នៅក្នុងសន្និសីទកាសែត បន្ទាប់ពីបានទទួលជួបប្រាស្រ័យជាមួយមន្ត្រីក្រសួងការបរទេសអាមេរិកនោះមក លោកនាយករដ្ឋមន្ត្រី ហ៊ុន សែន បានឆ្លើយបំភ្លឺសំណួររបស់អ្នកយកព័ត៌មានស្តីពីបញ្ហាសំខាន់ៗមួយចំនួន។
ក្នុងចំណោមបញ្ហាដែលបានលើកយកមកពិភាក្សា លោកនាយករដ្ឋមន្ត្រីខ្មែរ ឲ្យដឹងថា ៖ «ក្រៅពីនោះ យើងក៏បានគិតទៅដល់បញ្ហាដទៃទៀត ដូចជាបញ្ហាខាងមិត្តលើកទឹកចិត្ត ទាក់ទិនជាមួយនឹងការអត់ធ្មត់របស់កម្ពុជា ក្នុងបញ្ហាប្រាសាទព្រះវិហារដែលថៃទន្រ្ទាននេះ។ ហើយចាត់ទុកថា នេះជាការអត់ធ្មត់មួយក្នុងការដោះស្រាយបញ្ហា។ ហើយយើងក៏បានប្រាប់ទៅខាងភាគីអាមេរិក ទាក់ទិនជាមួយនឹងគោលបំណងរបស់កម្ពុជាអំពីបញ្ហាទប់ស្កាត់មិនឲ្យមានការផ្ទុះអាវុធ ក៏ប៉ុន្តែយើងក៏បានប្រាប់អំពីលទ្ធភាពដែរថា យើងនឹងអាចបញ្ជូនបញ្ហានេះ ទៅតុលាការអន្តរជាតិណាមួយ ឬក៏ប្រសិនបើមានជម្លោះប្រដាប់អាវុធកើតឡើង យើងប្រាប់គាត់ ដោយសារគាត់ជាសមាជិកអចិន្រ្តៃយ៍ក្រុមប្រឹក្សាសន្តិសុខ ដូច្នេះយើងត្រូវតែមានភារកិច្ច ថា បើសិនមានការផ្ទុះអាវុធកើតឡើង ដោយការឈ្លានពាន យើងនឹងបញ្ជូនបញ្ហាហ្នឹង ទៅក្រុមប្រឹក្សាសន្តិសុខ»។
ស្តីពីបញ្ហាព្រំដែនជាមួយប្រទេសថៃ ដែលនៅអូសបន្លាយដោយខាងថៃ អះអាងថា កំពុងមានបញ្ហានយោបាយនោះ លោកនាយករដ្ឋមន្ត្រី ហ៊ុន សែន អធិប្បាយពីជំហររបស់កម្ពុជាដូច្នេះ ៖ «រដ្ឋាភិបាលថៃយើងបានដឹងហើយថា សាម៉ាក់ នៅពេលដែលគាត់មិនទាន់មានបញ្ហានោះ គឺយើងនៅអាចនិយាយគ្នាបានជាមួយ សាម៉ាក់ ប៉ុន្តែដោយសារមានវិបត្តិនៅក្នុងប្រទេសថៃ ការចរចាក៏ត្រូវតែមានការផ្អាក។ អ៊ីចឹងទេ ឥឡូវនេះ នៅប្រទេសថៃ មិនទាន់មាននាយករដ្ឋមន្រ្តីផ្លូវការ។ ប៉ុន្តែនាយករដ្ឋមន្រ្តីស្ដីទី អាចធ្វើការងារបាន ក៏ប៉ុន្តែទីចុងបំផុត ឥឡូវ Channel ធ្វើការនៅកន្លែងណា? តែអម្បាញ់មិញ ខ្ញុំបាននិយាយប្រាប់អនុរដ្ឋមន្រ្តីការបរទេសអាមេរិកដែរថា នៅប្រទេសថៃរក Channel និយាយមិនបាន ចុះទ័ពនេះ អ្នកណាបញ្ជាមក? ទ័ពដែលមកប្រាសាទមួយចំនួន ដូចជាប្រាសាទតាក្របី និងប្រាសាទតាមាន់ នរណាបញ្ជាមក? ឬក៏វាជាទ័ពចោរ? បើវាជាទ័ពចោរ គឺត្រូវខាងភាគីថៃ និងភាគីកម្ពុជាសហការគ្នាវ៉ៃតែម្ដង។ អ៊ីចឹងទេដោយសារថា ថៃដូចថារដ្ឋាភិបាល វាពិបាក ប៉ុន្តែហេតុអីបានទ័ពចេះតែមក? នរណាបញ្ជា? បញ្ហាវាស្ថិតនៅកន្លែងហ្នឹង។ ប៉ុន្តែទោះបីមានសភាពការណ៍យ៉ាងណាក៏ដោយ ខ្ញុំបន្តអំពាវនាវឲ្យមានការអត់ធ្មត់ជាបន្តទៀត ហើយរង់ចាំដំណោះស្រាយជាក់លាក់ក្នុងករណីការចរចាត្រូវតែធ្វើឲ្យអស់លទ្ធភាពនៃការចរចាសិន»។
ព័ត៌មានចុងក្រោយបានឲ្យដឹងថា ទាហានថៃឈុតខ្មៅនិងទាហានខ្មែរបានដកថយចម្ងាយ៣០០ម៉ែត្រ ពីប្រាសាទតាក្របី ដែលឋិតនៅខាងកើតប្រាសាទតាមាន់ លើខ្នងភ្នំដងរែក ក្នុងខេត្តឧត្តរមានជ័យ កាលពីថ្ងៃច័ន្ទ៕