ភារធារីស្ថានទូតសហរដ្ឋអាមេរិកប្រចាំនៅកម្ពុជា បានឲ្យដឹងនៅថ្ងៃទី១៩ មករា ថា ស្ថានទូតសហរដ្ឋអាមេរិកបានតាមដានលើការបណ្ដេញប្រជាពលរដ្ឋបុរីកីឡាចេញពីលំនៅឋានយ៉ាងយកចិត្តទុកដាក់។ មន្ត្រីស្ថានទូតអាមេរិករូបនេះបានជំរុញឲ្យរដ្ឋាភិបាលកម្ពុជា ត្រូវតែដោះស្រាយបញ្ហានេះឲ្យយុត្តិធម៌ និងមានតម្លាភាព។
ការលើកឡើងរបស់មន្ត្រីជាន់ខ្ពស់ស្ថានទូតសហរដ្ឋអាមេរិកដូច្នេះ នៅក្នុងពិធីសម្ពោធគម្រោងប្រឆាំងការជួញដូរមនុស្សជាផ្លូវការជំហានទី២ នៅសណ្ឋាគារឡឺរូយ៉ាល់ (Le Royal) រាជធានីភ្នំពេញ នៅព្រឹកថ្ងៃទី១៩ មករា ឆ្នាំ២០១២។
លោក ចេហ្វ ដាយហ្គល (Jeff Daigle) ជាភារធារីស្ថានទូតសហរដ្ឋប្រចាំនៅកម្ពុជា បានជំរុញឲ្យរដ្ឋាភិបាលកម្ពុជា និងដៃគូពាក់ព័ន្ធទាំងអស់ ត្រូវដោះស្រាយបញ្ហាបណ្ដេញចេញអ្នកភូមិបុរីកីឡានេះ ប្រកបដោយតម្លាភាព និងការទទួលខុសត្រូវ ៖ "ហើយយើងបានតាមដានសភាពការណ៍នេះយ៉ាងយកចិត្តទុកដាក់ ដូចដែលយើងបាននិយាយកាលពីមុនហើយ ទាក់ទងទៅនឹងសេចក្ដីថ្លែងការណ៍របស់ស្ថានទូតសហរដ្ឋអាមេរិក គឺថា បញ្ហាទំនាស់ដីធ្លី បញ្ហាបណ្ដេញប្រជាពលរដ្ឋហ្នឹងអាចនឹងនាំឲ្យអស្ថិរភាពនៅក្នុងសង្គម"។
ទាក់ទងនឹងបញ្ហានេះ មន្ត្រីនាំពាក្យនៃទីស្ដីការគណៈរដ្ឋមន្ត្រី និងជារដ្ឋលេខាធិការ លោក ផៃ ស៊ីផាន បានស្វាគមន៍ចំពោះការលើកឡើងរបស់មន្ត្រីជាន់ខ្ពស់ស្ថានទូតសហរដ្ឋអាមេរិកនេះ ដែលលោកចាត់ទុកថា ការលើកឡើងនេះ ជាការយកចិត្តទុកដាក់ខ្ពស់ និងជាដៃគូរវាងរដ្ឋាភិបាលអាមេរិក និងរដ្ឋាភិបាលកម្ពុជា។ ប៉ុន្តែលោក ផៃ ស៊ីផាន បញ្ជាក់ថា ករណីបណ្ដេញអ្នកភូមិបុរីកីឡាចេញនេះវាស្ថិតនៅលើលោក កែប ជុតិមា ជាអភិបាលរាជធានីភ្នំពេញ ដែលជាអ្នកទទួលខុសត្រូវខ្ពស់លើករណីនេះ។
លោក កែប ជុតិមា ជាអភិបាលរាជធានីភ្នំពេញ មិនបានបំភ្លឺលើករណីបណ្ដេញចេញអ្នកភូមិបុរីកីឡាទេ នៅថ្ងៃទី១៩ មករា។
ប៉ុន្តែយ៉ាងនេះក្ដី សាលារាជធានីភ្នំពេញ បានចេញសេចក្ដីជូនដំណឹងជាលើកដំបូងមួយ ដែលផ្សាយនៅលើគេហទំព័ររបស់ខ្លួន កាលពីថ្ងៃទី៦ មករា បានឲ្យដឹងថា សមត្ថកិច្ចបានធ្វើការដោះស្រាយតាមបែបចាត់វិធានការសមស្រប ចំពោះប្រជាពលរដ្ឋបុរីកីឡា និងបានធ្វើការរុះរើសំណង់ដែលមិនមានលក្ខណៈសម្បត្តិក្នុងការទទួលបានផ្ទះពីរដ្ឋ។ ការធ្វើដូច្នេះ ដើម្បីធានាឲ្យមាននីតិរដ្ឋ និងផ្ដល់ភាពយុត្តិធម៌សម្រាប់ប្រជាពលរដ្ឋជាង ១ពាន់គ្រួសារ ដែលបានស្ម័គ្រចិត្តទទួលផ្ទះពីរដ្ឋនៅសហគមន៍បូរីកីឡា។
នាយកលេខាធិការដ្ឋានពិសេសនៃសិទ្ធិលំនៅឋាន លោក សៀ ភារម្យ មានប្រសាសន៍ថា សាលារាជធានីបានកម្ទេចផ្ទះប្រជាពលរដ្ឋនោះជារឿងខុសច្បាប់។ លោកបញ្ជាក់ថា រដ្ឋាភិបាលកម្ពុជាគួរតែដោះស្រាយលើករណីបណ្ដេញប្រជាពលរដ្ឋចេញឲ្យបានឆាប់រហ័ស និងសន្តិវិធី ជៀសវាងបញ្ហាធំនឹងកើតមានដោយសារតែទំនាស់ដីធ្លីនេះ។
លោក សៀ ភារម្យ បានអះអាងថា មកទល់ថ្ងៃទី១៩ មករា អ្នកភូមិបុរីកីឡារាប់រយគ្រួសារកំពុងរស់នៅរប៉ាត់រប៉ាយគ្មានទីជម្រកស្នាក់នៅ ពិសេសគឺអ្នកភូមិចំនួន ១៨នាក់ ក្នុងនោះរួមទាំងកុមារផង ដែលពួកគាត់លោតផ្លោះរបងចេញពីមណ្ឌលឃុំឃាំងព្រៃស្ពឺ កាលពីថ្ងៃទី១៨ មករា នោះ។
អ្នកភូមិបុរីកីឡាចំនួន ១៨នាក់ ក្នុងចំណោម ៣០នាក់ រួមទាំងកុមារ ត្រូវបានសមត្ថកិច្ចសាលារាជធានីភ្នំពេញចាប់ខ្លួនបញ្ជូនទៅឃុំខ្លួននៅមជ្ឈមណ្ឌលសង្គមកិច្ចរាជធានី កាលពីថ្ងៃទី១១ មករា នៅខណៈពួកគាត់បាននាំគ្នាទៅដាក់ញត្តិ ដើម្បីសុំឲ្យលោក កែប ជុតិមា រកយុត្តិធម៌ជូនពួកគាត់អំពីការបណ្ដេញចេញនោះ។
ការនាំគ្នាទៅសាលារាជធានីភ្នំពេញរបស់អ្នកភូមិបុរីកីឡានេះ នៅបន្ទាប់ពីគ្រឿងចក្ររបស់ក្រុមហ៊ុនផានអ៊ីម៉ិច បានទៅឈូសកម្ទេចផ្ទះរបស់ប្រជាពលរដ្ឋបុរីកីឡាប្រមាណ ៣០០ខ្នង កាលពីថ្ងៃទី៣ ខែមករា ឆ្នាំ២០១២៕