វិទ្យុអាស៊ីសេរីបានព្យាយាមទាក់ទងទៅពិធីការិនីរូបនោះ ក៏ប៉ុន្តែមិនអាចទំនាក់ទំនងដើម្បីសុំការបញ្ជាក់អំពីដំណើរដើមទងដែលបណ្តាលឲ្យកើតមានពាក្យចចាមអារ៉ាមនោះឡើយ។
ប៉ុន្តែអ្នកសរសេរព័ត៌មានរបស់ទស្សនាវដ្តីអង្គរធំ ឈ្មោះ ហ៊ឹម វិចិត្រ ដែលអះអាងថា លោកបានជួបសម្ភាសន៍ជាមួយពិធីការិនីទូរទស្សន៍រូបនោះ បាននិយាយឲ្យដឹងថា នាងមានសុខភាពល្អនិងរូបសម្រស់នៅស្រស់ស្រាយដូចធម្មតា។
លោក ហ៊ឹម វិចិត្រ មានប្រសាសន៍ដូច្នេះថា ៖ «គាត់[កញ្ញា អាណូ]ធម្មតាដូចតែពីមុន សុខភាពគេនៅល្អធម្មតា អត់មានអីសោះ នៅល្អទាំងអស់។ សុខភាពដូចតែពីមុន អត់មានអីផង»។
កាលពីចុងខែតុលាកន្លងមកនេះ មានពាក្យចចាមអារ៉ាមគួរឲ្យភា្ញក់ផ្អើលលេចឮថា ពិធីការិនី សួន ភក្តី ហៅ វីជេ អាណូ បានទទួលរងការវាយធ្វើបាបនិងទារុណកម្មដោយឆូតផ្លែឡាមនៅលើផ្ទៃមុខនិងដងខ្លួនជាច្រើនកន្លែង ហើយក៏បានបញ្ជូនទៅព្យាបាលនៅប្រទេសវៀតណាម។
ប្រជាពលរដ្ឋដែលធ្លាប់បានតាមដានពីព័ត៌មាននោះគឺលោក សុភា បាននិយាយថា ៖ «ខ្ញុំមានការសោកស្ដាយណាស់ដែលឮដំណឹងថា វីជេ អាណូ មានគេលួចចាប់យកទៅធ្វើបាប ដូចជាការវះឡាមអីអ៊ីចឹង ឮពាក្យចចាមអារ៉ាមថា វះឡាមអ៊ីចឹងៗ។ ឥឡូវទស្សនាវដ្ដីអង្គរធំ គេថា ការវះឡាមវះអីហ្នឹងអត់មានទេ ខ្ញុំក៏ជួយត្រេកអរដែរ បើសិនជាអត់មានមែនវាល្អហើយ»។
រីឯមន្ត្រីសមាគមមិត្តសិល្បករ លោក អៀង ស៊ីធុល ធ្លាប់បានប្រាប់វិទ្យុអាស៊ីសេរីកាលពីដើមខែវិច្ឆិកាថា លោកបានទទួលព័ត៌មាននោះពីមិត្តភក្ដិជាសិល្បករដូចគ្នាថា ពិធីការិនី អាណូ ត្រូវបានបញ្ជូនទៅព្យាបាលនៅក្រៅប្រទេស។
ចំណែកឯមន្ត្រីស៊ើបអង្កេតនៃអង្គការសិទ្ធិមនុស្ស អាដហុក លោក ចាន់ សូវ៉េត បានមានប្រសាសន៍ឲ្យដឹងថា លោកធ្លាប់បានស៊ើបអង្កេតចំពោះករណីនោះដែរ ៖ «យើងព្យាយាមទាក់ទងសព្វបែបយ៉ាងជាមួយនឹងខាងក្រុមគ្រួសារ ក៏ដូចជាសាច់ញាតិ កន្លែងធ្វើការអីជាដើម ប៉ុន្តែជាលទ្ធផលវាអត់បានអីជាច្បាស់ការណ៍។ ឧទាហរណ៍ថា យើងព្យាយាមទាក់ទងកន្លែងការងាររបស់នាង ដែលនៅទូរទស្សន៍ប៉ុស្ដិ៍លេខ៣ហ្នឹង មិត្តភក្ដិរួមការងារគ្នាជាមួយ និងមេគេចាត់ការអីហ្នឹង គេថា អាណូហ្នឹងមិនមែនជាបុគ្គលិកទេ គ្រាន់តែជាអ្នកទិញកម្មវិធី ហើយគេអត់ដឹងថាទៅណាទេ គេអត់ថាយ៉ាងម៉េច។ ហើយមួយទៀតថា កញ្ញា អាណូហ្នឹងលាក់ទីតាំងលាក់កន្លែង ផ្ទះអីអ៊ីចឹង មិនដែលបានដឹងអ្នកណាស្គាល់ ម្ដងថា នៅនេះ ម្ដងថា នៅនោះអ៊ីចឹង អ៊ីចឹងយើងអត់បានទទួលព័ត៌មាន។ រីឯមិត្តភក្ដិជិតស្និទ្ធគេអត់ហ៊ាននិយាយទៀត ជាហេតុផលធ្វើឲ្យយើងមានការលំបាកសូម្បីតែសាច់ញាតិដែលយើងរកឃើញមួយចំនួនដែរហ្នឹង ក៏មិនហ៊ាននិយាយមិនច្បាស់ទៀត។ គ្រាន់តែថា នៅរស់អីៗអ៊ីចឹង»។
តាមប្រភពព័ត៌មានមួយរបស់ប្រទេសវៀតណាម ឈ្មោះ Vietnamnet Bridge បានបញ្ជាក់ថា សិល្បការិនីទូរទស្សន៍ប៉ុស្តិ៍លេខ៣ កញ្ញា សួន ភក្តី អាយុ២៧ឆ្នាំ ត្រូវមន្ទីរពេទ្យបារាំងវៀតណាមបានជួយសង្គ្រោះជីវិត ហើយក៏បានចាកចេញពីមន្ទីរពេទ្យនោះ។
សូមរំឭកថា ក្នុងរយៈពេលប៉ុន្មានឆ្នាំចុងក្រោយនេះ មានតារាសម្តែង តារាចម្រៀងត្រូវគេលួចធ្វើឃាតនិងជះទឹកអាស៊ីតជាបន្តបន្ទាប់ ដែលមកដល់ពេលនេះ អាជ្ញាធរមានសមត្ថកិច្ចនៅមិនទាន់បានចាប់ខ្លួនជនល្មើសមកផ្តន្ទាទោសទៅតាមផ្លូវច្បាប់នៅឡើយ។
តារាសម្តែងនិងតារាចម្រៀងត្រូវគេវាយប្រហារទាំងនោះរួមមាន តារាសម្តែង ពិសិដ្ឋ ពិលីកា តារាសម្តែង តាត ម៉ារីណា តារាចម្រៀង ទូច ស៊ុននិច តារាចម្រៀង ពៅ បញ្ញាពេជ្រ ជាដើម។
ប្រជាពលរដ្ឋម្នាក់នៅក្នុងទីក្រុងភ្នំពេញបានមានប្រសាសន៍ដោយសោកស្តាយ ប្រសិនបើករណីប្រើអំពើហិង្សាបានកើតឡើងចំពោះពិធីការិនីរូបនោះមែន ៖ «ពាក់ព័ន្ធដំណឹងថា វីជេ អាណូ ហ្នឹង មានគេធ្វើបាបដោយសារប្រចណ្ឌរឿងថា មានវះឡាមអី អាហ្នឹងជាការសោកស្ដាយដែរ មិនគួរមានគេប្រព្រឹត្តធ្វើអំពើទៅលើនាងអ៊ីចឹង គ្រាន់តែហៅមកព្រមានអីបានហើយ។ ដល់ក្រោយមកលេចឮថា នាងអត់មានបញ្ហាវិញ អាហ្នឹងល្អម្យ៉ាងដែរសម្រាប់នាង។ កន្លងមកយើងសង្កេតឃើញថា ពាក់ព័ន្ធរឿងតារាៗជាច្រើន មានការជះទឹកអាស៊ីដ និងធ្វើបាបហ្នឹង មានច្រើនហើយ អ៊ីចឹងច្បាប់គួរតែថា ធ្វើយ៉ាងម៉េចចាត់ចែងអ្នកដែលប្រព្រឹត្តហ្នឹងឲ្យបានត្រឹមត្រូវ ហើយមិនគួរថា ធ្វើបាបដល់តារាចម្រៀង ហើយជាស្រ្តីអ៊ីចឹង ធ្វើឲ្យមានបញ្ហាគ្រោះថ្នាក់។ ហើយកន្លងមក ដូចជាតារាចម្រៀង មានការបាញ់អីហ្នឹង អាហ្នឹងសោកស្ដាយដែរ ដូចថា កន្លងមក អ្នកដែលប្រព្រឹត្តធ្វើបាបតារាចម្រៀងអីហ្នឹង មិនមានការចាប់បានហ្នឹង គួរឲ្យសោកស្ដាយដែរសម្រាប់ស្រុកខ្មែរយើង»។
ចំណែកប្រជាពលរដ្ឋម្នាក់ទៀត ឈ្មោះ អ៊ុក ថា រស់នៅទីក្រុងភ្នំពេញដែរនោះ បានមានប្រសាសន៍បន្ថែមថា ៖ «នៅពេលដែលខ្ញុំបានឮថា វីជេ អាណូ ត្រូវបានជនល្មើស ដែលយើងពុំបានដឹង ពុំបានស្គាល់ទេ ឮតែពាក្យចចាមអារ៉ាមនិយាយតៗគ្នា ខ្ញុំក៏បានឮពាក្យនេះដែរ។ ខ្ញុំសែនសោកស្ដាយដល់សិល្បការិនីរបស់យើងដែលកំពុងតែល្បី កំពុងតែមានឈ្មោះ ដល់ពេលបានឮថា មានជនល្មើសមួយក្រុមបានធ្វើបាបនាងអ៊ីចឹងខ្ញុំសែនសោកស្ដាយ ក៏ប៉ុន្តែនៅពេលនេះបានឮដំណឹងថា អាណូ ពុំបានខូចខាត ឬក៏មានការវះកាត់ដូចពាក្យចចាមអារ៉ាមឮតៗគ្នា ខ្ញុំក៏ត្រេកអរជាមួយនឹងនាងដែរ ដែលនាងពុំទទួលរងគ្រោះដូចពាក្យចចាមអារ៉ាមគេថា»។
បើទោះជាយ៉ាងណា ព័ត៌មានចចាមអារ៉ាមដែលនិយាយអំពីការប្រើអំពើហិង្សាទៅលើពិធីការិនីឈ្មោះ សួន ភក្តី ហៅ អាណូ នោះ នៅតែមានអាថ៌កំបាំងនៅឡើយ និងមានការងឿងឆ្ងល់ពីស្រទាប់មហាជននិងប្រជាពលរដ្ឋដែលគាំទ្រវិស័យសិល្បៈ ដោយពួកគេនិយាយថា ព័ត៌មានទាំងនោះសុទ្ធតែមិនអាចជឿទុកចិត្តបាននៅឡើយ។
លោក ចាន់ សូវ៉េត មន្ត្រីស៊ើបអង្កេតនៃអង្គការសិទ្ធិមនុស្ស អាដហុក បានមានប្រសាសន៍ឲ្យដឹងថា តាមការស៊ើបអង្កេតនោះ ព័ត៌មានក្នុងករណីប្រើអំពើហិង្សាលើពិធីការិនីនោះ ហាក់នៅមានមន្ទិលសង្ស័យនៅឡើយ។
លោក ចាន់ សូវ៉េត មានប្រសាសន៍ដូច្នេះថា ៖ «យើងគិតថា បើសិនជារឿងហ្នឹងបានសេចក្ដីសុខអ៊ីចឹងវាជារឿងប្រសើរ ប៉ុន្តែវាចម្លែកត្រង់ថា គ្រួសារក៏មិនហ៊ាននិយាយ អ្នកធ្វើការក៏មិនហ៊ាននិយាយ សាច់ញាតិក៏មិនហ៊ាននិយាយ នេះជាហេតុផលមួយដែលគួរឲ្យសង្ស័យ ដែលយើងពិចារណា។ ហើយមួយទៀត បើសិនជាហេតុផលហ្នឹងកើតឡើងពិតប្រាកដ វាគួរតែក្រុមគ្រួសារ ឬក៏សាច់ញាតិអាចមកទំនាក់ទំនងប្ដឹងផ្ដល់ជាមួយនឹងសមត្ថកិច្ចប៉ូលិស ឬក៏មកប្ដឹងក្រុមសិទ្ធិមនុស្សដើម្បីឲ្យសិទ្ធិមនុស្សជួយធ្វើអន្តរាគមន៍ផ្លូវច្បាប់ ដូចជាការដាក់ពាក្យបណ្ដឹងអីអ៊ីចឹងទៅ ហ្នឹងប្រសិនបើជារឿងហេតុកើតឡើង ប៉ុន្តែក្រុមគ្រួសារហាក់ដូចជាអត់មានទេ អ៊ីចឹងបើសិនជាក្រុមគ្រួសារអត់មានអ៊ីចឹង មានន័យថា ក្រុមគ្រួសារកំពុងតែស្ថិតនៅក្រោមការគ្រប់គ្រងរបស់នរណាម្នាក់ហើយ»។
មន្ត្រីស៊ើបអង្កេតនៃអង្គការសិទ្ធិមនុស្ស អាដហុក លោក ចាន់ សូវ៉េត បានមានប្រសាសន៍ទៀតថា ប្រសិនបើករណីនោះកើតមានមែន ក្រុមគ្រួសាររបស់ជនរងគ្រោះគួរតែមកទំនាក់ទំនងជាមួយមន្ត្រីអង្គការសិទ្ធិមនុស្ស ដើម្បីចាត់វិធានការតាមផ្លូវច្បាប់ក្នុងការការពារក្រុមគ្រួសារ ជៀសវាងមានករណីរំលោភបំពានផ្សេងៗនិងដើម្បីចូលរួមបំបាត់អំពើនិទណ្ឌភាពនៅក្នុងប្រទេសកម្ពុជាផង៕