សេចក្តីប្រកាសព័ត៌មាននៃស្ថានទូតអាមេរិកនៅរាជធានីភ្នំពេញផ្សព្វផ្សាយនៅថ្ងៃទី២៣ ខែកុម្ភៈ បានឲ្យដឹងថា កម្មវិធីនេះដែលអនុវត្តដោយអង្គការ KHANA នឹងផ្តល់កិច្ចរក្សាគាំពារដល់ពលរដ្ឋដែលផ្ទុកមេរោគអេដស៍និងអ្នកជំងឺអេដស៍ ព្រមទាំងប្រឹងប្រែងទប់ស្កាត់កាត់បន្ថយអត្រាឆ្លងថ្មី ជាពិសេសក្នុងចំណោមក្រុមជនដែលងាយរងគ្រោះ។
នៅក្នុងពិធីសម្ពោធដាក់ឲ្យដំណើរការកម្មវិធីដែលប្រព្រឹត្តទៅនៅក្នុងខេត្តតាកែវនៅថ្ងៃអង្គារនេះ ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោកស្រី ខារ៉ល រ៉តលី (Carol Rodley) បានមានប្រសាសន៍ថា ដោយសហការគ្នាជាមួយនឹងព្រះសង្ឃនៃវត្តអូរព័ទ្ធ ក្នុងខេត្តតាកែវនេះ អង្គការ KHANA នឹងចូលរួមយ៉ាងធំធេងក្នុងការប្រយុទ្ធប្រឆាំងមេរោគនិងជំងឺអេដស៍នៅក្នុងសហគមន៍នានា ទូទាំងប្រទេសកម្ពុជា។
លោកស្រី ខារ៉ល រ៉តលី បានគូសបញ្ជាក់បន្ថែមថា សហរដ្ឋអាមេរិករំពឹងថា នឹងផ្តល់ការឧបត្ថម្ភគាំទ្រជាបន្តទៀតដល់សហគមន៍ទាំងឡាយណាដែលមានការផ្តួចផ្តើមការងារបែបនេះ៕