ប្រជាពលរដ្ឋជាជនជាតិចាម នៅទីនោះ ភាគច្រើនទាមទារឲ្យបោះឆ្នោតជ្រើសរើសហាកឹម ឬអ្នកដឹកនាំភូមិផ្នែកសាសនាថ្មីនៅឃុំនេះ។
បុរសអ្នកភូមិឈ្មោះ សេន ត្រយេន អាយុ ៣១ឆ្នាំ ជាជនជាតិចាម រស់នៅក្នុងឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង គាត់បានឲ្យដឹងនៅព្រឹកថ្ងៃទី៣០ ខែវិច្ឆិកា ថា លោក លី ម៉ាត់ ដោយអាងថាខ្លួនជាហាកឹម បានប្រើអំពើហិង្សាមកលើគ្រួសារលោក ព្រមទាំងអ្នកភូមិផ្សេងទៀតទាំងកំរោល ដោយបានបង្គាប់ឲ្យកូនចៅគាត់គប់កាំបិតមកលើរូបលោក បណ្ដាលឲ្យត្រូវរបួសក្បាលជាទម្ងន់។
លោក សេន ត្រយេន៖ «ឲ្យប្រជាពលរដ្ឋជឿទុកចិត្តម៉េចកើត បើមេដឹកនាំអីមានបញ្ហាបន្តិចបន្តួច ហាឡើងប្ដឹងប្រជាពលរដ្ឋដាក់គុក ហាឡើងដុតផ្ទះប្រជាពលរដ្ឋចោល។ អ៊ីចឹង បានជាប្រជាពលរដ្ឋអត់ជឿលើការដឹកនាំរបស់គាត់ ទើបគេចង់ផ្លាស់ប្ដូរអ្នកដឹកនាំ។ ដល់គេទារផ្លាស់ប្ដូរអ្នកដឹកនាំ គាត់មានគំនុំ គាត់ប្រកូនក្មួយគាត់ប្រើហិង្សាលើប្រជាពលរដ្ឋ»។
កាលពីថ្ងៃទី៤ ខែវិច្ឆិកា ប្រជាពលរដ្ឋជនជាតិចាម នៅឃុំឆ្នុកទ្រូ ចំនួន ៨៤នាក់ បាននាំគ្នាផ្ដិតមេដៃប្ដឹងតវ៉ាទៅមន្ទីរធម្មការស្រុកបរិបូណ៌ សុំដកមេដឹកនាំវិហារចាម ក្នុងឃុំនេះ ដោយពួកគាត់ចោទលោក លី ម៉ាត់ ជាមេដឹកនាំសាសនាវិហារចាម នៅកោះមនោ ឃុំឆ្នុកទ្រូ ថាពុករលួយ និងបក្ខពួកនិយម។ ពួកគាត់សុំធ្វើការបោះឆ្នោតជ្រើសរើសហាកឹមថ្មី តែមន្ត្រីការិយាល័យធម្មការស្រុកបរិបូណ៌ មិនព្រម ទើបកើតចេញជាអំពើហិង្សាបែបនេះឡើង។
លោក សាន់ ហ៊ូសេន ជាព្រឹទ្ធាចារ្យជាជនជាតិចាម ម្នាក់ ប្រចាំតំបន់កោះមនោ ឃុំឆ្នុកទ្រូ លោកមានប្រសាសន៍ថា ការអូសបន្លាយមិនរកដំណោះស្រាយជម្លោះនេះ នឹងអាចនាំទៅដល់ជម្លោះបង្ហូរឈាមគ្នាកាន់តែធ្ងន់ធ្ងរជាងនេះជាមិនខាន៖ «អត់កើតទេ ធ្វើហាកឹម បែបនេះ មិនត្រឹមត្រូវទេ។ អត់មានការបោះឆ្នោត ហើយចាត់តាំងយកតែម្ដងបែបនេះ មិនកើតទេ។ ម្យ៉ាងរឿងយកលុយធ្វើវិហារទៅចាយវាយផ្ដេសផ្ដាសអ៊ីចឹង អត់បានទេ។ បាបណាស់ ហើយបើធ្វើហាកឹម ហើយគេមិនគាំទ្រនោះ ក៏វាអត់កើតដែរ»។
យ៉ាងនេះក្ដី ហាកឹមវិហារចាមកោះមនោ លោក លី ម៉ាត់ បានបដិសេធរាល់ការចោទប្រកាន់របស់អ្នកភូមិ។ លោកពន្យល់ថា ថ្នាក់លើបានចាត់តាំងលោកឲ្យធ្វើហាកឹមនៅវិហារកោះមនោ នេះ ពុំមែនលោកឡើងធ្វើដោយចិត្តឯងនោះឡើយ៖ «ខ្ញុំមិនចង់ពន្យល់អីច្រើនទេ ព្រោះរឿងវាចប់អស់ទៅហើយ គេចេះតែចោទខ្ញុំទេ មិនមានរឿងអ៊ីចឹងទេ»។
វិទ្យុអាស៊ីសេរី ព្យាយាមទាក់ទងសុំការពន្យល់ពីលោក សុះ កំរ៉ី ប្រធានគណៈដឹកនាំជាន់ខ្ពស់សាសនាឥស្លាម នៅកម្ពុជា តាមទូរស័ព្ទជាច្រើនដង នៅល្ងាចថ្ងៃទី៣០ ខែវិច្ឆិកា នេះ ទូរស័ព្ទរោទ៍តែគ្មានអ្នកទទួល។
យ៉ាងនេះក្ដី មេឃុំឆ្នុកទ្រូ លោក សំរិទ្ធ ផេង មានប្រសាសន៍ថា អាជ្ញាធរឃុំមិនអាចដោះស្រាយបញ្ហានេះបានទេ។ លោកថា មានតែគណៈដឹកនាំជាន់ខ្ពស់នៃសាសនាឥស្លាមនៅកម្ពុជា គឺលោក សុះ កំរ៉ី និងមន្ទីរធម្មការខេត្តទេ ដែលអាចដោះស្រាយជម្លោះនេះបាន៖ «ពួកគាត់ចង់ធ្វើការបោះឆ្នោតជ្រើសរើសមេដឹកនាំពួកគាត់ ទោះអ្នកណាជាប់ក៏គាត់អស់ចិត្ត តែខាងអ៊ីម៉ាំខេត្ត និងខាងមន្ទីរធម្មការខេត្ត គេថាមិនទាន់ដល់អាណត្តិ មិនទាន់អាចបោះឆ្នោតបានទេ ចាំដល់អាណត្តិសិន»។
ប្រភពពីជនជាតិចាម នៅឃុំឆ្នុកទ្រូ បានឲ្យដឹងថា លោក លី ម៉ាត់ ឡើងកាន់ការជាហាកឹម ឬអ្នកដឹកនាំភូមិផ្នែកសាសនានៅឃុំនេះ ដោយការចាត់តាំងតាមរយៈសែស្រឡាយ និងបក្ខពួក ពុំមែនជាប់ដោយការបោះឆ្នោតតាមបែបផែននៃការដឹកនាំសាសនាឥស្លាមនោះឡើយ។ ពួកគាត់ចង់ឲ្យរឿងរ៉ាវនេះបានដឹងដល់លោក សុះ កំរ៉ី ប្រធានគណៈដឹកនាំជាន់ខ្ពស់នៃសាសនាឥស្លាមនៅកម្ពុជា ទើបពួកគាត់អស់ចិត្ត ព្រោះពួកគាត់មិនយល់ព្រមចំពោះការសម្របសម្រួលរបស់ការិយាល័យធម្មការស្រុកនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។