តំណាងអ្នកចូលរួមតវ៉ាម្នាក់ ឈ្មោះលោក អាន ណារិទ្ធ ដែលនិយាយថា លោកចង់ជួបលោកនាយករដ្ឋមន្រ្តី ហ៊ុន សែន រយៈពេល៤ថ្ងៃ កន្លងមកហើយ បានបញ្ជាក់អំពីគម្រោងបន្តរបស់ក្រុមលោកកាលពីព្រឹកថ្ងៃព្រហស្បតិ៍ ទី១១ មិថុនា ដូច្នេះថា ៖ «យើងចាំសំណើថ្មីនេះ ចាំមើលថាតើរដ្ឋាភិបាលសម្រេចយ៉ាងណា។ ក្រោយពីជួបឯកឧត្តម លឹម លាងសែ មក បីថ្ងៃ ថ្ងៃហ្នឹងហើយ ថ្ងៃទី៩ ទី១០ ទី១១ ថ្ងៃហ្នឹងហើយ។ មកទល់ថ្ងៃនេះមិនទាន់ចេញលទ្ធផលអីទេ។ បើមិនបានជួបទេ យើងនៅតែរង់ចាំរហូតទាល់តែបានជួប ហើយនិងមានគម្រោងទៅមុខរដ្ឋសភានិងទីស្តីការគណៈរដ្ឋមន្រ្តីនិងផ្ទះឯឧត្តម សុខ អាន ដើម្បីទាមទារឲ្យបានចម្លើយ»។
លោក អាន ណារិទ្ធ និយាយថា អ្នកភូមិបន្ថែមទៀត នឹងមកចូលរួមការតវ៉ានេះ ហើយលោកបញ្ជាក់បន្ថែមអំពីការបន្តការតវ៉ានៅក្រុងភ្នំពេញដូច្នេះថា ៖ «យើងទៅដោយថ្មើរជើង និងទាមទារដោយសន្តិវិធី មិនប្រើអំពើហិង្សាអីទេ។ ខ្ញុំនៅតែមានសង្ឃឹមជឿជាក់ជានិច្ចលើរដ្ឋាភិបាល ព្រោះខ្ញុំជឿថា រដ្ឋាភិបាលមិនបោះបង់ចោលប្រជាពលរដ្ឋក្រីក្រទេ លោកគង់នឹងដោះស្រាយឲ្យ»។
លោក ហ៊ុយ ហ៊ត ជាអ្នកតវ៉ាម្នាក់ទៀត បញ្ជាក់បន្ថែមដូច្នេះ ៖ «បើសិនជាដល់ហ្នុងមិនបានសម្រេចទៀត យើងនឹងសុំអង្គការបើកវេទិកាសាធារណៈមួយនៅស្រុកស្ទឹងត្រង់»។
លោក លឹម លាងសែ នាយរងខុទ្ទកាល័យរបស់លោកនាយករដ្ឋមន្រ្តី ហ៊ុន សែន ទទួលបន្ទុកប្រធានក្រុមដោះស្រាយវិវាទដីធ្លី ដែលជួបក្រុមអ្នកតវ៉ានិងទទួលសំណើរបស់ពួកគាត់នោះ បានបញ្ជាក់ប្រាប់វិទ្យុអាស៊ីសេរី នៅល្ងាចថ្ងៃទី១១ មិថុនា ដូច្នេះថា ៖ «ខ្ញុំគ្រាន់តែទទួល ហើយខ្ញុំបញ្ជូនទៅគណៈកម្មការអវិនិយោគ ឲ្យដោះស្រាយព្រោះសមត្ថកិច្ចរបស់គាត់។ ដំណោះស្រាយយ៉ាងណាៗ លោកទូរស័ព្ទសួរខាងណោះទៅ»។
លោក ចាន់ តុងអ៊ីវ តំណាងគណៈកម្មការអវិនិយោគនៃក្រសួងកសិកម្ម រុក្ខាប្រមាញ់ និងនេសាទ ថ្លែងថា បញ្ហានេះខាងក្រុមជំនាញបានចុះទៅដោះស្រាយនៅមូលដ្ឋាននោះហើយៗ មានអ្នកស្រុកជាច្រើនបានចូលរួមសហការ។ ចំពោះអ្នកតវ៉ានៅភ្នំពេញ លោកសំណូមពរឲ្យពួកគាត់ត្រឡប់មូលដ្ឋានវិញ ហើយប្រកាសអំពីដីរបស់ខ្លួនដល់ក្រុមជំនាញដែលកំពុងដោះស្រាយនោះ។
សូមរំឭកឡើងវិញថា រឿងទំនាស់ដីធ្លីនៅបឹងកេតនេះ មានអាយុកាល ១៨ខែហើយ បន្ទាប់ពីរដ្ឋាភិបាលកម្ពុជាសម្រេចផ្តល់ការវិនិយោគលើផ្ទៃដីចម្ការកៅស៊ូចំនួន ៧.៣១៣ហិកតារទៅឲ្យក្រុមហ៊ុនឡុងស្រេងធ្វើការវិនិយោគមក ដែលក្នុងនោះ មានផ្ទៃដីចំនួន ១.៤៦៨ហិកតារ ត្រូវអ្នកតវ៉ាអះអាងថា ជាដីដែលអ្នកស្រុកចំនួន ៧១០គ្រួសារកាន់កាប់ចាប់តាំងពីឆ្នាំ១៩៧៩មក៕