លោក ថាច់ សេដ្ឋា ប្រធានសមាគមខ្មែរកម្ពុជាក្រោម មានប្រសាសន៍ឲ្យវិទ្យុអាស៊ីសេរីដឹងថា ប្រជាពលរដ្ឋរស់នៅអតីតទឹកដីខ្មែរកម្ពុជាក្រោមដែលកំពុងគ្រប់គ្រងដោយប្រទេសវៀតណាម បានឲ្យដឹងថា អាជ្ញាធរវៀតណាមបានដាក់បំរាមជាលាយលក្ខណ៍អក្សរ ដោយមេដឹកនាំរដ្ឋាភិបាលវៀតណាមហាមមិនឲ្យពលរដ្ឋខ្មែរកម្ពុជាក្រោមទាំងអស់ស្តាប់វិទ្យុ ឬមើលទូរទស្សន៍ផ្សាយចេញពីប្រទេសកម្ពុជានោះឡើយ។
លោកបញ្ជាក់ថា បំរាមនេះប្រសិនបើមានពលរដ្ឋខ្មែរក្រោមណាម្នាក់ហ៊ានល្មើសនឹងត្រូវទទួលពិន័យធ្ងន់ធ្ងរ ៖ «ឥឡូវហ្នឹងវាមានបញ្ហាមួយទៀតធ្ងន់ធ្ងរ ខាងក្រោម(នៅកម្ពុជាក្រោម)ហ្នឹងគឺគេដើរហាមឃាត់មិនឲ្យមើលទូរទស្សន៍ ហើយនិងស្ដាប់វិទ្យុពីកម្ពុជាទេ។ បើបន្តមើលទៀត គេនឹងផាកពិន័យ ១០លានដុង ហើយវាមានសារាចរមួយទៀតរបស់នាយករដ្ឋមន្ត្រីគេហ្នឹង គឺគេមិនឲ្យយើងស្ដាប់តែម្ដង»។
ពលរដ្ឋខ្មែរក្រោមមួយរូបរស់នៅខេត្តត្រាវេញ អតីតទឹកដីខ្មែរកម្ពុជាក្រោម មានប្រសាសន៍ស្នើមិនឲ្យបញ្ចេញឈ្មោះនិងសំឡេង បានឲ្យវិទ្យុអាស៊ីសេរីដឹងតាមប្រព័ន្ធអ៊ីម៉េលថា បច្ចុប្បន្ននេះការស្តាប់ឬមើលទូរទស្សន៍ផ្សាយចេញពីប្រទេសកម្ពុជាត្រូវបានអាជ្ញាធរវៀតណាមហាមឃាត់ និងរឹតបន្តឹងបំផុត។ បំរាមនេះអាជ្ញាធរវៀតណាមបានដាក់ពង្រាយកម្លាំងតាមដានជាប្រចាំ មិនថាពេលថ្ងៃឬពេលយប់ឡើយ។
បំរាមរបស់រដ្ឋាភិបាលវៀតណាមហាមមិនឲ្យពលរដ្ឋខ្មែរក្រោមទទួលព័ត៌មាននេះត្រូវបានលោក ថាច់ សេដ្ឋា បញ្ជាក់ថា កើតឡើងស្របពេលដែលសមាគមខ្មែរកម្ពុជាក្រោមនៅប្រទេសកម្ពុជាចំនួន៩ បានដាក់សំណើទៅលោករដ្ឋមន្ត្រីក្រសួងព័ត៌មានស្នើឲ្យជួយអន្តរាគមន៍ទៅថ្នាក់ដឹកនាំវិទ្យុជាតិស្នើសុំម៉ោងផ្សាយកម្មវិធីសំឡេងខ្មែរកម្ពុជាក្រោមនៅតាមវិទ្យុជាតិកម្ពុជា។
លោក ថាច់ សេដ្ឋា បានឲ្យដឹងថា បំរាមហាមមិនឲ្យពលរដ្ឋខ្មែរកម្ពុជាក្រោមស្តាប់វិទ្យុឬមើលទូរទស្សន៍ផ្សាយចេញពីប្រទេសកម្ពុជានេះ គឺអាជ្ញាធរវៀតណាមបានដើមហាមទៅលើព្រះសង្ឃនៅតាមវត្តមួយចំនួននៅចុងខែមករានេះ។
លោក ថាច់ សេដ្ឋា បានបញ្ជាក់ថា ៖ «ថ្មីៗហ្នឹងទើបតែមានការហៅព្រះសង្ឃ ហៅប្រជារាស្ត្រខ្មែរ ដែលខ្លះដាក់ Satellite សម្រាប់ចាប់មើល អង់តែនខ្ពស់សម្រាប់មើលប៉ុស្តិ៍ទូរទស្សន៍ខ្មែរ អ៊ីចឹងក៏គេបានហៅទៅណែនាំមិនឲ្យយើងមើលទេ។ លិខិតរបស់យួនគេចាប់បង្ខំឲ្យចុះកិច្ចសន្យាឈប់មើលប៉ុស្តិ៍ខ្មែរ ឈប់អីហ្នឹង ខ្លាំងណាស់! មិនធម្មតាទេពួកនេះ!»។
វិទ្យុអាស៊ីសេរីមិនអាចស្វែងរកការបំភ្លឺពីមន្ត្រីនាំពាក្យស្ថានទូតវៀតណាមប្រចាំប្រទេសកម្ពុជាបានទេតាមទូរស័ព្ទជុំវិញការចោទប្រកាន់នេះ។
បំរាមរបស់រដ្ឋាភិបាលវៀតណាមហាមមិនឲ្យពលរដ្ឋខ្មែរកម្ពុជាក្រោមមានសិទ្ធិស្តាប់ ឬមើលព័ត៌មានផ្សាយចេញពីប្រទេសកម្ពុជា ត្រូវបានក្រុមមន្ត្រីសង្គមស៊ីវិលនៅកម្ពុជាធ្វើការរិះគន់ និងចាត់ទុកបំរាមនេះថាជាការរើសអើងពូជសាសន៍ ហើយថា បំរាមហាមពលរដ្ឋខ្មែរក្រោមមិនឲ្យស្តាប់ ឬមើលទូរទស្សន៍ផ្សាយចេញពីប្រទេសកម្ពុជានេះ គឺវាខុសប្លែកពីរដ្ឋាភិបាលកម្ពុជាដែលបានអនុញ្ញាតឲ្យប្រទេសវៀតណាម និងជនជាតិវៀតណាមរស់នៅកម្ពុជាបង្កើតកម្មវិធីវិទ្យុផ្សាយនៅតាមវិទ្យុជាតិ ឬមើលទូរទស្សន៍វៀតណាមដោយសេរី និងមិនមានការហាមឃាត់នោះ៕