បុរសឈ្មោះ សំ បឿន អ្នកភូមិព្រៃឈើទាល ឃុំអង្គរជ័យ ស្រុកអង្គរជ័យ ខេត្តកំពត មានប្រសាសន៍ប្រាប់វិទ្យុអាស៊ីសេរីនៅរសៀលថ្ងៃ២១ វិច្ឆិកា ថា គាត់មានការព្រួយបារម្ភយ៉ាងខ្លាំងដោយពុំដឹងថា តើអាជ្ញាធរភូមិបង្ខំឲ្យគាត់ផ្តិតមេដៃដើម្បីយកទៅធ្វើអ្វីទេ។ គាត់មានមន្ទិលថា ដីធ្លីគាត់អាចនឹងបាត់បង់ដោយសារស្នាមមេដៃនេះ។
លោក សំ បឿន បានឲ្យដឹងថា ៖ «ដីហ្នឹងយើងកាន់កាប់តាំងពី៧៩មក ឥឡូវប្រធានភូមិគេដើរផ្តិតមេដៃ តែខ្ញុំមិនដឹងថា គេផ្ដិតមេដៃហ្នឹងគេមានមូលហេតុអី ហើយចេះតែផ្ដិតគ្រប់គ្នា ចាប់បង្ខំផ្ដិត បើយើងអត់ផ្ដិតគេថាមានរឿងអីថ្ងៃក្រោយគេអត់ដឹងឮទេ គេនិយាយសម្លុតយើងអ៊ីចឹងណា៎។ ឥឡូវប្រជាជនគេឆោឡោថាដីយើងរដ្ឋចង់ដកចង់អី តែមិនដឹងថាអាចរដ្ឋហ្នឹងដកឬអត់»។
ស្ត្រីឈ្មោះ តុប ស៊ី បន្ថែម ៖ «គេអត់មានប្រាប់ថារឿងអីទេ ផ្ដិតឲ្យគេមក គេក៏ផ្តិតដែរ គេប្រធានភូមិហ្នឹង គេមានដីនៅហ្នឹងដែរ ហើយខ្ញុំជឿតាមគេក៏ផ្ដិតឲ្យគេ ខ្ញុំអត់ដឹង ផ្ដិតឲ្យហើយអង្គុយយំនៅហ្នឹង»។
មិនអាចទាក់សុំការពន្យល់ពីប្រធានភូមិព្រៃឈើទាល លោក នាក់ វ៉ន បានទេ នៅថ្ងៃទី២២ វិច្ឆិកានេះ តែមេឃុំអង្គរជ័យ លោក ប៉ា ម៉ុន បានបន្ទោសប្រជាពលរដ្ឋថា បង្កការជ្រួលច្របល់ដោយខ្វះការពិចារណា។
លោក នាក់ វ៉ន បានមានប្រសាសន៍ថា ៖ «មុននឹងផ្ដិតមេដៃឲ្យគេមិនមើលអាទីបនៅខាងលើហ្នឹង គេដាក់ថាយ៉ាងម៉េច? គេពន្យល់ប្រាប់ហើយ ទីបនៅខាងលើហ្នឹងគេដាក់ថាប្រជាពលរដ្ឋដែលកាន់កាប់ដីនៅជុំវិញភ្នំសែនហាន ហើយគាត់មានដកដីគាត់ឯណា»។
អភិបាលស្រុកអង្គរជ័យ លោក យ៉ត យ៉ា បញ្ជាក់ថា ដីដែលប្រជាពលរដ្ឋនៅជុំវិញភ្នំសែនហានកំពុងកាន់កាប់នេះគឺជាដីសហគមន៍ព្រៃឈើរបស់ក្រសួងកសិកម្ម។ ទោះបីជាយ៉ាងនេះក្តី លោកអភិបាលស្រុកថាពុំមានគោលការណ៍ដកហូតពីប្រជាពលរដ្ឋទេ។
លោក យ៉ត យ៉ា បានឲ្យដឹងថា ៖ «ដីហ្នឹងវាមានដីរបស់រដ្ឋទាំងអស់ ដីហាមឃាត់មិនឲ្យប្រជាជនធ្វើ ប៉ុន្តែគាត់ចេះតែធ្វើចេះតែឆ្ការអីអ៊ីចឹងទៅណា៎។ យើងត្រូវតែឲ្យដឹងថា ទំហំដីហ្នឹងប៉ុន្មានហើយប្រជាជនណាកាន់ប៉ុន្មានៗ យើងគ្រាន់តែឲ្យដឹងប៉ុណ្ណឹងទេ គ្មានទៅយករបស់គាត់ទេ ស៊ីញ៉េតាំងពីឆ្នាំ១៩៩៥ ឯកឧត្ដម ជា សុង រដ្ឋមន្ត្រីក្រសួងកសិកម្មធ្វើអភិវឌ្ឍន៍សហគមន៍ព្រៃឈើដីហ្នឹង។ ឥឡូវគេគ្រាន់តែវាស់មើលតើទំហំដីហ្នឹងប៉ុន្មាន...»។
យ៉ាងណាក៏ដោយមន្ត្រីសម្របសម្រួលអង្គការការពារសិទ្ធិមនុស្សអាដហុកប្រចាំខេត្តកំពត អ្នកស្រី ទ្រី ឈូន មានប្រសាសន៍ថា បច្ចុប្បន្នអង្គការអាដហុកកំពុងធ្វើការពង្រឹងប្រជាពលរដ្ឋនៅតំបន់នេះលើវិស័យច្បាប់ភូមិបាលដើម្បីឲ្យពួកគាត់មានទុនសម្រាប់ធ្វើការតវ៉ាតាមផ្លូវច្បាប់ប្រសិនបើមានការរឹបអូសមែននោះ៕