ស្រ្តីនៅភូមិត្រពាំងអំពិល ឃុំតាភេម សុំមិនប្រាប់ឈ្មោះបានអះអាងថា ប៉ូលិសឃុំបានចុះទៅស្រង់ឈ្មោះគ្រួសារថ្មីដែលទើបរៀបការដើម្បីធ្វើសៀវភៅគ្រួសារឲ្យបែកចេញពីសៀវភៅគ្រួសារ ឪពុកម្តាយ។
អ្នកស្រីថា នៅភូមិត្រពាំងអំពិលប៉ូលិសកំណត់សៀវភៅគ្រួសារថ្មីនោះយកតម្លៃ២១៥០០រៀលក្នុងមួយក្បាល ៖ «...សៀវភៅគ្រួសារថ្មីហ្នឹង គេយក ២១៥០០ (រៀល) បិទរូបថត»។
ស្រ្តីនៅភូមិមហាសេនា ឃុំតាភេម សុំមិនប្រាប់ឈ្មោះដែរអះអាងថា ភូមិគាត់ប៉ូលិសកំណត់សៀវភៅគ្រួសារថ្មីនោះយកតម្លៃតែ១១៥០០រៀលទេ ៖ «ខ្ញុំនៅភូមិ... ១១៥០០រៀល សៀវភៅគ្រួសារ»។
វ័យចាស់ឈ្មោះ ឃីម មានប្រសាសន៍ថា ការកំណត់យកតម្លៃធ្វើសៀវភៅគ្រួសារមិនសមាមាត្រគ្នា ក្នុងឃុំតាភេមតែមួយបានកើតជាបញ្ហាតវ៉ាពីតម្លៃធ្វើសៀវភៅគ្រួសារនោះ ៖ «គេប្រកាសប្រាប់តែម្ដងថា អ្នកបែកថ្មីហ្នឹងគឺ ២១៥០០ ពីព្រោះច្បាប់ចេញមកធ្វើសម្រាប់ប្រជាពលរដ្ឋ តែភូមិខ្លះ ១១៥០០ ភូមិខ្លះ ២១៥០០»។
មេភូមិត្រពាំងអំពិល លោក ពៅ ជឿន មានប្រសាសន៍ថា ពិតជាមានការកំណត់យកតម្លៃធ្វើសៀវភៅគ្រួសារថ្មីដែលមានបិទរូបថតមេគ្រួសារយកតម្លៃក្នុងមួយក្បាល២១៥០០រៀលមែន តែក្នុងភូមិត្រពាំងអំពិល។ ចំណែកភូមិដទៃទៀតប៉ូលិសយកតម្លៃថោកជាង។ លោកថា បញ្ហាកំណត់តម្លៃសៀវភៅគ្រួសារនេះមិនដឹងថាជាបញ្ជាពីថ្នាក់ក្រសួងមហាផ្ទៃឬពីថ្នាក់ណាទេ។
លោក ពៅ ជឿន បានឲ្យដឹងថា ៖ «ខ្ញុំអត់បានពាក់ព័ន្ធជាមួយប៉ូលិសហ្នឹងច្បាស់លាស់ដែរ អាហ្នឹងខ្ញុំកំពុងតែឈឺ ហើយឥឡូវហ្នឹងវាមានប្រតិកម្មនៅនេះ វាពិតមែនហើយ នៅក្នុងភូមិត្រពាំងអំពិលហ្នឹង»។
នាយប៉ុស្តិ៍រដ្ឋបាលឃុំតាភេម លោក អ៊ូច ធី មានប្រសាសន៍ថា លោកបានទទួលបញ្ជាពីអធិការស្រុកត្រាំកក់ ឲ្យចុះទៅធ្វើសៀវភៅគ្រួសារក្នុងឃុំតាភេមមែន។ ចំណែកតម្លៃនោះគឺកំណត់បើធ្វើបណ្ណ័លឿង ហៅតារាងក១ ដល់ក៤ យកថ្លៃ១៥០០រៀល។ បើធ្វើសៀវភៅស្នាក់នៅតម្លៃមួយម៉ឺនរៀលក្នុងមួយក្បាល បើធ្វើសៀវភៅបំបែកគ្រួសារតម្លៃមួយម៉ឺនរៀលថែមទៀត។
លោក អ៊ូច ធី បានបញ្ជាក់ថា ៖ «ខ្ញុំក៏អត់បានដឹងថាយ៉ាងម៉េចដែរ ព្រោះថាខ្ញុំទទួលផែនការត្រឹមអធិការ ២ម៉ឺនហ្នឹងវាសៀវភៅពីរ មិនមែនសៀវភៅតែមួយទេ សៀវភៅស្នាក់នៅមួយ និងសៀវភៅគ្រួសារមួយ»។
វិទ្យុអាស៊ីសេរីមិនអាចទាក់ទងអធិការស្រុកត្រាំកក់និងអាជ្ញាធរស្រុកត្រាំកក់ជម្រាបសួរព័ត៌មាននេះបានទេនៅថ្ងៃអាទិត្យឈប់សម្រាកនេះ។
មន្រ្តីប៉ូលិសឃុំតាភេម លោក អ៊ូច ធី ឲ្យដឹងថា គាត់បានចុះធ្វើការងារនោះទើបបាន៦ភូមិក្នុងឃុំតាភេម ហើយបន្តធ្វើសៀវភៅគ្រួសារនៅភូមិផ្សេងទៀតទាំងជាង២០ភូមិក្នុងឃុំតាភេមនោះ។
ប្រជាជនដែលមានសៀវភៅគ្រួសាររួចហើយបានអះអាងថា ច្រើនឆ្នាំមុនសៀវភៅគ្រួសារប៉ូលិសចុះទៅធ្វើយកតែតម្លៃ៥០០រៀលប៉ុណ្ណោះ៕