ក្រុមមន្ត្រីសិទ្ធិមនុស្សបានឲ្យដឹងថា ក្រុមស៊ើបអង្កេតចម្រុះរបស់រដ្ឋាភិបាល បានជញ្ជួនជនសង្ស័យបុរសឈ្មោះ រ៉ាន់ បូរ័ត្ន ទៅកាន់តុលាការខែត្រកោះកុង ដើម្បីបន្តនីតិវិធីសាកសួរជុំវិញអំពើឃាតកម្មសកម្មជនការពារព្រៃឈើ និងមន្ត្រីប៉េអឹមមួយរូបទៀត។
លោក អំ សំអាត បានបញ្ជាក់ទៀតថា ការបញ្ជូនជនសង្ស័យនេះរួមមាន ភស្តុតាងមួយចំនួនដែរ ដូចជា រថយន្តរបស់លោក ឈុត វុទ្ធី និងកាំភ្លើងអាកា ៤៧ ដែលជាកាំភ្លើងជនល្មើស និងកាំភ្លើងខ្លីរបស់លោក ឈុត វុទ្ធី ផងដែរ។
ជនសង្ស័យឈ្មោះ រ៉ាន់ បូរ័ត្ន នេះជាកូនប្រុសរបស់លោក ហ៊ុន រ៉ាន់ ដែលលោកអតីត ជាមន្រ្តីរដ្ឋបាលព្រៃឈើខែត្រកោះកុង។
ដោយឡែក ជនសង្ស័យមួយរូបទៀត ដែលជាមន្ត្រីប៉េអឹមឈ្មោះ សូ សុភាព នោះ គេមិនបានបញ្ជូនទៅតុលាការទេ។
ប៉ុន្តែ ប្រភពពីខាងមន្ត្រីស៊ើបអង្កេតរបស់សមាគមសិទ្ធិមនុស្ស អាដហុក និងមន្ត្រីស៊ើបអង្កេតអង្គការ លីកាដូ បន្ថែមថា នៅព្រឹកថ្ងៃទី ៣ ឧសភា នៅមុនពេលគេបញ្ជូនលោក រ៉ាន់ បូរ័ត្ន ទៅតុលាការ គណៈកម្មការស៊ើបអង្កេតបានយក លោក រ៉ាន់ បូរ័ត្ន ទៅកន្លែងកើតហេតុ ដើម្បីបង្ហាញពីសកម្មភាពនៅពេលកើតហេតុនោះ។ ប៉ុន្តែគេមិនបានបញ្ជាក់ច្បាស់ លាស់ទេថា តើធ្វើសកម្មភាពយ៉ាងដូចម្ដេចនោះទេ។
ប្រធានក្រុមស៊ើបអង្កេត លោក ម៉ក់ ជីតូ និងជាប្រធាននាយកដ្ឋានកណ្ដាលយុត្តិធម៌នៃអគ្គស្នងការដ្ឋាននគរបាលជាតិក្រសួងមហាផ្ទៃ។ លោកមានប្រសាសន៍នៅថ្ងៃទី ៣ ឧសភាថា គណៈកម្មការរបស់លោក បានចុះទៅដល់កន្លែងកើតហេតុនៅឃុំបាក់ខ្លង ស្រុកមណ្ឌលសីមា ខែត្រកោះកុង ដើម្បីស៊ើបអង្កេតលើករណីឃាតកម្មនេះ ហើយបានសាកសួរសាក្សី និងប្រជាពលរដ្ឋ នៅកន្លែងកើតហេតុជាច្រើននាក់ទៀតនៅទីនោះ។ ប៉ុន្តែ លោក ម៉ក់ ជីតូ មិនបានបញ្ជាក់ច្បាស់លាស់ទេ។ លោកគ្រាន់តែបញ្ជាក់ថា សមត្ថកិច្ចរបស់លោកកំណត់មុខសញ្ញាឃាតកម្មនេះបានហើយ ដែលគេកំពុងធ្វើការស៊ើបអង្កេតបន្ត។
អនុប្រធានក្រុមស៊ើបអង្កេតនៃសមាគមសិទ្ធិមនុស្ស អាដហុក លោក ចាន់ សុវ៉េត បានសម្ដែងការព្រួយបារម្ភថា ខ្លាចការស៊ើបអង្កេតគ្មានតម្លាភាព និងមិនឯករាជ្យ។
ទោះបីជាយ៉ាងណាក៏ដោយ ស្ថានទូតសហរដ្ឋអាមេរិក បានចេញសេចក្ដីថ្លែងការណ៍ជាផ្លូវការ ស្ដីពីការបាញ់សម្លាប់សកម្មជនការពារព្រៃឈើ លោក ឈុត វុទ្ធី នៅថ្ងៃទី ៣ ឧសភា ដោយទាមទារឲ្យរដ្ឋាភិបាលកម្ពុជាស៊ើបអង្កេតឲ្យបានពេញលេញ ប្រកបដោយតម្លាភាព និងភាពអាចជឿទុកចិត្តបានលើករណីនេះ។
មន្ត្រីនាំពាក្យស្ថានទូតសហរដ្ឋអាមេរិកប្រចាំនៅកម្ពុជា លោក សន ម៉ាកអិនតស្ស (Sean McIntosh) មានប្រសាសន៍តាមសារអេឡិចត្រូនិកថា សហរដ្ឋអាមេរិក សម្ដែងក្ដីកង្វល់យ៉ាងខ្លាំងក្នុងអំពើឃាតកម្មនេះ។
លោក សន ម៉ាកអិនតស្ស៖ «សហរដ្ឋអាមេរិកជំរុញឲ្យរដ្ឋាភិបាលកម្ពុជាចាត់វិធានការសមស្របនានា ដើម្បីបញ្ចប់ការស៊ើបអង្កេតមួយ ដែលធ្វើឡើងពេញលេញ មានតម្លាភាព និងភាពអាចជឿទុកចិត្តបាន»។
លោក សន ម៉ាកអិនតស្ស បានបញ្ជាក់ថា សហរដ្ឋអាមេរិកនៅតែព្រួយបារម្ភអំពីការប្រើប្រាស់កម្លាំង ដើម្បីចាត់វិធានការចំពោះបុគ្គល ដែលស្វែងរកដំណោះស្រាយទៅលើបញ្ហាសំខាន់ៗ ដោយសន្តិវិធី។ លោកបន្ថែមថា សហរដ្ឋអាមេរិកអំពាវនាវដល់រដ្ឋាភិបាលកម្ពុជា ឲ្យធានាដល់ការការពារសិទ្ធិពលរដ្ឋជាមូលដ្ឋាន និងសេរីភាពខាងព័ត៌មានរបស់បុគ្គលទាំងនេះ។
សេចក្ដីថ្លែងការណ៍ស្ថានទូតសហរដ្ឋអាមេរិកចេញ នៅថ្ងៃទី ៣ ឧសភា សម្ដែងមរណៈទុក្ខដ៏ស្មោះដល់គ្រួសាររបស់លោក ឈុត វុទ្ធី។ សេចក្ដីថ្លែងការណ៍ដដែល បានជំរុញឲ្យរដ្ឋាភិបាលកម្ពុជាឱ្យស្វែងរកឃាតកសម្លាប់លោក ឈុត វុទ្ធី ពីព្រោះថា លោក ឈុត វុទ្ធី បានបំពេញការងារដ៏មានតម្លៃក្នុងការការពារធនធានធម្មជាតិរបស់ប្រទេសកម្ពុជា និងធ្វើឲ្យមានការយកចិត្តទុកដាក់លើភាពចាំបាច់សម្រាប់រដ្ឋាភិបាលមួយ ដែលមានតម្លាភាព ដើម្បីបម្រើប្រជាពលរដ្ឋ។ សហរដ្ឋអាមេរិកនៅតែមានកង្វល់ទៅលើការប្រើកម្លាំង ដើម្បីរារាំងសកម្មភាពរបស់បុគ្គលម្នាក់ៗ ដែលមានបំណងបង្ហាញឲ្យគេឃើញនូវបញ្ហាសំខាន់នានា ប្រកបដោយសន្តិវិធី ដូចជាការកាប់ឈើខុសច្បាប់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។