ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (CCAWDU) លោក អាត់ ធន់ នៅថ្ងៃទី២៦ ខែកក្កដា បានចោទសមត្ថកិច្ចរដ្ឋាភិបាលថា បានប្រើអំណាចរបស់ខ្លួនបង្ក្រាបទៅលើក្រុមកម្មករដែលប្រមូលផ្ដុំគ្នាទាមទារសិទ្ធិការងារស្របច្បាប់។ លោកថ្កោលទោសចំពោះការប្រើហិង្សាមកលើកម្មករ និងសកម្មជនសហជីពរបស់សមត្ថកិច្ច ដោយសារពួកគេតវ៉ាលក្ខខណ្ឌការងារល្អប្រសើរនោះ។
លោក អាត់ ធន់ អះអាងថា ៦ខែដើមឆ្នាំ២០១២ សមត្ថកិច្ចបានប្រើអំពើហិង្សាបង្ក្រាបមកលើក្រុមកម្មករ កើតមានគួរឲ្យព្រួយបារម្ភ។ ហើយថា ទង្វើនេះអាចនាំឲ្យប៉ះពាល់ដល់ការនាំចេញសម្លៀកបំពាក់ពីកម្ពុជា ទៅក្រៅប្រទេសនាថ្ងៃអនាគត។ លោកថា បើអាជ្ញាធរបន្តប្រើហិង្សាបង្ក្រាបការប្រមូលផ្ដុំរបស់ក្រុមកម្មករ និងមិនបានជួយរកយុត្តិធម៌ជូនកម្មករដើម្បីទាមទារសិទ្ធិស្របច្បាប់ទេ សហជីពលោកនឹងត្រៀមផ្ញើជូនសហគមន៍អន្តរជាតិ ពិសេសប្រទេសបញ្ជាទិញសម្លៀកបំពាក់ពីកម្ពុជា ឲ្យបានជ្រាបព័ត៌មាននេះ។
លោក អាត់ ធន់ ឲ្យដឹងដូច្នេះ៖ «ជាសកម្មភាពមួយដែលយើងមើលឃើញមិនល្អ គឺក្រោយពេលមានរឿងហើយវាគួរតែអាជ្ញាធរជួយសម្របសម្រួលដោះស្រាយ មិនគួរយកចិត្តទុកដាក់ ឬក៏ទៅជួយការពារក្រុមហ៊ុនច្រើនជាងទេ ហើយដោយសារតែអំណាចរបស់ខ្លួន កម្មករត្រូវបានបង្ក្រាបទៀត វាបង្ហាញ បញ្ជាក់ឲ្យឃើញថា អាជ្ញាធរជួយខាងក្រុមហ៊ុន។ អ៊ីចឹងអាចមានពាក់ព័ន្ធផលប្រយោជន៍ស្អីបានជាមិនជួយដល់កម្មករ។ ប្រហែលជាឥទ្ធិពលទឹកប្រាក់ ឬមួយយ៉ាងម៉េចបានជាសមត្ថកិច្ចធ្វើទង្វើដូច្នេះ។ ការធ្វើបែបហ្នឹងគឺបញ្ជាក់ឲ្យឃើញថា នៅក្នុងចលនាការងារ ការអនុវត្ត គឺមិនបានស្នើភាពគ្នាចំពោះមុខច្បាប់ទេ»។
សេចក្ដីថ្លែងការណ៍ចុះថ្ងៃទី២៥ ខែកក្កដា ឆ្នាំ២០១២ របស់សហជីពស៊ីខាវឌូ បានបង្ហាញថា រយៈពេល ៣សប្ដាហ៍ ដើមខែកក្កដា ឆ្នាំ២០១២ មានការប្រើអំពើហិង្សា និងការគំរាមកំហែង ៤ករណី មកលើកម្មករ និងសកម្មជនសហជីព ស៊ីខាវឌូ បណ្ដាលឲ្យរបួសធ្ងន់។
លោកថា រូបភាពប្រើអំពើហិង្សាមានដូចជា មានក្រុមជើងកាង និងសន្តិសុខក្រុមហ៊ុនវាយមកលើកម្មករ សកម្មជនសហជីព ដែលធ្វើកូដកម្មទាមទារលក្ខខណ្ឌការងារ ឬធ្វើដំណើរតាមផ្លូវជាដើម ប៉ុន្តែសមត្ថកិច្ចមិនបានជួយរកយុត្តិធម៌ទេ។
មិនខុសគ្នាទេ លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ បានឲ្យដឹងថា សកម្មភាពវាយបង្ក្រាបដោយហិង្សារបស់សមត្ថកិច្ចរដ្ឋាភិបាលទៅលើក្រុមកម្មករ ៦ខែដើមឆ្នាំ២០១២ មានរូបភាពធ្ងន់ធ្ងរ។
លោកបន្តថា សកម្មភាពប្រើហិង្សារបស់សមត្ថកិច្ច អាចនាំឲ្យប៉ះពាល់ដល់វិស័យកាត់ដេរកម្ពុជា លើឆាកអន្តរជាតិ ទៅថ្ងៃខាងមុខ បើអាជ្ញាធរបន្តប្រើកម្លាំងវាយបង្ក្រាបកម្មករក្នុងការប្រមូលផ្តុំទាមទារលក្ខខណ្ឌការងារស្របច្បាប់ទៀតនោះ។
លោក រ៉ុង ឈុន បន្ថែម៖ «ជុំវិញកម្លាំងសមត្ថកិច្ច អាជ្ញាធរខេត្ត ក្រុង ប្រើកម្លាំងមកបង្ក្រាបយ៉ាងកំរោលមកលើក្រុមកម្មករមានសន្ទុះកើនឡើងយ៉ាងខ្លាំង ហើយសាហាវឃោរឃៅថែមទៀតផង។ មិនមែនគ្រាន់តែយកខែលមកច្រាននោះទេ គឺថែមទាំងប្រើអំពើហិង្សាបាញ់ប្រហារទៅលើកម្មករ វាយតំណាងសហជីពឲ្យរងរបួសធ្ងន់យកទៅឃុំខ្លួន។ នេះជាសញ្ញាអាក្រក់របស់កម្ពុជា កាន់តែអាក្រក់ទៅៗ»។
លោកបានស្នើឲ្យសមត្ថកិច្ចបញ្ឈប់សកម្មភាពប្រើហិង្សាតាមគ្រប់រូបភាពមកលើកម្មករ និងមន្ត្រីសហជីព ហើយត្រូវងាកមកជំរុញឲ្យថៅកែរោងចក្រពន្លឿនដោះស្រាយវិវាទការងារជូនកម្មករឲ្យស្របតាមច្បាប់ការងារ ជាជាងឃុបឃិតគ្នាជាមួយឈ្មួញប្រើអំពើហិង្សាលើកម្មករ និងសកម្មជនសហជីព។
ទាក់ទងបញ្ហានេះ លោ ទូច ណារ៉ុថ ស្នងការនគរបាលរាជធានីភ្នំពេញ ធ្លាប់បានឲ្យដឹងថា អាជ្ញាធរបង្ក្រាប ឬទប់ស្កាចំពោះការជួបជុំ ឬក្បួនដង្ហែណាមួយដែលគ្មានច្បាប់អនុញ្ញាត ឬធ្វើឲ្យប៉ះពាល់ដល់សណ្ដាប់ធ្នាប់សាធារណៈ គឺមិនបានឃុបឃិតជាមួយឈ្មួញដូចការចោទរបស់មន្ត្រីសហជីពកម្មករនោះទេ។
យ៉ាងនេះក្តី មេដឹកនាំសហជីពការពារសិទ្ធិកម្មករ នៅតែអះអាងថា អាជ្ញាធរជានិច្ចកាលហាក់មានសកម្មភាពគាំទ្រនិយោជក ឬថៅកែក្រុមហ៊ុន ហើយបានប្រើអំណាចវាយបង្ក្រាបកម្មករដែលទាមទារសិទ្ធិ ឬលក្ខខណ្ឌការងារស្របច្បាប់ទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។