អតីតចៅអធិការវត្តភ្នំឌិន ទឹម សាខន បានមកដល់អារាមភ្នំឌិនរបស់លោកកាលពីថ្ងៃទី ៤ ខែ មេសា នេះ ដោយបានទទួលអំណរសាទរយ៉ាងកក់ក្តៅអំពីញាតិញោមជាពុទ្ធបរិស័ទចំណុះជើងវត្តរបស់លោក។
លោក សំ បូរិន្ទ បានសាកសួរលោកគ្រូអតីតចៅអធិការរូបនេះដោយផ្ទាល់ អំពីដំណើរដើមទងនិងលក្ខខណ្ឌមួយចំនួន ដែលលោកត្រូវប្រតិបត្តិ ក្នុងពេលកំពុងស្នាក់នៅកម្ពុជា ក្រោមសេចក្តីអនុញ្ញាតនេះ។
សំ បូរិន្ទ ៖ នៅពេលដែលសុំច្បាប់អាជ្ញាធរវៀតណាម មកធ្វើពិធីបុណ្យសពម្ដាយហ្នឹង តើអាជ្ញាធរវៀតណាម បានដាក់លក្ខខណ្ឌយ៉ាងណាខ្លះចំពោះការអញ្ជើញមករបស់លោកបណ្ឌិតនេះ? ទឹម សាខន ៖ លក្ខខណ្ឌហ្នឹងគឺគេមិនឲ្យយើងនិយាយអីទេ ឲ្យធ្វើជាអាចារ្យកុំនិយាយឲ្យសោះ កុំវាយប្រហាររិះគន់គេ ហើយរិះគន់កម្ពុជា។
សំ បូរិន្ទ ៖ ហាមក្នុងការនិយាយ ហាមយ៉ាងម៉េច? ទឹម សាខន ៖ គេមិនឲ្យរិះគន់នរណាទាំងអស់ ឲ្យនៅឲ្យស្ងៀម។ សំ បូរិន្ទ ៖ ប្រសិនបើធ្វើសេចក្ដីរិះគន់បញ្ច្រាសជាមួយនឹងការបញ្ជារបស់គេ តើលោកបណ្ឌិតនឹងត្រូវមានទោសយ៉ាងម៉េចនៅពេលដែលត្រឡប់ទៅវិញ? ទឹម សាខន ៖ អាហ្នឹងខ្ញុំមិនដឹងដែរ គេថានឹងទទួលទោសតាមច្បាប់ ខ្ញុំមិនដឹងដែរ ខ្ញុំក៏ភ័យដែរ។ គេដាក់តែប៉ុណ្ណឹង ទទួលទោសតាមច្បាប់។ សំ បូរិន្ទ ៖ លក្ខខណ្ឌសំខាន់ គឺហាមប្រាមមិនឲ្យនិយាយរិះគន់រដ្ឋាភិបាលវៀតណាម និងរដ្ឋាភិបាលកម្ពុជា អ៊ីចឹងទេ? ទឹម សាខន ៖ បាទៗ៕