តំណាងសហគមន៍ លោក ខៃ ខាវ មានប្រសាសន៍បញ្ជាក់ថា កាលពីថ្ងៃសុក្រ ទី១២ ខែកុម្ភៈ ឆ្នាំ២០១០ថា បុរសជាអ្នកភូមិជាមួយគ្នាឈ្មោះ ជាង ថៃ ជាអ្នកលាក់ឈើខុសច្បាប់បានមកដល់ផ្ទះលោក ហើយបោះពាក្យសម្ដីប្រមាថក្នុងន័យគំរាមមកលើអ្នកភូមិ ៖ «គេមកគំរាម គេថា បើខ្លាំងធ្វើទៀតមើល៍!»។
តំណាងសហគមន៍ម្នាក់ទៀត លោក ឡា ប៊ុនប៉េង មានប្រសាសន៍ថា នេះគឺជាសកម្មភាពអាងអំណាច ៖ «នេះជាការគំរាមពិតប្រាកដ ធ្វើខុសហើយមកគំរាមទៀត»។
កាលពីថ្ងៃព្រហស្បតិ៍(១១ កុម្ភៈ)កន្លងទៅនេះ ក្រុមសហគមន៍មានគ្នាជាង១០នាក់រួមជាមួយសកម្មជនសមាគមអាដហុក និងអ្នកយកព័ត៌មានវិទ្យុអាស៊ីសេរីបានទៅដល់ទីតាំងលាក់ឈើប្រណីតនាងនួនជាច្រើនគំនរដែលគេអារជាបួនជ្រុង មានមុខកាត់ពី២០ទៅ៣០សង់ទីម៉ែត្រ បណ្តោយ២,២០ម៉ែត្រ មានចំនួន១៥៧ដើម លាក់ក្រោមមែកឈើក្នុងព្រៃមួយចម្ងាយ២៥០ម៉ែត្រ ខាងកើតក្រៅផ្លូវចូលបរិវេណក្រុមហ៊ុនសម្បទានសេដ្ឋកិច្ចគិរីអភិវឌ្ឍន៍ចម្ងាយពីផ្ឡូវចូលក្រុមហ៊ុនប្រមាណមួយគីឡូម៉ែត្រ។
វិទ្យុអាស៊ីសេរីមិនអាចទាក់ទងតាមទូរស័ព្ទលោក ជាង ថៃ ដែលសហគន៍ចោទប្រកាន់ដើម្បីបំភ្លឺករណីនេះបានទេនៅថ្ងៃសៅរ៍នេះ ដោយអ្នកទទួលទូរស័ព្ទលោកប្រាប់ថាលោកមិននៅផ្ទះ។
កាលពីថ្ងៃព្រហស្បតិ៍ (១១ កុម្ភៈ) ខណៈក្រុមមន្ត្រីព្រៃឈើកំពុងរឹបអូសឈើដែលអ្នកភូមិរកឃើញលាក់ក្នុងព្រៃ លោក ឡុង ថៃ និងបក្ខពួកមានគ្នាសរុប៤នាក់ បានមកកាន់ទីកើតហេតុហើយអះអាងថា ឈើនោះជារបស់ពួកគេលាក់ទុកបន្ទាប់ពីពួកគេបានចំណាយប្រាក់១.៨០០ដុល្លារសូកប៉ាន់ឲ្យទៅក្រុមសមត្ថកិច្ចនៅមូលដ្ឋាននិងក្រុមសមត្ថកិច្ចមកពីថ្នាក់ជាតិ ដែលបានចាប់ឈើនោះម្តងរួចហើយកាលពីសប្តាហ៍មុន ៖ «ឈើហ្នឹងគេចាប់ម្ដងហើយកាលពីថ្ងៃមុនអស់១.៨០០(ដុល្លារ)ហើយ ហើយគេយកមកលាក់នៅហ្នឹងកុំឲ្យឃើញ។ មិនមែនថាមិនបង់មិនអីទេ បង់ដូចតែគ្នាហ្នឹង»។
អភិបាលស្រុកវ៉ឺនសៃ លោក ជុំ ងិល មានប្រសាសន៍ថា ក្រុមសហគមន៍បានផ្តល់របាយការណ៍ពីការគំរាមប្រមាថពីម្ចាស់ឈើនោះហើយ ៖ «មានភស្តុតាងគ្រប់គ្រាន់អាហ្នឹងចោទប្ដឹងតាមផ្លូវច្បាប់ទៅ ព្រោះវាល្មើសច្បាប់ហើយមកគំរាមយ៉ាងម៉េច»។
កាលពីថ្ងៃព្រហស្បតិ៍ (១១ កុម្ភៈ) មន្ត្រីព្រៃឈើបានធ្វើការដឹកជញ្ជូនឈើដែលរឹបអូសបាននោះជិត៨០ដើមមករក្សាទុកនៅស្នាក់ការផ្នែករដ្ឋបាលព្រៃឈើប្រចាំស្រុកវ៉ឺនសៃ ហើយឈើនៅសល់ក្នុងព្រៃប្រមាណ៨០ដើមទៀតត្រូវគេលួចដឹកជញ្ជូនយកចេញទៅបាត់ដោយសារតែមន្ត្រីព្រៃឈើមិនអាចទទួលខុសត្រូវរកអ្នកយាមការពារឈើនោះបាន។
អ្នកសម្របសម្រួលសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ថា អ្នកភូមិស្គាល់អត្តសញ្ញាណម្ចាស់ឈើអស់ហើយ ដូច្នេះវាអាស្រ័យលើឆន្ទៈរបស់មន្ត្រីពាក់ព័ន្ធដែលត្រូវសើបអង្កេតទៅលើម្ចាស់ឈើដែលប្រើអំណាចគំរាមសហគមន៍និងអនុវត្តឲ្យមានប្រសិទ្ធភាពក្នុងការទប់ស្កាត់បទល្មើសព្រៃឈើ ហើយចាត់វិធានការដាក់ទោសទណ្ឌចំពោះអ្នកប្រព្រឹត្តខុស៕