មេបញ្ជាការនៃកងនាវាទី៧ របស់សហរដ្ឋអាមេរិក គឺលោកឧត្ដមនាវីឯក ស្កុត វ៉ាន់ ប៊ូសស្គើក (Scott Van Buskirk) បានមកដល់ប្រទេសកម្ពុជា នៅថ្ងៃទី ៣ ខែសីហា ឆ្នាំ ២០១១ ដើម្បីបំពេញទស្សនកិច្ចរយៈពេល ២ ថ្ងៃ ដើម្បីរឹតចំណងទាក់ទងក្នុងវិស័យយោធារវាងកម្ពុជា ជាមួយនិងសហរដ្ឋអាមេរិក។
មានមន្ត្រីយោធាកងទ័ពជើងទឹកអាមេរិកចំនួន ៧ រូប បានអមដំណើរលោកឧត្ដមនាវីឯក លោក ស្កុត វ៉ាន់ ប៊ូសស្គើក មកកាន់ទីក្រុងភ្នំពេញ តាមជើងយន្តហោះពិសេស។
លោកឧត្ដមនាវីឯក ស្កុត វ៉ាន់ ប៊ូសស្គើក មានប្រសាសន៍ប្រាប់អ្នកកាសែត នៅឯអាកាសយានដ្ឋានអន្តរជាតិភ្នំពេញ នៅថ្ងៃទី ៣ ខែសីហាថា នេះជាឱកាសលើកទី១ របស់លោកមកបំពេញទស្សនៈនៅកម្ពុជា។
លោកបន្តថា ៖ «យើងបានធ្វើការហ្វឹកហាត់រួមគ្នាជាច្រើនកន្លងមក។ យើងមានឱកាសល្អមកទីនេះ ដើម្បីពិភាក្សាអំពីអ្វីដែលយើងនឹងបន្តធ្វើរួមគ្នានៅថ្ងៃអនាគត។ យើងនឹងបន្តពង្រឹងសហប្រតិបត្តិការជាមួយគ្នា លើវិស័យកងទ័ពជើងទឹកបន្តទៀត»។
អ្នកនាំពាក្យក្រសួងការពារជាតិកម្ពុជា លោកឧត្ដមសេនីយ៍ឯក ឈុំ សុជាតិ មានប្រសាសន៍ថា ចំណងទាក់ទងវិស័យយោធាកម្ពុជា ជាមួយនិងសហរដ្ឋអាមេរិក កាន់តែរីកចំរើន និងរឹងមាំ
នៅពេលនេះ។
លោក ឈុំ សុជាតិ ៖ «កងទ័ពអាមេរិកកន្លងមកនេះ បានបញ្ជូនគណៈប្រតិភូជាន់ខ្ពស់ជាច្រើន មកទស្សនកិច្ចនៅកម្ពុជា បង្កើននូវកិច្ចសហប្រតិបត្តិការរវាងកងទ័ពកម្ពុជា និងសហរដ្ឋអាមេរិកកាន់តែមានភាពល្អប្រសើរថែមទៀតបាទ»។
អ្នកវិភាគឯករាជ្យនៅកម្ពុជា លោកបណ្ឌិត ឡៅ ម៉ុងហៃ មានប្រសាសន៍ថា កម្ពុជាគប្បីបញ្ជូនមន្ត្រីកងទ័ពជើងទឹកទៅរៀនសូត្រឲ្យបានច្រើន នៅសហរដ្ឋអាមេរិក ៖ «ដូចជាប្រទេសចិន និងអាមេរិកមិនជាល្អូកល្អិនជាមួយគ្នាដែរទេបាទ។ ម្ល៉ោះហើយយើងត្រូវតែថ្លឹងថ្លែង គឺប្រកាន់ខ្ជាប់នូវជំហរអព្យាក្រឹត្យរបស់យើង»។
តាមប្រភពពីលោកឧត្ដមសេនីយ៍ឯក ឈុំ សុជាតិ បានឲ្យដឹងថា នៅក្នុងអំឡុងទស្សនកិច្ចរយៈពេល ២ ថ្ងៃនេះ លោក ស្កុត វ៉ាន់ ប៊ូសស្គើក នឹងជួបពិភាក្សាទ្វេភាគីជាមួយលោកឧត្ដមសេនីយ៍ឯក ទៀ វិញ ជាមេបញ្ជាការយោធាជើងទឹកកម្ពុជា នៅមូលដ្ឋានយោធាជើងទឹកកម្ពុជា នៅតំបន់រាម ខេត្តព្រះសីហនុ និងទស្សនាការហ្វឹកហាត់របស់កងទ័ពជើងទឹកកម្ពុជា នៅតំបន់រាម នៅថ្ងៃទី ៤ ខែសីហា ឆ្នាំ ២០១១ អំពីសកម្មភាព និងយុទ្ធសាស្ត្រការពារដែនសមុទ្រកម្ពុជា។
នៅមុនការជួបចរចានោះ លោក ស្កុត វ៉ាន់ ប៊ូសស្គើក មានផែនការទៅទស្សនកិច្ចនៅមូលដ្ឋានយោធាជើងទឹកកម្ពុជា នៅតំបន់ជ្រោយចង្វាជាយក្រុងភ្នំពេញ និងជួបជាមួយប្រធាននាយកដ្ឋានកិច្ចការនយោបាយ និងទំនាក់ទំនងការបរទេសនៃក្រសួងការពារជាតិកម្ពុជា គឺលោកឧត្ដមសេនីយ៍ឯក នឹម សុវត្ថិ នៅថ្ងៃទី ៣ ខែសីហា ឆ្នាំ ២០១១។
ការមកដល់របស់ឧត្ដមនាវីឯក ស្កុត វ៉ាន់ ប៊ូសស្គើក នៅថ្ងៃទី៣ ខែសីហា ឆ្នាំ ២០១១ គឺនៅក្នុងរយៈពេលប្រមាណ ៣ ម៉ោង ក្រោយពីការយាងចាកចេញរបស់អតីតព្រះមហាក្សត្រខ្មែរ ព្រះបាទ
នរោត្តម សីហនុ និងព្រះរាជអគ្គមហេសី នរោត្តម មុនីនាថ សីហនុ ទៅកាន់ទីក្រុងប៉េកាំងប្រទេសចិន ដើម្បីព្យាបាលព្រះកាយ។
សេចក្ដីប្រកាសព័ត៌មានរបស់ស្ថានទូតអាមេរិកនៅទីក្រុងភ្នំពេញ បានឲ្យដឹងថា លោកឧត្ដមនាវីឯក ស្កុត វ៉ាន់ ប៊ូសស្គើក (Scott Van Buskirk) មានគម្រោងជួបជាមួយកងទ័ពជើងទឹកកម្ពុជា និងមន្ត្រីក្រសួងការពារជាតិកម្ពុជា ពិភាក្សាបញ្ហាទ្វេភាគី និងបញ្ហាតំបន់ ដែលផ្ដល់ផលប្រយោជន៍ដល់គ្នាទៅវិញទៅមក ក្នុងនោះរួមមាន ការចូលរួមរបស់ប្រទេសកម្ពុជា ក្នុងការហាត់ហ្វឹកហ្វឺន និងការត្រៀមខ្លួនជាស្រេចសម្រាប់ប្រតិបត្តិការលើផ្ទៃទឹកក្នុងឆ្នាំនេះ។
ពង្រឹងចំណងទាក់ទងលើផ្នែកសន្តិសុខសមុទ្រ ការរុករក និងជួយសង្គ្រោះ ការផ្ដល់ជំនួយ សង្គ្រោះបន្ទាន់ ដែលកើតមានដោយគ្រោះធម្មជាតិ និងមនុស្សធម៌ ជំនាញក្នុងការគ្រប់គ្រងនាវា និងការធ្វើដំណើរលើផ្ទៃសមុទ្រជាដើម។
គេបានកត់សំគាល់ថា ការរឹតចំណងទាក់ទងរវាងវិស័យយោធាជើងទឹកកម្ពុជា ជាមួយសហរដ្ឋអាមេរិក នៅពេលនេះ នៅស្របពេលដែលក្រុមហ៊ុនប្រេងឥន្ធនៈដ៏ធំមួយរបស់សហរដ្ឋអាមេរិក ឈ្មោះ សឺវរ៉ុន ( Chevron ) មានផែនការបូមយកប្រេងនៅបាតសមុទ្រកម្ពុជា ក្នុងខេត្តព្រះសីហនុ នៅថ្ងៃទី ១២ ខែ១២ ឆ្នាំ ២០១២ នៅវេលាម៉ោង ១២ យប់៕