ប្រជាសហគមន៍ស្រុករមាសហែក បួងសួងវត្ថុសក្ដិសិទ្ធិឲ្យជួយការពារព្រៃឈើ
h063012cs.mp3
ពលរដ្ឋក៏សូមឲ្យរដ្ឋាភិបាលជួយចេញប្លង់កម្មសិទ្ធិស្របច្បាប់ សម្រាប់សហគមន៍ពួកគាត់គ្រប់គ្រង និងអាស្រ័យផល។
ប្រជាសហគមន៍ឃុំក្រសាំង ម្នាក់ មកពីភូមិថ្មីឈ្មោះ ប៊ូ សាមុច លោកមានប្រសាសន៍ថា គោលបំណងក្នុងការធ្វើពិធីនេះ គឺចង់បង្ហាញដល់សាធារណជន និងរដ្ឋាភិបាលឲ្យចេញប្លង់កម្មសិទ្ធិលើដីចំនួន ៥០០ហិកតារ សម្រាប់ផលប្រយោជន៍រួមរបស់សហគមន៍លោក៖ «កាលដែលយើងជួបប្រទះគ្រោះ អ្វីដែលគេទាមទារ ឬគេឈូសបំផ្លាញនោះ បងប្អូនប្រជាសហគមន៍យើងទាំងអស់ហ្នឹង បានមកបន់ស្រន់អារុក្ខអារក្ខអ្នកតាព្រៃនេះ ដែលធ្លាប់តែយើងមានជំនឿ គាត់ថាឲ្យនៅសល់ព្រៃនេះទៅ គាត់នឹងធ្វើអាស្រមថ្មឲ្យ ដល់អីចឹងទៅ ឥឡូវដូចថាបានពាក់កណ្ដាលភាគរយ អីចឹងទៅគាត់មកធ្វើអាស្រមថ្មហ្នឹង»។
លោកបញ្ជាក់ថា រដ្ឋាភិបាលគួរតែចាត់មន្ត្រីជំនាញចុះមកពិនិត្យដល់ព្រៃសហគមន៍ផ្ទាល់ ដោយមិនត្រូវជឿលើរបាយការណ៍របស់មន្ត្រីថ្នាក់ក្រោមទេ ព្រោះអាជ្ញាធរមិនសូវអើពើ និងការពារផលប្រយោជន៍របស់ប្រជាសហគមន៍ឡើយ។
ប្រជាសហគមន៍ម្នាក់ទៀតលោកស្រី យោគ សាមី បានបន្ថែមថា ប្រជាសហគមន៍ជាច្រើនរយនាក់ បានរៀបចំពិធីតាំងពីព្រឹកព្រលឹមថ្ងៃទី៣០ ខែមិថុនា ស្ថិតនៅចំណុចព្រៃអ្នកតាឡ ក្នុងភូមិចម្ការគគីរ ឃុំអណ្ដូងត្របែក ស្រុករមាសហែក។ លោកស្រីបន្តថា ប្រជាពលរដ្ឋនៅក្នុងឃុំរបស់គាត់ជឿជាក់ខ្លាំងទៅលើបារមីអ្នកតាឡ និងវត្ថុសក្ដិសិទ្ធិនៅក្នុងព្រៃ ដែលពួកគាត់កំពុងអភិរក្ស៖ «មានផលប្រយោជន៍ណាស់ព្រៃឈើហ្នឹង សម្រាប់ធ្វើជម្រក ជុំរុំអីនៅ គោក្របីអីលែងម៉ាសព្វគ្រប់ សម្រាប់បោចស្បូវចងកណ្ដាប់ យកទៅប្រក់ផ្ទះ ប្រក់សម្បែងអីហ្នឹង»។
វិទ្យុអាស៊ីសេរី មិនអាចទាក់ទងអភិបាលរងស្រុក លោក ឡឹក សារ៉ន និងប្រធានសុរិយោដីស្រុករមាសហែក លោក ម៉ៅ ពុទ្ធី ដើម្បីសុំការបកស្រាយចំពោះការស្នើសុំរបស់ប្រជាពលរដ្ឋ ដែលសុំឲ្យអាជ្ញាធរជួយការពារ និងចេញប្លង់កម្មសិទ្ធិស្របច្បាប់ឲ្យសហគមន៍ពួកគាត់បានទេ នៅថ្ងៃទី៣០ ខែមិថុនា ឆ្នាំ២០១២។
មន្ត្រីសម្របសម្រួល នៃសមាគមន៍ អាដហុក (Adhoc) ប្រចាំខេត្តស្វាយរៀង លោក ប្រាក់ សារ៉ាន់ លោកមានប្រសាសន៍ថា ការធ្វើពិធីរបស់ប្រជាពលរដ្ឋ គឺជាការល្អដែលពួកគាត់ចេះផ្ញើសារ និងបញ្ចេញព័ត៌មានផ្សេងៗឲ្យសាធារណជន និងអាជ្ញាធរបានដឹង ក្នុងគោលបំណងការពារព្រៃឈើ និងសម្បត្តិធម្មជាតិ។
ទោះជាយ៉ាងណា លោកមិនទាន់ដឹងថា អាជ្ញាធរសម្រេចយ៉ាងម៉េចនៅឡើយ ទាក់ទងនឹងដីសហគមន៍នោះ៖ «អានេះអាស្រ័យទៅលើរដ្ឋាភិបាលទេ បើសិនជាលោកមើលឃើញថា គួរតែឲ្យសហគមន៍គ្រប់គ្រងទៅជាការល្អ អាហ្នឹង បើរដ្ឋថាល្អ គួរតែផ្ដល់ទៅសហគមន៍គាត់គ្រប់គ្រង និងអភិរក្សការពារព្រៃឈើហ្នឹងទៅ»។
ប្រជាសហគមន៍ព្រៃឈើឃុំក្រសាំង ចង់ឲ្យអាជ្ញាធរ និងមន្ត្រីជំនាញរបស់រដ្ឋាភិបាលចុះមកពិនិត្យករណីនេះជាបន្ទាន់ និងចេញប្លង់កម្មសិទ្ធិឲ្យសហគមន៍ ដើម្បីទប់ស្កាត់ការកាប់បំផ្លាញព្រៃឈើជាបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
