទេសកម្ពុជា ដែលគ្រាមុនៗមានកម្មវិធីមនុស្សធម៌នានា ដូចជាជំនួយផ្នែកសុខាភិបាល ជួយជួសជុលមន្ទីរពេទ្យនិងសាលារៀនជាដើម៕
អត្ថបទដែលទាក់ទង
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីភ្នាក់ងារព័ត៌មានកម្ពុជានិងវៀតណាមបង្កើនកិច្ចសហប្រតិបត្តិការ
នាយករដ្ឋមន្ត្រីខ្មែរទៅចូលរួមកិច្ចប្រជុំអាស៊ាន-អាមេរិកនៅសិង្ហបុរី
ហោ ណាំហុង នឹងទៅចូលរួមកិច្ចប្រជុំកំពូលនៅអ៊ីតាលី
រដ្ឋាភិបាលកម្ពុជាគ្រោងចរចាជាមួយរុស្ស៊ីស្ដីពីបញ្ហាបំណុល
នាយករដ្ឋមន្ត្រីជប៉ុនប្រកាសជាថ្មីទៀតក្នុងការផ្តល់ជំនួយដល់កម្ពុជា
នាយករដ្ឋមន្ត្រីជប៉ុនបារម្ភពីបញ្ហាទំនាស់រវាងកម្ពុជានិងថៃ
នាយករដ្ឋមន្ត្រីខ្មែរគ្រោងទៅចូលរួមកិច្ចប្រជុំនៅជប៉ុន
កម្ពុជាត្រៀមធ្វើម្ចាស់ផ្ទះសមយុទ្ធយោធាទ្រង់ទ្រាយធំលើកដំបូង
កូរ៉េខាងត្បូងនឹងទទួលយកពលករខ្មែរ៣.៥០០នាក់បន្ថែមទៀត
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.