ក្រុមអាជ្ញាធរខេត្តព្រះសីហនុនិងតំណាងក្រុមហ៊ុនឯកជនមួយឈ្មោះ ទ្បូ សុគន្ធ ធ្លាប់បានកោះប្រជុំជាមួយនឹងតំណាងអាជីវករកាលពីខែមករា កន្លងទៅនេះ ដើម្បីជូនដំណឹងថា គេមានគម្រោងការរឹបយកទីតាំងប្រវែង ១.៥០០ម៉ែត្រ ស្មើនឹង៧២តូប ដើម្បីធ្វើជាសួនច្បារនិងរមណីយដ្ឋាននៅពេលខាងមុខ។
អាជីវករម្នាក់នៅក្នុងចំណោមអាជីវករ៧២តូបនៅឆ្នេរអូរត្រេះនោះ បានថែ្លងប្រាប់វិទ្យុអាស៊ីសេរីថា គ្រួសាររបស់លោកស្រីពឹងផ្អែកទាំងស្រុងលើការប្រកបមុខរបរលក់ដូរនៅឆ្នេរអូរត្រេះនោះទាំងសុ្រង គ្មានអ្វីជាទីពឹងក្រៅពីនេះទៀតទេ ដូច្នេះលោកស្រីមានការព្រួយបារម្ភយ៉ាងខ្លាំង។
អាជីវករសុំមិនបញ្ចេញឈ្មោះឲ្យដឹងដូច្នេះ ៖ «ពីមុន កាលដែលពួកខ្ញុំនៅខាង៧ជាន់ខាងណោះ គេដេញខ្ចាត់ខ្ចាយមកដល់ខាងណេះ។ ពេលដែលមកដល់ខាងហ្នឹង(អូរត្រេះ)ដំបូង តំបន់ហ្នឹងគឺគ្មានអីទាល់តែសោះ ជាព្រៃ ជាស្មៅ គិតថា មិនមានភ្ញៀវទេសចរមកច្រើនទេ ដល់ឥឡូវមានទេសចរមកច្រើនបែរជាមកដេញ។ តាមខ្ញុំគិតមើលកន្លែងណាដែលមានប្រជាពលរដ្ឋមកសាងសង់ គឺមកដេញអ៊ីចឹងតែម្ដងនៅតាមឆ្នេរហ្នឹង ហើយកន្លែងហ្នឹងគឺឆ្នាំងបាយតែមួយរបស់ខ្ញុំ បើសិនជាអត់មិនដឹងជាសង្ឃឹមអីទេ ហើយក៏មិនដឹងជាទៅនៅរកស៊ីកន្លែងណាទៀតដែរបើសិនជាអភិវឌ្ឍ។ ថ្ងៃដែលទៅប្រជុំហ្នឹងគេនិយាយថា ឲ្យពួកខ្ញុំនៅហ្នឹងអាចរកស៊ីអីបាន ប៉ុន្តែមិនបាច់ឲ្យមានហាង មានតូបអីទេ អាចរែកមឹកលក់បាន អ៊ីចឹងបានន័យថា អភិវឌ្ឍតាំងពីមានបាតដៃរហូតដល់អស់រលីង»។
អាជីវករម្នាក់ទៀតបានថែ្លងថា ភ្ងៀវទេសចរនានាបានថយចុះខ្លាំងនៅឆ្នេរអូត្រេះនេះ ក្រោយពីបានលេចឮព័ត៌មានថា ក្រុមអាជីវករចំនួន៧២តូបនឹងរងការបណ្តេញដើម្បីធ្វើសួនច្បារដោយក្រុមហ៊ុន ទ្បូ សុគន្ធ ៖ «ពួកខ្ញុំអត់ព្រមចាកចេញទេ ពួកខ្ញុំនឹងតស៊ូពុះពារទៅមុខទៀតអត់ព្រមចាកចេញទេ ព្រោះថា កន្លែងហ្នឹងគឺជាឆ្នាំងបាយរបស់ខ្ញុំ កាលណាគាត់ដេញខ្ញុំទៅដូចជាវាយបំបែកឆ្នាំងបាយខ្ញុំអ៊ីចឹង។ ណាមួយខ្ញុំចង់អភិវឌ្ឍដោយខ្លួនឯង មិនចង់ឲ្យមានក្រុមហ៊ុនណាមកគ្រប់គ្រងពួកខ្ញុំ»។
វិទ្យុអាស៊ីសេរីមិនទាន់អាចទាក់ទងបាននៅទ្បើយទេ ដើម្បីសុំសេចក្តីបំភ្លឺនានាពីតំណាងក្រុមហ៊ុនឈ្មោះ ទ្បូ សុគន្ធ អំពីគម្រោងការអភិវឌ្ឍន៍នៅឆ្នេរអូរត្រះ ខេត្តព្រះសីហនុ ដែលបង្កឲ្យមានការតវ៉ាពីក្រុមអាជីវករ៧២តូបនោះ។
លោក ផៃ ផាន ជាអភិបាលរងខេត្តព្រះសីហនុ ទទួលបន្ទុកទេសចរណ៍បានមានប្រសាសន៍ថា គម្រោងការអភិវឌ្ឍន៍របស់ក្រុមហ៊ុន ទ្បូ សុគន្ធ ត្រូវបានអនុញ្ញាតដោយទីស្តីការគណៈរដ្ឋមន្រ្តីនិងក្រុមប្រឹក្សាអភិវឌ្ឍន៍កម្ពុជា (CDC)។
លោក ផៃ ផាន ឲ្យដឹងដូច្នេះ ៖ «លិខិតរបស់ក្រុមប្រឹក្សាអភិវឌ្ឍន៍កម្ពុជាមានខ្លឹមសារថា ឆ្នេរទាំងពីរនេះគឺជាទីតាំងសាធារណៈ គឺឆ្នេររបស់ខេត្តព្រះសីហនុ ដែលយើងត្រូវរៀបចំសួនច្បារឲ្យបានសមរម្យ ដើម្បីទាក់ទាញសក្ដានុពលទេសចរណ៍ មិនអាចឲ្យប្រជាពលរដ្ឋកាន់កាប់អនាធិបតេយ្យទេ»។
លោកស្រី ជៀប សុធារី ជាអ្នកសម្របសម្រួលនៃអង្គការការពារសិទ្ធិមនុស្សអាដហុក បានមានប្រសាសន៍ថា ៖ «បើសិនខាងអាជ្ញាធរលោកមានគំនិតអភិវឌ្ឍតំបន់ហ្នឹង គួររៀបចំឲ្យទៅតាមស្តង់ដារនៃការរៀបចំរបស់សាលាខេត្ត ប៉ុន្តែគួរតែទុកលទ្ធភាពឲ្យពួកគាត់ហ្នឹងមានសិទ្ធិក្នុងការលក់ដីបន្តទៅទៀត ដូចជាការជួលអីអ៊ីចឹងទៅ»។
ក្រុមអាជីវករទាំងនោះ បានទទូចសុំឲ្យអាជ្ញាធរខេត្តព្រះសីហនុ និងរដ្ឋាភិបាលកម្ពុជាបន្តឲ្យពួកគាត់ប្រកបមុខរបរសម្រាប់រយៈពេលយូរអង្វែងនៅទីនោះ ពីព្រោះពួកគាត់ជាអ្នកមកត្រួសត្រាយព្រៃនៅទីនោះ ឲ្យក្លាយជាតំបន់ទេសចរណ៍មុនគេ ប៉ុន្តែក្រុមហ៊ុនបែរជាមករឹបអូសទៅវិញ៕