អ្នកស្រី កង ស៊ីខែម បានមានប្រសាសន៍តាមទូរស័ព្ទឲ្យដឹងនៅថ្ងៃទី៩ តុលា ថា អ្នកស្រីមិនអាចទ្រាំនឹងការឈឺចាប់ដោយមើលឃើញកូនរបស់អ្នកស្រីទាំងពីរនិងក្មួយស្រីម្នាក់ទៀតត្រូវក្រុមអង្គរក្សនោះបានប្រើអំពើហិង្សាមកលើ ហើយអាជ្ញាធរសង្កាត់សំរោងក្រោម ខណ្ឌដង្កោ មិនដោះស្រាយជូនអស់រយៈពេលជាច្រើនថ្ងៃកន្លងមកនេះបានទេ។ អ្នកស្រីនឹងដាក់ពាក្យបណ្តឹងទៅតុលាការ។
អ្នកស្រីបញ្ជាក់ថា កូនប្រុសរបស់អ្នកស្រីឈ្មោះ សំ ភារ៉ាត់ នៅតែមានការភ័យខ្លាចនិងរវើរវាយជានិច្ច។ អ្នកស្រីខ្លាចគេនឹងមានជំងឺផ្លូវចិត្តកាន់តែធ្ងន់ធ្ងរ។
អ្នកស្រី កង ស៊ីខែម បានឲ្យដឹងថា ៖ «អ្នកធំទាំងឡាយ តើយល់ដល់ប្រជាជនទាំងអស់នេះទេ? ខ្ញុំឈឺចាប់ក្នុងនាមជាម្ដាយម្នាក់ ខំចិញ្ចឹម ខ្ញុំមិនដែលទៅសុំបាយ សុំអង្ករអស់លោកណាមួយឲ្យលំបាកដល់នាងខ្ញុំជាប្រជាពលរដ្ឋមួយនេះទេ។ ខ្ញុំខំចិញ្ចឹមកូនខ្ញុំលំបាកណាស់ វ៉ៃកូនខ្ញុំ ខ្ញុំស្អប់ណាស់ ខ្ញុំយកទៅនៅវត្តលោក ញ៉ាំថ្នាំរាល់ថ្ងៃ»។
អ្នកភូមិចាក់ជ្រូកមួយរូបឈ្មោះ ស៊ីថា មានប្រសាសន៍ថា អ្នកភូមិរបស់លោកបានផ្តិតមេដៃគាំទ្រជនរងគ្រោះខាងលើកើនដល់១០០នាក់ហើយ ថា ពួកគេជាជនស្លូតត្រង់ មិនមែនជាក្មេងទំនើងដូចនឹងអនុរដ្ឋលេខាធិការនៃក្រសួងពាណិជ្ជកម្ម លោក វ៉េង សូធី ដែលបានចេញមុខដោះស្រាយ បានបញ្ជាឲ្យមេប៉ុស្តិ៍ ក៏ដូចជាចៅសង្កាត់ឲ្យដោះស្រាយ ហើយចោទថា ជនរងគ្រោះខាងលើជាក្មេងទំនើងនោះទេ។
លោក ស៊ីថា បានបញ្ជាក់ថា ៖ «ថ្ងៃក្រោយប្រហែលជាអង្គរក្សគាត់ហ្នឹងប្រហែលជាបង្កបញ្ហា កូនចៅប្រជាជនក្នុងភូមិបានត្រឹមតែសន្លប់ រងគ្រោះ។ ប្រជាពលរដ្ឋចង់បានយុត្តិធម៌ មិនត្រូវការសំណងអីអ៊ីចឹងទេ សំណងលុយអ្នកណាក៏មានដែរ អ៊ីចឹងពួកហ្នឹងមានលុយ ដើរវ៉ៃគេគ្រប់តែគ្នាអ៊ីចឹង? ចង់ឲ្យគាត់ប្រដៅអង្គរក្សកុំឲ្យធ្វើអារបៀបអ៊ីចឹងទៀត»។
អនុរដ្ឋលេខាធិការនៃក្រសួងពាណិជ្ជកម្ម លោក វ៉េង សូធី មិនបានធ្វើការអត្ថាធិប្បាយអំពីករណីនេះទេ ហើយសមាជិកក្រុមអង្គរក្សលោកទេសរដ្ឋមន្ត្រី ចម ប្រសិទ្ធ ក៏មិនអាចទាក់ទងបានដែរមកទល់នឹងពេលនេះ។
រីឯចៅសង្កាត់សំរោងក្រោមក៏ដូចជាមេប៉ុស្តិ៍នគរបាលសង្កាត់សំរោងក្រោម លោក អ៊ឹម កាក់ ក៏មិនបានបំភ្លឺជុំវិញការដោះស្រាយនេះដូចគ្នា។ លោកមេប៉ុស្តិ៍ អ៊ឹម កាក់ គ្រាន់តែបញ្ជាក់ថា លោកមានតួនាទីតូចតាចប៉ុណ្ណោះ។
មន្ត្រីស៊ើបអង្កេតសមាគមសិទ្ធិមនុស្សឈ្មោះ អាដហុក លោក ចាន់ សុវ៉េត បានឲ្យដឹងជុំវិញបញ្ហានេះដូច្នេះ ៖ «អង្គរក្សក៏ដោយ អ្នកណាក៏ដោយ នៅពេលដែលបានប្រព្រឹត្តនូវអំពើហិង្សាដោយអាវុធឬក៏ដោយកម្លាំងកាយរបស់ខ្លួន អាងខ្លួនជាអ្នកមានអំណាច នេះជាអំពើរំលោភសិទ្ធិមនុស្សហើយ»។
សូមជម្រាបថា ក្រុមអង្គរក្សលោកទេសរដ្ឋមន្ត្រី ចម ប្រសិទ្ធ ចំនួន៦នាក់រងការចោទប្រកាន់ពីអ្នកភូមិចាក់ជ្រូកថា បានវាយធ្វើបាបកូនប្រុសអ្នកស្រី កង ស៊ីខែម ឈ្មោះ សំ ភារ៉ាត់ មានអាយុ២២ឆ្នាំ សន្លប់នៅនឹងកន្លែង កូនស្រីឈ្មោះ ចាន់ លិកា អាយុ១៨ឆ្នាំ និងក្មួយស្រី ចាន់ លឿន អាយុជាង៣០ឆ្នាំ អ្នកទាំងពីររបួសធ្ងន់ កាលពីថ្ងៃទី៤ តុលាកន្លងទៅ៕