សំណើរបស់មន្ត្រីអង្គការសិទ្ធិមនុស្ស ធ្វើឡើងមុនពេលរដ្ឋមន្ត្រីក្រសួងការពារជាតិសហរដ្ឋអាមេរិក លោក ឡេអូន ផានិតតា (Leon Panetta) នឹងធ្វើទស្សនកិច្ចលើកដំបូងទៅកាន់ប្រទេសកម្ពុជា នៅថ្ងៃទី១៦ ខែវិច្ឆិកា ដើម្បីពង្រឹងទំនាក់ទំនងផ្នែកយោធារវាងប្រទេសទាំងពីរ។
ប្រធានក្រុមអ្នកស៊ើបអង្កេតនៃអង្គការការពារសិទ្ធិមនុស្ស ហៅកាត់ថា លីកាដូ (Licadho) លោក អំ សំអាត មានប្រសាសន៍ថា កន្លងមក ជំនួយយោធាសហរដ្ឋអាមេរិកត្រូវបានប្រើប្រាស់ដោយមន្ត្រីយោធាកម្ពុជា មួយចំនួន ដើម្បីការពារក្រុមហ៊ុនឯកជន និងបណ្ដេញពលរដ្ឋចេញពីលំនៅឋាន។
លោក អំ សំអាត៖ «ក្រុមហ៊ុនមួយចំនួនហ្នឹង គេតែងតែប្រើប្រាស់កងកម្លាំងយោធា ឬកងកម្លាំងកងរាជអាវុធហត្ថ ដើម្បីផលប្រយោជន៍ក្រុមហ៊ុនឯកជន ដើម្បីការពារក្រុមហ៊ុនឯកជន។ យើងឃើញកន្លងមកដែរ ដូចជារថយន្តដែលសហរដ្ឋអាមេរិកផ្ដល់ឲ្យកងកម្លាំងយោធាហ្នឹង មានបុគ្គលប្រើប្រាស់ខុសគោលដៅ ដឹកយោធាការពារក្រុមហ៊ុនឯកជន និងរើរុះផ្ទះពលរដ្ឋ»។
ក្រសួងការពារជាតិខ្មែរ កាលពីថ្ងៃច័ន្ទ ទី៥ ខែវិច្ឆិកា បានចេញសេចក្ដីប្រកាសព័ត៌មានឲ្យដឹងថា ក្នុងអំឡុងពេលទស្សនកិច្ចនោះ លោក ឡេអូន ផានិតតា នឹងជួបជាមួយឧបនាយករដ្ឋមន្រ្តី និងជារដ្ឋមន្ត្រីក្រសួងការពារជាតិ លោក ទៀ បាញ់ ក្នុងខេត្តសៀមរាប។ កិច្ចពិភាក្សានឹងផ្ដោតលើសហប្រតិបត្តិការលើការអភិវឌ្ឍធនធានមនុស្សនៃវិស័យយោធា និងការរុករកអដ្ឋិធាតុទាហានអាមេរិកាំង ដែលបាត់ខ្លួនក្នុងសង្គ្រាមជាដើម។
ដំណើរទស្សនកិច្ចរដ្ឋមន្ត្រីក្រសួងការពារជាតិសហរដ្ឋអាមេរិក គឺស្របពេលគ្នានៃកិច្ចប្រជុំរដ្ឋមន្ត្រីការពារជាតិអាស៊ាន ដែលនឹងធ្វើឡើងចាប់ពីថ្ងៃទី១៥ ដល់ទី១៧ ខែវិច្ឆិកា នេះ នៅខេត្តសៀមរាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។