គេហទំព័រ www.khmer-krom.net បានកត់សម្គាល់ថា ផ្ទុយទៅវិញបងប្អូនខ្មែរក្រោម ដែលរត់គេចពីអំពើជិះជាន់គាបសង្កត់របស់រដ្ឋាភិបាលយៀកណាម ត្រូវបង្ខំចិត្តផ្លាស់ឈ្មោះនិងទីកន្លែងកំណើត បើសិនជាប្រាថ្នាចង់ធ្វើការនិងរស់នៅនៅកម្ពុជា។
គេហទំព័រវ៉ឹបសៃថថ៍របស់សហព័ន្ធខ្មែរកម្ពុជាក្រោម ក៏ឲ្យដឹងទៀតថា យោងតាមទីភ្នាក់ងារព័ត៌មានយៀកណាម (VNA) រៀងរាល់ថ្ងៃកូនសិស្សយៀកណាមរស់នៅកម្ពុជា រាប់រយនាក់ តែងតែឆ្លងព្រំដែនពីខេត្តកណ្តាល ទៅរៀននៅតាមសាលារៀនក្នុងខេត្តអាងយ៉ាងប្រទេសយៀកណាម។
VNA អះអាងថា កូនសិស្សទាំងអស់នោះ ភាគច្រើន ច្រើនមកពីឃុំព្រែកជ្រៃ ស្រុកកោះធំ ទីដែលមានអណិកជនយួនរស់នៅកុះករ។
ទីភ្នាក់ងារព័ត៌មាន VNA របស់យៀកណាមរាយការណ៍ថា សាលាបឋមសិក្សា «បេ» នៃឃុំខាញ់អាន ទទួលបង្រៀនសិស្សយៀកណាម-កម្ពុជាជាង ៦០០នាក់ ហើយសិស្សថ្នាក់ទី១ទាំងអស់ សុទ្ធតែជាសិស្សយៀកណាមឆ្លងមកពីកម្ពុជា។
លោកចាងហ្វាងសាលាង្វៀងធីសាញ់ បានឲ្យដឹងថា ៦០ភាគរយនៃកូនសិស្សសាលាបឋមសិក្សា «អា» ៩៣០នាក់គឺជាក្មេងយៀកណាមដែលឆ្លងដែនពីកម្ពុជា រៀងរាល់ថ្ងៃមកចូលរៀន។ អាជ្ញាធរយៀកណាមក៏ជួយសម្រួលការធ្វើដំណើរមកសាលារៀនរបស់កូនសិស្សយៀកណាមពីស្រុកខ្មែរទាំងនេះផងដែរ។ ក្រៅពីនេះ អ្នកស្រុកជាយដែន ក៏ជួយដរទូកចម្លងទាំងក្មេង ទាំងមាតាបិតាសិស្សដោយឥតគិតថ្លៃថែមទៀត។
ចំពោះរឿងនេះ លោកប្រធានសហព័ន្ធខ្មែរកម្ពុជាក្រោម ថាច់ ង៉ុកថាច់ មានការចាប់អារម្មណ៍ដូច្នេះ ៖ «ចំពោះខ្ញុំបាទផ្ទាល់ ខ្ញុំមានការចាប់អារម្មណ៍ពីរចំណុច គឺទី១ បង្ហាញអំពីប្រជាពលរដ្ឋយួន រស់នៅលើប្រទេសកម្ពុជា កាន់តែច្រើន ឃើញ ៣០% នៃកូនសិស្សពីកោះធំ ទៅរៀន គឺច្រើន ទម្រាំនៅខេត្តផ្សេងទៀត។ ទី២ ឃើញភាពមិនស្មើគ្នារវាងរដ្ឋាភិបាលខ្មែរជាមួយរដ្ឋាភិបាលយួនដែលជាមិត្ត ចំពោះបញ្ហាខ្មែរក្រោម តើខ្មែរក្រោមហ្នឹង មានប៉ុន្មានរស់នៅស្រុកខ្មែរ? តើបញ្ហាខ្មែរក្រោមរស់នៅកម្ពុជាក្រោម រដ្ឋាភិបាលខ្មែរមានបានគិតគូរអំពីការរៀបចំសាលារៀនឲ្យកូនខ្មែរក្រោមរៀននៅកម្ពុជាក្រោម ឬក៏ឲ្យកូនខ្មែរក្រោមមករៀននៅប្រទេសកម្ពុជាហ្នឹងដែរទេ?»។
ក្រៅពីនេះ គេហទំព័រវ៉ឹបសៃថថ៍របស់សហព័ន្ធខ្មែរកម្ពុជាក្រោមក៏បានកត់សម្គាល់ផងដែរថា សម្រាប់ខ្មែរក្រោមដែលជាជនជាតិខ្មែរដូចខ្មែរទាំងអស់ដែរនោះ បើចង់ចូលមកកម្ពុជា គេត្រូវសុំទិដ្ឋាការឬវីសា ដូចទេសចរដទៃទៀត ហើយប្រសិនបើចង់ធ្វើការនៅកម្ពុជា គេចាំបាច់ត្រូវដាក់ពាក្យសុំអត្តសញ្ញាណប័ណ្ណ ដែលតម្រូវឲ្យបង់ប្រាក់ជាសំណូកសូកប៉ាន់មន្ត្រីពុករលួយ ហើយកុហកថា ទីកន្លែងកំណើតកើតនៅកម្ពុជា។
យោងតាមសហព័ន្ធខ្មែរកម្ពុជាក្រោម ខ្មែរក្រោមដែលរត់មកកម្ពុជាត្រូវពឹងពាក់ខ្លួនឯង។ អ្នកដែលជួយសង្គ្រោះពួកគេបាន ចុងក្រោយបំផុត គឺព្រះតេជគុណ ទឹម សាខន ដែលបានជួយផ្តល់ស្បៀងអាហារនិងជម្រកដល់ខ្មែរក្រោមរាប់មិនអស់ពេលចូលទៅដល់ជាយដែនកម្ពុជា។ ក៏ប៉ុន្តែព្រះអង្គ បានត្រូវអាជ្ញាធរខ្មែរចាប់ផ្សឹក ហើយបញ្ជូនទៅឲ្យអាជ្ញាធរក្រុងហាណូយដាក់គុកពីបទថាបានធ្វើឲ្យរង្គោះរង្គើចំណងមិត្តភាពយូរលង់រវាងកម្ពុជានិងយៀកណាម៕