ក្រុមអាជីវករផលិតទឹកកកនៅក្នុងខេត្តតាកែវ ប្រទេសកម្ពុជា បានឲ្យដឹងថា រោងចក្ររបស់គាត់កំពុងតែប្រឈមមុខនឹងការបិទទ្វារនៅថ្ងៃខាងមុខជាមិនខាន ដោយសារតែអាជ្ញាធរខេត្តតាកែវ បានសម្រេចអនុញ្ញាតឲ្យក្រុមហ៊ុនឯកជនក្នុងស្រុកមួយ នាំចូលទឹកកកផ្ដាច់មុខពីប្រទេសវៀតណាម មកលក់នៅក្នុងខេត្តតាកែវ សម្រាប់រយៈពេល ១០ឆ្នាំ ដែលកិច្ចសន្យានេះបានចាប់ពីឆ្នាំ២០១០។
ប្រភពពីអាជីវករបានឲ្យដឹងថា អភិបាលខេត្តតាកែវ លោក ស្រី បេន បានប្រកាសសម្រេចដូច្នេះកាលពីខែសីហា ឆ្នាំ២០១០ កន្លងមក គឺអនុញ្ញាតឲ្យក្រុមហ៊ុនឯកជនក្នុងស្រុកនោះ ឈ្មោះ ហ៊យ ហៀង នាំចូលទឹកកកផ្ដាច់មុខមកលក់ក្នុងខេត្តតាកែវ។
ការនាំចូលនោះ គឺតាមច្រកព្រំដែនកម្ពុជា-វៀតណាម ភ្នំដិន ចំនួនជិត ១០០០ដើម ក្នុងមួយថ្ងៃ និងតាមច្រកព្រំដែនកោះអណ្ដែត និងច្រកមួយចំនួនទៀត គឺដឹកតាមទូកវៀតណាម។
អាជីវករផលិតទឹកកកនៅស្រុកគីរីវង់ ខេត្តតាកែវ លោក ហ៊ុយ ស្រេង អាយុ ៤៦ឆ្នាំ ដែលរោងចក្ររបស់លោក អាចផលិតទឹកកកបានចំនួនជាង ៥០០ដើមក្នុងមួយថ្ងៃ បានថ្លែងថា ម្ចាស់រោងចក្រផលិតទឹកកកមិនអាចប្រកួតប្រជែងជាមួយទឹកកកនាំចូលនោះបានទេ ដោយសារតែគេលក់ក្នុងតម្លៃថោកជាង ៖ "ក្រុមហ៊ុនមិនទាន់ដឹកមកហ្នឹង ខ្ញុំលក់ក្នុងថ្ងៃអស់ ២០០ដើម ទៅ៣០០ដើម។ តែឥឡូវនេះ នៅសល់តែ ៨០ដើមក្នុងមួយថ្ងៃ ឈានទៅរកបិត ព្រោះចៅហ្វាយខេត្តគាត់បាននិយាយហើយ គាត់ថាបើប្រេងឡើងថ្លៃ រត់មិនរួចឈប់ និងទិញទឹកកកពីក្រុមហ៊ុនមកលក់វិញ"។
អាជីវករផលិតទឹកកកម្នាក់ទៀត ឈ្មោះ ជា សុខ អាយុ៦៥ឆ្នាំ ដែលមានរោងចក្រផលិតទឹកកកបានចំនួនជាង ៣០០០ដើម ក្នុងមួយថៃ្ង នៅស្រុកដូនកែវ ខេត្តតាកែវ បានថ្លែងថា ៖ "សុំឲ្យអាជ្ញាធរខេត្តគោរពតាមក្រសួងទាំង៣ ក្រសួងឧស្សាហកម្មមួយ ក្រសួងមហាផ្ទៃមួយ និងក្រសួងពាណិជ្ជកម្ម គេបានចុះឲ្យទប់ស្កាត់ ប៉ុន្តែអាជ្ញាធរគេអត់ទប់។ គេមានអំណាច ប្រជាជនមិនដឹងជាធ្វើយ៉ាងម៉េច"។
អភិបាលខេត្តតាកែវ លោក ស្រី បេន បានមានប្រសាសន៍បំភ្លឺយ៉ាងខ្លីថា លោកអនុវត្តតាមសេដ្ឋកិច្ចទីផ្សារសេរី។
មន្ត្រីនគរបាលនៅច្រកព្រំដែនកម្ពុជា-វៀតណាម នៅភ្នំដិន លោក សុខ សំណាង បានមានប្រសាសន៍ថា អ្វីៗថ្នាក់ខេត្តជាអ្នកសម្រេច ៖ "ដូចជាមិនមានរូបភាពអ្វីធំដុំផង។ ខ្ញុំអត់ដឹងថាខាងណាគេចេញច្បាប់យ៉ាងម៉េចទេ? សូមសួរទៅបងចៅហ្វាយខេត្ត។ ថៃ្ងមុនខ្ញុំឃើញបងចៅហ្វាយខេត្តគាត់ប្រជុំរឿងហ្នឹង។ មិនថាប្រជុំជាមួយខាងក្រសួង"។
ក្រុមអាជីវករផលិតទឹកកកនៅក្នុងខេត្តតាកែវ ត្រូវបានកោះហៅប្រជុំនៅឯសាលាខេត្តតាកែវ នៅថ្ងៃទី១០ ខែមីនា កន្លងទៅនេះ ជាមួយអភិបាលខេត្តតាកែវ លោក ស្រី បេន ប៉ុន្តែពុំមានដំណោះស្រាយ ដែលធ្វើឲ្យអាជីវករពេញចិត្តទេ។
ប្រភពពីអាជីវករបានថ្លែងថា នៅក្នុងខេត្តតាកែវ មានរោងចក្រផលិតទឹកកកចំនួន ១៨រោងចក្រ ប៉ុន្តែនៅក្នុងស្រុកគីរីវង់ ខេត្តតាកែវ មានរោងចក្រចំនួន៣។ រោងចក្រផលិតទឹកកកមួយ នៅក្នុងចំណោមបីនោះ បានក្ស័យធន បិទទ្វារហើយ៕