សហរដ្ឋអាមេរិកជួយកម្ពុជាជាង៥០លានដុល្លារសម្រាប់ការអភិវឌ្ឍ
h092112ts.mp3
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងជាឧបនាយករដ្ឋមន្ត្រី នៅថ្ងៃទី២១ ខែកញ្ញា បានចុះហត្ថលេខាទ្វេភាគីជាមួយភារធារីស្តីទី នៃស្ថានទូតសហរដ្ឋអាមេរិកនៅកម្ពុជា លោក ចេហ្វ ដាយហ្គូល (Jeff Daigle) និងប្រធានអង្គការ USAID លោក ហ្លីន ហ្វូល័រ (Flynn Fuller) ដើម្បីទទួលជំនួយឥតសំណងប្រចាំឆ្នាំពីសហរដ្ឋអាមេរិក ចំនួន ៣៤លានដុល្លារអាមេរិក សម្រាប់ឆ្នាំ២០១២ នេះ។
ប្រាក់ជំនួយនោះ គឺត្រូវបានបែងចែកជាពីរផ្នែក គឺប្រាក់ជំនួយចំនួន ២៨លាន ៧សែនដុល្លារអាមេរិក សម្រាប់វិស័យសុខាភិបាល ឆ្នាំ២០១២ ដើម្បីកែលំអសេវាព្យាបាលអ្នកកើតជំងឺឆ្លងមាតា និងទារក និងសុខភាពបន្តពូជ និងប្រាក់ជំនួយចំនួន ១លានដុល្លារអាមេរិកទៀត គឺសម្រាប់វិស័យអប់រំឆ្នាំ២០១២ ដើម្បីបង្កើនគុណភាពអប់រំថ្នាក់មូលដ្ឋាន និងឲ្យមានការចូលរៀនច្រើនពីកុមារីនៅមូលដ្ឋាន។
អ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍ប្រាប់អ្នកកាសែតនៅថ្ងៃទី២១ ខែកញ្ញា ថា ជំនួយទាំងនេះ គឺចាំបាច់ណាស់សម្រាប់សេចក្តីត្រូវការរបស់កម្ពុជា៖ «ឯកឧត្តមក៏វាយតម្លៃខ្ពស់ចំពោះការខិតខំប្រឹងប្រែងរបស់ស្ថានទូតសហរដ្ឋអាមេរិកប្រចាំនៅក្នុងប្រទេសកម្ពុជា យើង ក្នុងការខិតខំពង្រឹងទំនាក់ទំនងនៃប្រទេសទាំងពីរ រវាងកម្ពុជា និងសហរដ្ឋអាមេរិក។ ហើយម្យ៉ាងវិញទៀត ឧបនាយករដ្ឋមន្ត្រី ក៏បានបញ្ជាក់ថា ឯកឧត្តមបានកត់សម្គាល់អំពីទំនាក់ទំនងល្អ ដែលប្រទេសទាំងពីរមានកន្លងមកនេះ ហើយសង្ឃឹមថាប្រទេសទាំងពីរ និងមានទំនាក់ទំនងកាន់តែរឹងមាំថែមទៀត នាពេលឆ្នាំខាងមុខនេះ»។
ជាមួយគ្នានេះដែរ ភារធារីស្តីទី នៃស្ថានទូតសហរដ្ឋអាមេរិក នៅកម្ពុជា លោក ចេហ្វ ដាយហ្គូល បានមានប្រសាសន៍ថា សហរដ្ឋអាមេរិក និងកម្ពុជា នៅតែបន្តជាមិត្ត និងដៃគូល្អជាមួយគ្នា៖ «យើងទាំងអស់គ្នា បានធ្វើឲ្យល្អប្រសើរឡើងក្នុងការកាត់បន្ថយអត្រាស្លាប់របស់មាតា និងទារក និងបង្កើនគុណភាពនៃសេវាព្យាបាលសុខភាពជាមូលដ្ឋាន។ តាមរយៈជំនួយនេះ សង្ឃឹមថានឹងមានកុមារកម្ពុជាជាច្រើនទៀត ចូលសាលារៀន។ សហរដ្ឋអាមេរិក នៅបន្តជាដៃគូជាមួយរដ្ឋាភិបាលកម្ពុជា នៅលើវិស័យទាំងនោះ»។
តំណាងអង្គការសង្គមស៊ីវិល នៅប្រទេសកម្ពុជា លោក អំ សំអាត មកពីអង្គការលីកាដូ (Licadho) បានមានប្រសាសន៍ថា លោកសុំឲ្យរដ្ឋាភិបាលកម្ពុជា ប្រើប្រាស់ជំនួយនោះឲ្យមានប្រសិទ្ធភាព៖ «គឺធ្វើយ៉ាងណា ដើម្បីឲ្យរដ្ឋាភិបាលយើងអនុវត្តទៅតាមផែនការនៃការទទួលជំនួយហ្នឹង ឲ្យមានប្រសិទ្ធភាព»។
ទីភ្នាក់ងារសម្រាប់ការអភិវឌ្ឍន៍អន្តរជាតិ របស់សហរដ្ឋអាមេរិក បានផ្តល់ជំនួយឥតសំណងសរុបចំនួន ២៧១លានដុល្លារអាមេរិក សម្រាប់វិស័យសុខាភិបាល តាំងពីឆ្នាំ២០០៣ កន្លងមក និងវិស័យអប់រំ គឺសរុបចំនួន ២៥លាន ៧សែនដុល្លារអាមេរិក តាំងពីឆ្នាំ២០០២ កន្លងមក។
នៅថ្ងៃទី២១ ខែកញ្ញា នេះដែរ សហរដ្ឋអាមេរិក និងប្រទេសកម្ពុជា នឹងចុះហត្ថលេខាទ្វេភាគីនៅទីស្ដីការគណៈរដ្ឋមន្ត្រី ដើម្បីផ្តល់ជំនួយឥតសំណងចំនួន ១៨លាន ៥សែនដុល្លារអាមេរិក ឲ្យប្រទេសកម្ពុជា សម្រាប់កំណើនសេដ្ឋកិច្ច កសិកម្ម សន្តិសុខស្បៀង និងការប្រែប្រួលអាកាសធាតុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
CheyVorman007
ពី AngKor Watសមយ័នេះជាសមយ័ចាយតួរលេខ ចោរលួចធនាគាររាប់លាន
បានគឺលួចតាមតួរលេខនេះឯង វិកយ័បត្តយកជាការបានខ្លះក្នុង
ការត្រួតពិនិតលើការចំណាយ តែបើត្រូវរួវគ្នាគឺ អិតិ អេវំំ។
Sep 22, 2012 09:27 AM
អ្នកអានអនាមិក
Good to hear that now, USA starts interesting in helping poor Cambodia.But make sure that the implementing Companies use money for benefit to people,not just good in report and takes most of the money back home.
Sep 22, 2012 02:13 AM
អ្នកអានអនាមិក
លោក អំ សំអាត និយាយមកដូចអត់ដែលចូលសាលាចឹង
តើអាមេរិចណាយកលុយមកអោយខ្មែរកាន់ អាមេរិចជួយខ្មែរ ខ្មែរបានតែតួលេខទេ អាមេរិចគេមានទីភ្នាក់ងាររបស់គេដើម្បីរ៉ាប់រងរឿងហ្នឹង គេមិនដែលអោយយើងកាន់លុយរាប់លាននោះទេ។
Sep 21, 2012 10:45 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
