ពលរដ្ឋ៥០០នាក់នៅស្រុកអង្គស្នួលទាមទារឲ្យតបណ្ដាញអគ្គិសនីរដ្ឋ

ដោយ ជា មករា

2008-06-25

ប្រជាពលរដ្ឋប្រមាណជាង៥០០នាក់នៅក្នុងស្រុកអង្គស្នួល បាននាំគ្នាទាមទារនៅជិតសាលាស្រុកកាលពីថ្ងៃទី២៤ មិថុនានេះ ឲ្យរដ្ឋាភិបាលតបណ្ដាញអគ្គិសនីរដ្ឋជូនពួកគាត់ ដោយលើកឡើងថាបណ្ដាញអគ្គិសនីឯកជនសព្វថ្ងៃមានតម្លៃលើសតំបន់ជិតខាង ។

តំណាងរបស់ប្រជាពលរដ្ឋដែលមកតវ៉ានោះគឺលោក យ៉ង់ ផានី បានមានប្រសាសន៍នៅថ្ងៃពុធថា តម្លៃអគ្គិសនីឯកជននៅក្នុងទីប្រជុំជនអង្គស្នួល ឃុំពើក ស្រុកអង្គស្នួល មានតម្លៃរហូតដល់ទៅ ៣.៥០០រៀលក្នុងមួយគីឡូវ៉ាត់ម៉ោង ហើយថាតម្លៃអគ្គិសនីឯកជននៅក្នុងទីប្រជុំជនផ្សារបែកចាន ដែលមានចម្ងាយពីអង្គស្នួលប្រមាណ ៥គីឡូម៉ែត្រ មានតម្លៃត្រឹមតែ២៦០០រៀលប៉ុណ្ណោះ ។ ចំណែកឯតម្លៃអគ្គិសនីរដ្ឋនៅទីប្រជុំជនផ្សារថ្នល់ទទឹង ដែលមានចម្ងាយពីផ្សារអង្គស្នួលប្រមាណ៥គីឡូម៉ែត្រដែរនោះ មានតម្លៃត្រឹមតែ១.១៥០រៀលតែប៉ុណ្ណោះ ។

លោក យ៉ង់ ផានី បានឲ្យដឹងថា ៖ «គឺថាសាំង ម៉ាស្សូតអីឡើងថ្លៃ ...ពួកខ្ញុំជាប្រជាពលរដ្ឋខ្ញុំទទួលស្គាល់ថាឡើងថ្លៃ ក៏ប៉ុន្តែចុះភ្លើងឯកជននៅផ្សារបែកចាន គេឯកជនដូចយើងដែរហេតុម្ដេចបានគេ ២៦០០ ហេតុម្ដេចបានជាផ្សារអង្គស្នួលយើងដល់ទៅ ៣៥០០ ត្រៀមឡើងដល់៤០០០ទៀត ។ អ៊ីចឹងគាត់អត់មានបកស្រាយឲ្យខ្ញុំទេ តាំងពីលោកអភិបាលស្រុករងហ្នឹងក៏គាត់បានអញ្ជើញមក ហើយខាងភ្លើងអីក៏អត់បានដោះស្រាយដែរ ព្រោះកម្មវិធីនេះគេធ្វើដូចបង្ខំៗ មិនសូវឲ្យប្រជាពលរដ្ឋបញ្ចេញមតិប៉ុន្មានទេ» ។

ឆ្លើយតបទៅនឹងការទាមទាររបស់ប្រជាពលរដ្ឋប្រធានអគ្គិសនីទីប្រជុំជនផ្សារអង្គស្នួល លោក ខឿន សម្បត្តិ បានមានប្រសាសន៍ថាការកំណត់តម្លៃអគ្គិសនីថ្លៃ ៣.៥០០រៀលក្នុងមួយគីឡូវ៉ាត់ម៉ោង គឺដោយសារតែតម្លៃប្រេងឡើងថ្លៃខ្លាំងពេក ។

លោក ខឿន សម្បត្តិ បានបញ្ជាក់ថា ៖ «បើឲ្យខ្ញុំបញ្ចុះទៅទៀត ខ្ញុំបញ្ចុះមិនបានទេដោយសារតម្លៃប្រេងលើទីផ្សារថ្លៃ ។ គ្រាន់ថាបើសិនជាតម្លៃខ្ញុំលក់៣០០០ហ្នឹង ខ្ញុំខាតមួយខែជិត១០០០ដុល្លារហើយ គ្រាន់តែខាត ហើយខ្ញុំទប់ស្កាត់ដើម្បីកុំឲ្យវាជ្រួលច្របល់ដែរ មិនឲ្យមានផលប៉ះពាល់ដល់ប្រជាជនដែរ ហើយឥឡូវនេះខ្ញុំសុំប្រជាជនឡើងប៉ុណ្ណឹង» ។

លោក ខឿន សម្បត្តិ ក៏បានមានប្រសាសន៍ផងដែរថា មូលហេតុដែលតម្លៃអគ្គិសនីក្នុងទីប្រជុំជនផ្សារបែកចាន មានអត្រាទាបជាងគឺដោយសារចំនួនអ្នកប្រើប្រាស់នៅទីប្រជុំជននោះមានចំនួនច្រើនជាងនៅទីប្រជុំជនផ្សារអង្គស្នួល ។

លោកបានបញ្ជាក់ថាចំនួនអ្នកប្រើប្រាស់របស់លោកមានប្រមាណតែជាង ៥០០គ្រួសារតែប៉ុណ្ណោះ ចំណែកឯចំនួនអ្នកប្រើប្រាស់នៅឯទីប្រជុំជនផ្សារបែកចាន មានចំនួនរហូតដល់ជាង ២.០០០គ្រួសារ ។

អគ្គនាយកអគ្គិសនីកម្ពុជា លោក កែវ រតនៈ សុំមិនអត្ថាធិប្បាយជុំវិញការទាមទារឲ្យមានការតបណ្ដាញអគ្គិសនីរដ្ឋនោះឡើយ ដោយលោកមានប្រសាសន៍ថាជាប់រវល់ប្រជុំ ។

តំណាងប្រជាពលរដ្ឋ លោក យ៉ង់ ផានី បានមានប្រសាសន៍ថារហូតមកទល់នឹងពេលនេះ មានប្រជាពលរដ្ឋប្រមាណជាង ១.០០០នាក់រស់នៅក្នុងភូមិចំនួន១៩ នៃឃុំពើក ស្រុកអង្គស្នួល បាននាំគ្នាផ្ដិតមេដៃទាមទារឲ្យមានការតបណ្ដាញអគ្គិសនីរដ្ឋជូនពួកគាត់ ហើយថាប្រជាពលរដ្ឋក៏ធ្លាប់បានដាក់សំណើជូននាយករដ្ឋមន្ត្រី ហ៊ុន សែន ជុំវិញការទាមទារនេះម្ដងរួចមកហើយ ហើយថាគេកំពុងតែរៀបចំឯកសារដាក់ជូនដល់លោកនាយករដ្ឋមន្ត្រី ហ៊ុន សែន អាជ្ញាធរខេត្តកណ្ដាល រដ្ឋមន្ត្រីក្រសួងឧស្សាហកម្ម រ៉ែ និងថាមពល ម្ដងទៀត ដើម្បីទាមទារឲ្យមានដំណោះស្រាយ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព