ការអះអាងនេះ កើតមានបន្ទាប់ពីអាជ្ញាធរខេត្តក្រចេះ បានដាក់គ្រឿងចក្រឈូសឆាយដីលំនៅឋាន និងដីស្រែចំការបង្កបង្កើនផលរបស់ពួកគាត់ ទាំងមិនទាន់មានសំណង ឬប្រាប់ពលរដ្ឋឲ្យដឹងជាមុន។
បុរសវ័យចំណាស់ឈ្មោះ អុំ កាន ស្ថិតក្នុងចំណោមប្រជាពលរដ្ឋជិត ១០០នាក់ តំណាងឲ្យពលរដ្ឋរាប់រយគ្រួសារ រស់នៅឃុំសណ្តាន់ និងឃុំក្បាលដំរី ស្រុកសំបូរ ខេត្តក្រចេះ។ លោកបានអះអាងនៅព្រឹកថ្ងៃទី២៦ ខែមករា ថា ពលរដ្ឋក្នុងមូលដ្ឋាននេះមានគំរោងបិទផ្លូវជាតិលេខ៧ ត្រង់ចំណុចឃុំក្បាលដំរី និងឃុំសណ្តាន់ ដើម្បីទាមទារឲ្យស្ថាប័នពាក់ព័ន្ធជួយរកដំណោះស្រាយលើករណីរំលោភដីធ្លី។
ក្រុមប្រជាពលរដ្ឋដែលបានប្រមូលផ្តុំគ្នា បានសំណូមពរទៅលោកនាយករដ្ឋមន្ត្រី ហ៊ុន សែន និងថ្នាក់ដឹកនាំស្ថាប័នកំពូល ឲ្យជួយរកដំណោះស្រាយលើករណីដែលអាជ្ញាធរខេត្តក្រចេះ គ្រោងរឹបអូសយកដីលំនៅឋាន និងដីស្រែចំការដែលពួកគាត់អះអាងថា ប្រជាពលរដ្ឋធ្លាប់បង្កបង្កើនផល តាំងពីឆ្នាំ១៩៩៥ ទៅសង់គ្រឹះស្ថានអប់រំថ្នាក់ឧត្ដមសិក្សា។
ចំណែកស្ត្រីមេម៉ាយឈ្មោះ អ៊ូ អេង ស្ថិតក្នុងចំណោមពលរដ្ឋច្រើននាក់ទៀត បានសម្រក់ទឹកភ្នែក និងរៀបរាប់ទាំងអួលដើមកថា ក្តីបារម្ភពីការបាត់បង់ដីលំនៅឋាន និងដីកសិកម្ម បានរុញច្រានឲ្យកូនៗចំនួនពីរនាក់របស់គាត់ បង្ខំចិត្តឈប់រៀន។ ស្រីរូបនេះបានទទូចទៅប្រមុខដឹកនាំជួយអន្តរាគមន៍។
ក្រុមប្រជាពលរដ្ឋបានសំណូមពរទៅអាជ្ញាធរខេត្ត ឬក៏រដ្ឋាភិបាលថា មុននឹងជ្រើសយកទីតាំងណាមួយធ្វើការអភិវឌ្ឍន៍ ត្រូវពិគ្រោះជាមួយពលរដ្ឋក្នុងមូលដ្ឋានពីផលប៉ះពាល់ឲ្យបានឯកភាពគ្នាជាមុន ដោយមិនគួរលួចដាក់គ្រឿងចក្រឈូសឆាយរំលោភយកនោះទេ។
ទាក់ទងបញ្ហានេះ លោក អ៊ុន ចាន់តូ ជាជំទប់ទី១ ឃុំក្បាលដំរី ស្រុកសំបូរ ខេត្តក្រចេះ។ លោកមានប្រសាសន៍ថា ក្តីបារម្ភរបស់ពលរដ្ឋពីករណីបាត់បង់ដីធ្លីនាមូលដ្ឋានលោក មន្ត្រីជំនាញខេត្តក្រចេះ កំពុងចុះស្រង់ចំនួនគ្រួសារដែលរងផលប៉ះពាល់នេះហើយ ដើម្បីឲ្យថ្នាក់ដឹកនាំខេត្តរកដំណោះស្រាយជូនពលរដ្ឋ។
វិទ្យុអាស៊ីសេរីមិនអាចទាក់ទងលោក ខាំ ភឿន អភិបាលខេត្តក្រចេះ ដើម្បីបំភ្លឺចំពោះការតវ៉ានេះបានទេ នៅរសៀលថ្ងៃទី២៦ ខែមករា ឆ្នាំ២០១២។ ប៉ុន្តែលោក ចាន់ សារឿន ជាមន្ត្រីមន្ទីររៀបចំដែនដីនគររូបនីយកម្ម សំណង់ និងសុរិយោដី ខេត្តក្រចេះ មានប្រសាសន៍ថា ទំនាស់កើតមានលើគំរោងសង់គ្រឹះស្ថានថ្នាក់ឧត្ដមសិក្សានាឃុំសណ្ដាន់ និងឃុំក្បាលដំរី នាស្រុកសំបូរ មន្ត្រីជំនាញលោកកំពុងចុះស្រង់ស្ថិតិគ្រួសារពលរដ្ឋរងផលប៉ះពាល់ ដើម្បីមានវិធានការដោះស្រាយ។
ទោះយ៉ាងណា ក្រុមប្រជាពលរដ្ឋបានអះអាងថា កាលពីសប្ដាហ៍មុន អាជ្ញាធរខេត្តក្រចេះ បាននាំយកគ្រឿងចក្រទៅឈូសឆាយព័ទ្ធយកដីចំការបង្កបង្កើនផលរបស់ពួកគាត់ម្តងហើយ ដោយមិនប្រាប់ដំណឹងឲ្យពលរដ្ឋក្នុងមូលដ្ឋានដឹងទេ ប៉ុន្តែត្រូវដកថយវិញ បន្ទាប់ពីពលរដ្ឋជួបជុំគ្នាតវ៉ារួចមក៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។