សេចក្តីប្រកាសព័ត៌មានរបស់សេតវិមាន (White House) បានដកស្រង់សម្ដីអ្នកស្រី សាមាន្ថា ផៅវើ ថា បច្ចុប្បន្នលោកនាយករដ្ឋមន្ត្រី ហ៊ុន សែន កំពុងបង្កើនការរំលោភបំពានលើតួនាទីរបស់អង្គការសង្គមស៊ីវិល។ អ្នកស្រីបន្តថា មានបុគ្គលជាច្រើននាក់បានស្នើសុំឲ្យលោក បារ៉ាក់ អូបាម៉ា ប្រធានាធិបតីសហរដ្ឋអាមេរិក អន្តរាគមន៍រដ្ឋាភិបាលកម្ពុជា ឲ្យមានការរៀបចំការបោះឆ្នោតដោយសេរី និងយុត្តិធម៌ នៅឆ្នាំ២០១៣។ អ្នកស្រីអះអាងថា បច្ចុប្បន្នគ្មានសញ្ញាណាមួយដែលកម្ពុជា អាចរៀបចំការបោះឆ្នោតដោយសេរី និងយុត្តិធម៌ឡើយ។
ការលើកឡើងរបស់អ្នកស្រី សាមាន្ថា ផៅវើ ស្រដៀងទៅនឹងក្តីបារម្ភរបស់អង្គការសង្គមស៊ីវិលមួយចំនួននៅកម្ពុជា ដែលបានចាត់ទុកថា ការរារាំងលោក សម រង្ស៊ី ប្រធានគណបក្សសង្គ្រោះជាតិ មិនឲ្យចូលរួមការបោះឆ្នោត អាចប៉ះពាល់ដល់ដំណើរការបោះឆ្នោតដោយសេរី និងយុត្តិធម៌។
អ្នកស្រីបន្ថែមទៀតថា សម្រាប់ទំនាក់ទំនងទ្វេភាគីកម្ពុជា និងសហរដ្ឋអាមេរិក រដ្ឋាភិបាលសហរដ្ឋអាមេរិក ចង់ឃើញមានការបោះឆ្នោតដោយសេរី និងយុត្តិធម៌ ការបញ្ឈប់ទន្ទ្រានយកដីពលរដ្ឋដោយខុសច្បាប់ និងការការពារ និងលើកកម្ពស់សិទ្ធិមនុស្ស។ នេះជាសារសំខាន់របស់សហរដ្ឋអាមេរិក ស្ដីពីទំនាក់ទំនងទ្វេភាគីនៃប្រទេសទាំងពីរ។ អ្នកស្រីបន្តថា លោក ហ៊ុន សែន ជាម្ចាស់ផ្ទះនៃកិច្ចប្រជុំតំបន់អាស៊ីអាគ្នេយ៍សំខាន់ៗមួយចំនួន ប៉ុន្តែសារទ្វេភាគីរបស់សហរដ្ឋអាមេរិក គឺការរំលោភសិទ្ធិមនុស្ស កើតឡើងក្នុងទឹកដីកម្ពុជា។ សហរដ្ឋអាមេរិកទទូចសុំឲ្យរដ្ឋាភិបាលកម្ពុជា ពិចារណាក្តីកង្វល់នេះឲ្យបានម៉ត់ចត់ និងមិនត្រូវបន្តឲ្យមានការរំលោភសិទ្ធិមនុស្សទៀតឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។