អាមេរិកព្រមានថាវិបត្តិដីធ្លីនៅកម្ពុជាអាចនាំឲ្យមានអស្ថិរភាពក្នុងសង្គម
2012.01.06
ការព្រមាននេះ ធ្វើឡើងបន្ទាប់ពីការបណ្ដេញប្រជាពលរដ្ឋចេញពីលំនៅឋានដោយបង្ខំក្នុងសប្ដាហ៍នេះ ដែលបណ្ដាលឲ្យមានការចាប់ខ្លួនក្រុមអ្នកតវ៉ាយ៉ាងតិចចំនួន ១០នាក់ ហើយបណ្ដាលមនុស្សប្រមាណ ៤០នាក់ផ្សេងទៀតរងរបួសក្នុងហេតុការណ៍ហិង្សានោះ។
កាលពីថ្ងៃអង្គារ ទី៣ ខែមករា កម្លាំងប៉ូលិសបានបាញ់កាំភ្លើងឧស្ម័នបង្ហូរទឹកភ្នែក និងបានគប់ដុំថ្មទៅលើប្រជាពលរដ្ឋក្នុងតំបន់បុរីកីឡា ហើយពលរដ្ឋនៅទីនោះបានតបតវិញដោយចោលដុំថ្ម កំណាត់ឈើ និងដុំដីទៅលើកម្លាំងប៉ូលិស ខណៈសមត្ថកិច្ចទីក្រុងភ្នំពេញ បានប្រើគ្រឿងចក្រឈូសឆាយកម្ទេចផ្ទះសំបែងរបស់ពួកគេអស់ជាង ២០០ខ្នង។
មន្ត្រីនាំពាក្យនៃស្ថានទូតសហរដ្ឋអាមេរិកប្រចាំនៅកម្ពុជា លោក ស្ហ៊ន ម៉ាគីនថូស (Sean Mcintosh) បានថ្លែងប្រាប់វិទ្យុអាស៊ីសេរីថា សហរដ្ឋអាមេរិកនៅតែព្រួយបារម្ភថា ទំនាស់ដីធ្លីជាច្រើនដោយគ្មានការដោះស្រាយនៅកម្ពុជា អាចនាំឲ្យមានអស្ថិរភាពក្នុងប្រទេស។
ក្នុងរយៈពេលប៉ុន្មានឆ្នាំចុងក្រោយនេះ ក្រុមការពារសិទ្ធិមនុស្សជាច្រើន ហើយនិងអង្គការសហប្រជាជាតិ បានរិះគន់ប្រទេសកម្ពុជា យ៉ាងខ្លាំងចំពោះការបណ្ដេញប្រជាពលរដ្ឋដោយបង្ខំនៅទូទាំងប្រទេស ដែលបានបណ្ដាលឱ្យមនុស្សរាប់ពាន់នាក់បាត់បង់លំនៅឋាន ក្នុងនោះភាគច្រើនជាពលរដ្ឋក្រីក្រ។
កាលពីខែសីហា កន្លងទៅនេះ ធនាគារពិភពលោកបានផ្អាករាល់គម្រោងប្រាក់កម្ចីថ្មីដល់រដ្ឋាភិបាលកម្ពុជា ដោយសារបញ្ហាទំនាស់ដីធ្លី និងការបណ្ដេញពលរដ្ឋដោយបង្ខំដ៏ធំមួយនៅតំបន់បឹងកក់ ក្នុងរាជធានីភ្នំពេញ។
អាមេរិកទទួលយកញត្តិរបស់អ្នកភូមិបុរីកីឡា
ស្ថានទូតសហរដ្ឋអាមេរិកប្រចាំនៅទីក្រុងភ្នំពេញ បានទទួលយកញត្តិរបស់អ្នកភូមិសហគមន៍បុរីកីឡាហើយ នៅថ្ងៃទី៥ ខែមករា ឆ្នាំ២០១២ ដែលអ្នកភូមិបានស្នើឲ្យស្ថានទូតជួយអន្តរាគមន៍ទៅភាគីក្រុមហ៊ុន ឲ្យដោះស្រាយផ្ដល់សំណងជូនពួកគាត់ ចំពោះការបាត់បង់ដីធ្លីនោះ។
សូមស្ដាប់សេចក្ដីរាយការណ៍របស់លោក ទីន ហ្សាការីយ៉ា៖