លោក លូអ៊ីស ស៊ីដឺបាកា (Luis CdeBaca) ប្រធានការិយាល័យប្រយុទ្ធប្រឆាំងការជួញដូរមនុស្សរបស់ក្រសួងការបរទេសសហរដ្ឋអាមេរិកបានមានប្រសាសន៍ទៀតថា ភាគច្រើនជនរងគ្រោះនោះគឺជាស្ត្រីដែលការជំពាក់លុយមេបន ហើយបានក្លាយជាជនរងគ្រោះក្នុងអំពើជួញដូរនោះ។
លោក លូអ៊ីស ស៊ីដឺបាកា មានប្រសាសន៍ដូច្នេះ ៖ «គាត់ក៏បាននិយាយអំពីការបញ្ជូនចេញនូវជន ៣នាក់ ទៅអាមេរិកថ្មីៗនេះ គាត់ថា ការបញ្ជូនចេញជនដែលរំលោភផ្លូវលើភេទកុមារនេះ គឺជាសហប្រតិបត្តិការដ៏ល្អមួយ ប្រសិនបើគ្មានការជួយឧបត្ថម្ភពីរដ្ឋាភិបាលកម្ពុជាទេ ការបញ្ជូនពួកគេទៅវិញនោះ គឺមិនអាចកើតឡើងបានទេ។ ហើយគាត់បានទស្សនកិច្ចនៅម៉ាឡេស៊ី នៅប្រទេសថៃ ក៏បានពិភាក្សាជាមួយមន្រ្តីនៅទីនោះ ហើយក៏បានលើកឡើងអំពីការការពារជនរងគ្រោះ ជាពិសេសជនរងគ្រោះពីកម្ពុជាទៅ»។
លោកបានថ្លែងទៀតថា ជនរងគ្រោះមួយចំនួនពីប្រទេសកម្ពុជាទៅប្រទេសថៃ ឬម៉ាឡេស៊ីនោះ គឺជាទាសករនៅលើទូកនេសាទ។
កាលពីឆ្នាំកន្លងទៅ សហរដ្ឋអាមេរិកបានដាក់ប្រទេសកម្ពុជាក្នុងបញ្ជីលើលំដាប់លេខពីរក្នុងការឃ្លាំមើលពីអំពើជួញដូរមនុស្ស ប៉ុន្តែលោកបញ្ជាក់ទៀតថា ឆ្លងកាត់តាមការប្រជុំនានា ប្រទេសកម្ពុជាបានខិតខំប្រឹងប្រែងក្នុងការទប់ស្កាត់លើករណីនេះ។
លោក លូអ៊ីស ស៊ីដឺបាកា (Luis CdeBaca) បានបញ្ជាក់ថា សហរដ្ឋអាមេរិកនៅមិនទាន់បានចាត់លំដាប់ថ្នាក់ការឃ្លាំមើលការជួញដូរមនុស្សក្នុងឆ្នាំ២០០៩ លើប្រទេសកម្ពុជានេះថាយ៉ាងណានៅឡើយ ដោយសារតែរបាយការណ៍ឃ្លាំមើលនៅមិនទាន់បានចេញនោះ។
មន្ត្រីរដ្ឋាភិបាលនៅល្ងាចថ្ងៃទី២ ខែកញ្ញា នៅមិនទាន់អាចទំនាក់ទំនងដើម្បីសុំការបំភ្លឺលើករណីនេះនៅឡើយទេ។
ចំណែកឯលោកស្រី ពុង ឈីវកេក ប្រធានសមាគមការពារសិទ្ធិមនុស្ស លីកាដូ បានមានប្រសាសន៍ថា បើទោះបីជារដ្ឋាភិបាលបានព្យាយាមទប់ស្កាត់ខ្លាំងក៏ដោយ ក៏ប៉ុន្តែអំពើជួញដូរទាំងនោះនៅតែកើតមាននៅឡើយ។
លោកស្រី ពុង ឈីវកេក ថ្លែងយ៉ាងដូច្នេះ ៖ «ឃើញថា រដ្ឋាភិបាលលោកចាប់អារម្មណ៍ ក៏ប៉ុន្តែនៅតែមានបញ្ហាដោយសារតែមូលហេតុជាច្រើន។ ទី១ ច្បាប់យើង យើងមិនទាន់បានអនុវត្តឲ្យបានត្រឹមត្រូវ ដូច្នេះបើអ្នកដែលជួញដូរមនុស្សហ្នឹងនៅតែអត់ជាប់ទោសអ៊ីចឹង អត់រាងចាលទេ»។
លោកស្រីបានបញ្ជាក់ថា វិធានការដើម្បីទប់ស្កាត់នោះ គឺរដ្ឋាភិបាលត្រូវអនុវត្តច្បាប់ជួញដូរឲ្យបានតឹងរ៉ឹង និងពង្រឹងកិច្ចសហប្រតិបតិ្តការជាមួយប្រទេសជិតខាង និងអន្តរជាតិ ដោយសារតែប្រទេសកម្ពុជាជាប្រទេសងាយរងគ្រោះនោះ។
សូមជម្រាបថា កាលពីថ្ងៃទី៣០ សីហា ក្រសួងមានសមត្ថកិច្ចរបស់ប្រទេសកម្ពុជាបានសហការជាមួយស្ថានទូតសហរដ្ឋអាមេរិកក្នុងការទប់ស្កាត់ការជួញដូរមនុស្ស ដោយចាប់ជនជាតិអាមេរិកចំនួន៣នាក់ បញ្ជូនទៅកាត់ទោសនៅសហរដ្ឋអាមេរិក ដោយសារពួកគេបានរួមភេទជាមួយកុមារនៅកម្ពុជា៕