លោក ឡុង វិសាលោ រដ្ឋមន្ត្រីស្ដីទីនៃក្រសួងការបរទេស និងលោក ហ្វ្លាន់ ហ្វូល្លើ (Flynn Fuller) នាយកបេសកកម្មរបស់អង្គការ USAID នឹងចុះហត្ថលេខាលើកិច្ចព្រមព្រៀងនៃការផ្ដល់ជំនួយទឹកប្រាក់នេះ នៅថ្ងៃទី២៨ ខែកញ្ញាខាងមុខ។
ក្នុងចំនួនទឹកប្រាក់សរុប គឺប្រាក់ចំនួន ៣៣លាន ៥សែនដុល្លារ នឹងត្រូវគេប្រើសម្រាប់ពង្រឹងវិស័យសុខាភិបាល ដូចជាគាំទ្រនូវសកម្មភាព ដែលកំពុងតែដំណើរការ ដើម្បីកាត់បន្ថយនូវអត្រាឆ្លង និងផលប៉ះពាល់នៃជំងឺអេដស៍ ការពារ និងកម្ចាត់ជំងឺឆ្លងធំៗ ដូចជាជំងឺរបេង គាំពារសុខភាពមាតា និងទារក និងពង្រឹងប្រព័ន្ធសុខភាពសាធារណៈ។
ហើយទឹកប្រាក់ចំនួន ១លាន ៥សែនដុល្លារទៀត នឹងប្រើនៅក្នុងកម្មវិធីពង្រឹងវិស័យអប់រំ ដើម្បីវិស័យអប់រំកាន់តែមានគុណភាពប្រសើរឡើង ពង្រីកលទ្ធភាពកុមារឲ្យចូលរៀនបានកាន់តែច្រើន រួមទាំងកុមារជនជាតិភាគតិច និងកុមារក្រីក្រ។ ក្នុងបំណងកាត់បន្ថយអត្រានៃការបោះបង់ចោលសាលារៀន និងបង្កើនគុណភាពនៃការបង្រៀន។
គិតមកដល់ពេលនេះ មានទឹកប្រាក់ចំនួន ២៧៧លានដុល្លារហើយ ដែលសហរដ្ឋអាមេរិក បានផ្តល់ឲ្យកម្ពុជា នៅលើវិស័យសុខាភិបាល និងវិស័យអប់រំ៕