តំណាងសហគមន៍លោក រម៉ាស់ ណឺន បញ្ជាក់ថា អ្នកភូមិជាអ្នកដើរព្រៃប្រទះឃើញជនជាតិវៀតណាមប្រដាប់ដោយម៉ាស៊ីនកាត់ឈើកាលពីសប្តាហ៍មុននេះ បានឆ្លងចូលផុតខ្សែបន្ទាត់ព្រំដែននៅចន្លោះប៉ុស្តិ៍ការពារព្រំដែនភូមិឡំ និងប៉ុស្តិ៍អូរថ្ម ក្នុងព្រៃជាប់ព្រំដែនចម្ងាយជាង ៦គីឡូម៉ែត្រពីភូមិឡំ និងជិតចំណុចអូរច្រាង ទីដែលអ្នកភូមិធ្លាប់រកឃើញមានការលួចកាប់តាំងពីឆ្នាំ២០០៧រហូតមក។
លោក រម៉ាស់ ណឺន មានប្រសាសន៍ដូច្នេះថា ៖ «គេដើរព្រៃដើរអី គេបណ្ដើរឆ្កែជួបទៅ គេប្រាប់សហគមន៍។ គេចេះតែមកៗអ៊ីចឹងពិបាកដែរ ព្រោះយើងអត់ដឹងនរណាឲ្យមក។ ប៉ូលិសគេព្រងើយកន្តើយ គេអត់រវល់ការងារហ្នឹងផង។ ចូលដីយើងគេកាប់មិនដឹងប៉ុន្មានលើកប៉ុន្មានសាហើយ ចាប់ម្ដងហើយនៅកន្លែងហ្នឹង ប៉ុន្តែគេនៅមកធ្វើទៀត»។
ចំណែកសមាជិកសហគមន៍ម្នាក់ទៀតឈ្មោះ សល់ សត់ បញ្ជាក់ទៀតថា អ្នកលួចកាប់ឈើមិនចូលជ្រៅក្នុងដីខ្មែរដូចមុនទេ ហើយឈើមានតម្លៃជាច្រើនត្រូវគេលួចកាប់បន្ត បន្សល់តែគល់ដែលទើបកាប់ថ្មីៗនៅឡើយ ៖ «យួនកាន់ម៉ាស៊ីន ចម្ងាយគេកាប់ជាប់ៗក្រវាត់ព្រំដែនហ្នឹង»។
ស្នងការរងប៉ូលិសខេត្តរតនគិរីទទួលបន្ទុកការងារព្រំដែនលោក ស៊ូវ៉ាន់ ខាំវ៉ាន់ បដិសេធថា ទីនោះមានការដាក់កម្លាំងឃ្លាំមើលតឹងរ៉ឹង ហើយមិនអាចមានការលួចកាប់បានទៀតទេ អាចជាការភាន់ច្រឡំ ៖ «វាមិនចូលជិតប៉ុស្តិ៍យើងឯណា វាឆ្ងាយពីប៉ុស្តិ៍យើង។ ឥឡូវយើងទប់ហើយ ស្ងាត់ហើយ។ ខ្ញុំដាក់កម្លាំងគ្នាខ្ញុំនៅហ្នឹងទៀត ទៅឃ្លាំមើល ឲ្យតែមាន ចាប់យកមកដាក់ស្នងការតែម្ដង»។
ចំណែកនាយខណ្ឌរដ្ឋបាលព្រៃឈើខេត្តរតនគិរី លោក យូកាន វិមាន មានប្រសាសន៍ដែរថា បទឆ្លងដែនជាសមត្ថកិច្ចរបស់តម្រួតព្រំដែនត្រូវទប់ស្កាត់។ យ៉ាងនេះក្តី លោកថា សហគមន៍គួរផ្តល់ព័ត៌មានបន្ទាន់ទៅមន្ត្រីព្រៃឈើដែលនៅជិតទីតាំងកើតហេតុដើម្បីអន្តរាគមន៍ជួយទប់ស្កាត់ ប្រសិនបើមានបទល្មើសកាប់ឈើក្នុងដីខ្មែរនោះ។
លោក យូកាន វិមាន ថ្លែងដូច្នេះថា ៖ «បងប្អូនប្រជាពលរដ្ឋ ឬក៏កម្លាំងប្រដាប់អាវុធដែលទទួលបានព័ត៌មាននេះ ត្រូវតែរាយការណ៍មកជាបន្ទាន់មកមេព្រៃដែលជិតហ្នឹង ដើម្បីសហការអនុវត្តការងារឬក៏អាចឃាត់ជាបណ្ដោះអាសន្នដើម្បីហៅមន្រ្តីសមត្ថកិច្ចជំនាញគេទៅធ្វើការ»។
ប្រភពសហគមន៍ឲ្យដឹងកាលពីដើមខែឧសភាថា ពួកគាត់ជាអ្នកការពារព្រៃឈើចាប់បានជនជាតិវៀតណាម ៤នាក់ ហើយត្រូវបានអាជ្ញាធរដោះលែងទៅវិញ ដោយគ្មានការផ្តន្ទាទោស ហើយថែមទាំងគាបសង្កត់មកលើអ្នកភូមិទៅវិញ។
យ៉ាងដូច្នេះក៏ដោយ អ្នកភូមិនៅតែបន្តការតវ៉ាដោយរឹបអូសរថយន្តប្រគល់ឲ្យមន្រ្តីព្រៃឈើ និងទាមទារឲ្យមានការផ្តន្ទាទោសជនល្មើសដើម្បីបញ្ឈប់ការលួចកាប់ឈើខ្មែរតទៅទៀត៕