ប្រជាពលរដ្ឋខ្មែរកម្ពុជាក្រោម ដែលកំពុងតែរស់នៅលើទឹកដីខ្មែរកម្ពុជាក្រោម គ្រប់គ្រងដោយអាជ្ញាធរវៀតណាមនោះ បានឲ្យដឹងថា គ្រួសារខ្មែរក្រោមជាច្រើនគ្រួសារ កំពុងរងការរើសអើង និងគាបសង្កត់យ៉ាងខ្លាំង ពីសំណាក់អាជ្ញាធរវៀតណាម ដោយសារគ្រួសារទាំងនោះធ្លាប់បានងើបតវ៉ាទាមទារដីធ្លីរបស់ដូនតា ដែលរងការរឹបយកកន្លងមកដោយគ្មានសំណង។
ប្រជាពលរដ្ឋខ្មែរក្រោមបានឲ្យដឹងថា ការរើសអើងនោះគឺមានទម្រង់ដូចតទៅ៖ ទី១ បើសិនណាសមាជិកគ្រួសារនោះមានជំងឺ ហើយបញ្ជូនទៅព្យាបាលនៅមន្ទីរពេទ្យរដ្ឋនៅក្នុងប្រទេសវៀតណាម គេមិនព្យាបាលទេ, ទី២ កូនចៅនៃគ្រួសារទាំងនោះ មិនអាចរកការងារធ្វើបានទេ នៅតាមរោងចក្រ និងទី៣ គ្រួសារទាំងនោះគឺស្ថិតនៅក្រោមមុខសញ្ញានៃការតាមដានដោយភ្នាក់ងារសម្ងាត់ជារៀងរាល់ថ្ងៃនូវសកម្មភាពរស់នៅ។
ប្រជាពលរដ្ឋខ្មែរកម្ពុជាក្រោមនៅក្នុងឃុំអាងគឺ ស្រុកទិនបៀង ខេត្តអានយ៉ាង ឬខេត្តមាត់ជ្រូក សុំមិនប្រាប់ឈ្មោះនៅក្នុងចំណោមគ្រួសារខ្មែរកម្ពុជាក្រោមជាច្រើនទៀត បានថ្លែងប្រាប់វិទ្យុអាស៊ីសេរីតាមទូរស័ព្ទមកថា ៖ «មើលទៅវៀតណាមគេរើសអើងណាស់! ដូចថា យើងមានជំងឺឈឺថ្កាត់អី ទៅដេកពេទ្យ គេអត់ឲ្យដេកទេ! គេថា ទៅដេកពេទ្យណាទៅចុះ! ក្មេងៗគ្នាទៅធ្វើការងារនៅខាងរោងចក្រហ្នឹង អ្នកខ្លះឈឺ ឥឡូវហ្នឹងមកផ្ទះវិញ អ្នកខ្លះធ្លាក់ឈាមពីច្រមុះ ឥឡូវហ្នឹងពេទ្យក៏គេមិនមើលទេ។ គេមិនចាក់ថ្នាំឲ្យទេ។ កូនខ្ញុំអ៊ីចឹងដែរ ឥឡូវហ្នឹងឈឺរយៈពេល ៤ ឬ ៥ខែ ឥឡូវពេទ្យគេអត់មើលសោះ! ទៅដេកពេទ្យ គេមិនឲ្យដេក»។
វិទ្យុអាស៊ីសេរីបានទាក់ទងទៅស្ថានទូតវៀតណាមនៅក្នុងប្រទេសកម្ពុជា នៅថ្ងៃទី២ ខែកញ្ញា ដើម្បីសុំការបញ្ជាក់ថា តើជាការពិត ឬយ៉ាងណាចំពោះការអះអាងចោទប្រកាន់ខាងលើនេះ ប៉ុន្តែអ្នកទទួលទូរស័ព្ទបានឆ្លើយថា មន្ត្រីនាំអ្នកពាក្យ លោក ទ្រីញ បាកាំ មិននៅក្នុងប្រទេសកម្ពុជាទេ ហើយអ្នកមកជំនួសថ្មីមិននៅក្នុងការិយាល័យទេ។
ប្រធានសហគមន៍ខ្មែរកម្ពុជាក្រោមនៅក្នុងប្រទេសកម្ពុជា លោក ថាច់ សេដ្ឋា ដែលមានដើមកំណើតនៅលើទឹកដីខ្មែរកម្ពុជាក្រោម បានមានប្រសាសន៍ថា យុទ្ធសាស្ត្រនេះគឺអាជ្ញាធរវៀតណាមបានប្រើប្រាស់យូរមកហើយ។
លោក ថាច់ សេដ្ឋា បានបញ្ជាក់ថា ៖ «គឺធ្វើរបៀបបែបផែនមួយ ដែលយើងពិបាកនឹងរស់។ គឺរបៀបហ្នឹងជាការរំលោភសិទ្ធិមនុស្សយ៉ាងធ្ងន់ធ្ងរហើយ យើងពិបាកនឹងរស់ថែមទៀតផង!»។
ទឹកដីខ្មែរកម្ពុជាក្រោម ឬហៅថា កូសាំងស៊ីន ដែលមានចំនួន ២១ខេត្តក្រុង ត្រូវបានអាណានិគមនិយមបារាំងបានកាត់ទៅឲ្យវៀតណាមគ្រប់គ្រង តាំងពីថ្ងៃទី៤ ខែមិថុនា ឆ្នាំ១៩៤៩ ដោយគ្មានការយល់ព្រមពីខ្មែរកម្ពុជាក្រោមជាម្ចាស់ទឹកដីនោះទេ។
គ្រួសារខែ្មរកម្ពុជាក្រោមជាច្រើនរយគ្រួសារ ធ្លាប់ងើបតវ៉ាទាមទារដីស្រែពីដូនតា ចាប់តាំងពីឆ្នាំ២០០៧មកជាបន្តបន្ទាប់ នៅក្នុងខេត្តអានយ៉ាង ឬខេត្តមាត់ជ្រូកនោះ ដោយសារតែដីស្រែច្រើនពាន់ហិកតារបានរងការរឹបយកកាលពីឆ្នាំ១៩៧៩ កន្លងទៅ នៅគ្រាដែលគ្រួសារទាំងនោះបានរត់ភៀសខ្លួនមកកម្ពុជា ដើម្បីចៀសវាងការវាយប្រយុទ្ធគ្នារវាងកងទ័ពវៀតណាម ជាមួយអតីតកងទ័ពខ្មែរក្រហម។
កាលពីពេលថ្មីៗកន្លងទៅនេះ មានមន្ត្រីជាន់ខ្ពស់វៀតណាមមកចូលរួមប្រជុំក្នុងប្រទេសកម្ពុជា ដើម្បីពង្រឹងចំណងមិត្តភាពកម្ពុជា និងវៀតណាម ឲ្យបានរឹងមាំថែមទៀត។ ស្របពេលគ្នានោះដែរ ក្រុមមន្ត្រីវៀតណាមបានលើកឡើងសំណូមពរឲ្យរដ្ឋាភិបាលកម្ពុជាជួយទប់ស្កាត់ និងបង្ក្រាបសកម្មភាពក្រុមជនអមិត្តនានា ដែលរួមមានសមាគមខ្មែរកម្ពុជាក្រោមនានានៅកម្ពុជាផងដែរ ដែលតែងតែរិះគន់បរិហារប្រឆាំងនឹងអាជ្ញាធរវៀតណាម ទាក់ទងលើសំណុំរឿងខ្មែរកម្ពុជាក្រោមនៅក្នុងប្រទេសវៀតណាមនោះ៕