នាវាទី៧ ដែលជាប្រភេទនាវាបញ្ជាការប្រយុទ្ធ និងត្រួតពិនិត្យរបស់ទាហានសហរដ្ឋអាមេរិក ដែលបានសំចតនៅកំពង់ផែក្រុងព្រះសីហនុ រយៈពេល ៥ថ្ងៃ ក្នុងគោលដៅរឹតចំណងសាមគ្គីភាពនៃកងទ័ពប្រទេសទាំងពីរ និងវិលត្រឡប់ទៅវិញ នៅថ្ងៃទី៥ ឧសភា។ បន្ទាប់ពីបានធ្វើសកម្មភាពមនុស្សធម៌ និងបណ្ដុះបណ្ដាលទៅវិញទៅមកជាមួយកងនាវាកម្ពុជា។
មន្ត្រីនាំពាក្យស្ថានទូតអាមេរិកប្រចាំកម្ពុជា លោក សន ម៉ាកគិនតូស (Sean Mcintosh) មានប្រសាសន៍នៅថ្ងៃទី៤ ឧសភា ថា នេះជាឱកាសនៃការបង្កើនទំនាក់ទំនងរវាងកងទ័ពនៃប្រទេសទាំងពីរ គឺកម្ពុជានិងសហរដ្ឋអាមេរិក ៖ "មុនពេលដែលខ្ញុំមកកម្ពុជា សហរដ្ឋអាមេរិកនិងកម្ពុជាបានប្រារព្ធខួបលើកទី៦០នៃទំនាក់ទំនងទ្វេភាគីនៃកម្ពុជានិងសហរដ្ឋអាមេរិក។ ទំនាក់ទំនងនេះបានបង្ហាញពីភាពរឹងមាំពីមួយឆ្នាំទៅមួយឆ្នាំ។ ក្នុងរយៈពេលចុងក្រោយនេះ គឺចំនួនទស្សនកិច្ចរបស់នាវាមានការកើនឡើងជាលំដាប់"។
ស្ថានទូតបានដឹកនាំក្រុមអ្នកកាសែតឡើងទៅកាន់នាវាឈ្មោះថា យូអេសអេស ប្លូរិច USS Blue Ridge ដែលបានសំចតនៅក្នុងដែនសមុទ្ទ ខេត្តព្រះសីហនុ កាលពីរសៀលថ្ងៃទី៤ ឧសភា នៅមុននាវានេះត្រឡប់ទៅវិញ។
វរនាវីឯក ដានីញ៉ែល ហ្គ្រីកូ (DANIEL GRIECO) មេបញ្ជាការនាវា USS Blue Ridge ថ្លែងនៅលើនាវានោះថា នាវានេះមានមូលដ្ឋាននៅប្រទេសជប៉ុន។ ជាប្រភេទនាវាបញ្ជាការប្រយុទ្ធ និងត្រួតពិនិត្យ។ លោកមានសេចក្ដីរីករាយណាស់ដែលបានមកទស្សនកិច្ចនៅកម្ពុជា។ លោកថា ទស្សនកិច្ចនេះគឺ ជួយពង្រឹងទំនាក់ទំនងទ្វេភាគីជាពិសេសកងនាវាជើងទឹក ហើយនឹងជួយពង្រឹងសន្តិសុខក្នុងតំបន់ ៖ "ទំនាក់ទំនងរវាងកងទ័ពជើងទឹករវាងប្រទេសទាំងពីរគាត់អាចនិយាយបានថាទំនាក់ទំនងមានការរីកចម្រើនខ្លាំង។ កាលពីថ្ងៃច័ន្ទមុននេះ គឺយើងបានធ្វើពិធីជប់លៀងមួយនៅក្នុងនាវានេះ ហើយគាត់បានជួបពិភាក្សាជាមួយមន្ត្រីកងនាវាជើងទឹកកម្ពុជា ផ្លាស់ប្ដូរយោបល់គ្នា គាត់សង្ឃឹមថាទំនាក់ទំនងនេះ និងបន្តទៅមុខកាន់តែល្អទៀត ហើយយើងនឹងរួមគ្នាធ្វើការដោះស្រាយនៅបញ្ហានិងវិបត្តិអ្វីផ្សេងៗទៀត"។
ស្របពេលនាវានេះមកដល់កម្ពុជា ឧត្ដមនាវីឯក ស្កុតស្វីស (Scott Swift) មេបញ្ជាការនៃកងនាវាជើងទឹកទី៧ របស់សហរដ្ឋអាមេរិកក៏បានមកធ្វើទស្សនកិច្ចនៅប្រទេសកម្ពុជាដែរ កាលពីថ្ងៃទី៣០ ខែមេសា ឆ្នាំ២០១២។ ក្នុងដំណើរទស្សនកិច្ចនោះ លោកបានជាមួយមន្ត្រីកងទ័ពជើងទឹក និងមន្ត្រីក្រសួងការពារជាតិកម្ពុជា ដើម្បីពិភាក្សាបញ្ហាទ្វេភាគី និងបញ្ហាតំបន់ដែលមានសារប្រយោជន៍ទៅវិញទៅមក។ ក្នុងនោះរួមមានការចូលរួមរបស់ប្រទេសកម្ពុជាក្នុងលំហាត់សមយុទ្ធយោធា ស្តីពីការហ្វឹកហ្វឺននិងការត្រៀមខ្លួនជាស្រេចសម្រាប់ប្រតិបត្តិការលើផ្ទៃទឹក។
រួមទាំងការផ្លាស់ប្ដូរដែលផ្ដល់ផលប្រយោជន៍ទៅវិញទៅមកផ្នែកសន្តិសុខដែនសមុទ្រ ការរុករកនឹងជួយសង្គ្រោះ ការផ្ដល់ជំនួយសង្គ្រោះបន្ទាន់ក្នុងគ្រោះមហន្តរាយ ជំនួយមនុស្សធម៌ ជំនាញក្នុងការគ្រប់គ្រង បញ្ជានាវា និងពង្រឹងចំណងទាក់ទងផ្នែកយោធាអោយកាន់តែមានភាពជិតស្និទ្ធផងដែរ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។