ក្រុមប្រជាពលរដ្ឋបានឲ្យដឹងថា បច្ចុប្បន្នក្នុងប្រទេសវៀតណាមគេត្រូវការសត្វពាហនៈទាំងនោះ ដើម្បីហូបសាច់ និងបំប៉នសម្រាប់ទុកប្រើប្រាស់។
គ្រួសារកសិករខ្មែរនៅក្នុងឃុំស្ពឺក ស្រុកបាភ្នំ ខេត្តព្រៃវែង ដែលសុំមិនប្រាប់ឈ្មោះបានថ្លែងប្រាប់វិទ្យុអាស៊ីសេរី តាមទូរស័ព្ទនៅថ្ងៃទី៧ ខែកញ្ញា ថា លោកមានក្របីចំនួន ២គូដែរ ប៉ុន្តែលោកមិនព្រមលក់ទេ ពីព្រោះលោកចង់រក្សាទុកវាសម្រាប់កម្លាំងអូសទាញ។
លោកបន្តថា ៖ «ប្រជាពលរដ្ឋមួយចំណែកគាត់ចេះតែជំពាក់គេ គាត់ចេះតែលក់ៗទៅ ប្រហែលជាអាចអស់ហើយមើលទៅ ព្រោះស្គមធាត់អី គេយកទាំងអស់!»។
គ្រួសារកសិករខ្មែរម្នាក់ទៀត បានថ្លែងថា គាត់បានលក់សត្វគោតូចៗចំនួន ៣ក្បាល បានប្រាក់ចំនួនជាង ១លានរៀល ដោយសារជំពាក់បំណុលគេ ៖ «ក្រក៏ក្រ ហើយចងការប្រាក់គេ! បើគ្មានទៅរកគេ! អ៊ីចឹងគ្មានទៅ ចេះតែរកនេះ រកនោះលក់ មានរបស់អ៊ីចឹងលក់ទៅ!»។
សត្វគោមាឌតូចៗ ឈ្មួញទិញក្នុងតម្លៃ ៣០ម៉ឺនរៀលក្នុងមួយក្បាល សត្វគោជំទង់ គេទិញក្នុងតម្លៃ ៥០ម៉ឺនរៀលក្នុងមួយក្បាល និងសត្វគោមាឌធំៗ ពេញកម្លាំង គេទិញក្នុងតម្លៃជាង ១លានរៀល ទៅ ២លានរៀល ក្នុងមួយក្បាល គឺទិញពីកសិករណាដែលត្រូវការប្រាក់ និងមានជីវភាពទីទ័លក្រ។ ចំណែកសត្វក្របីមាឌតូចៗ គេទិញក្នុងតម្លៃ ១លានរៀលក្នុងមួយក្បាល ហើយក្របីមាឌធំៗ គេទិញក្នុងតម្លៃជាង ២លានរៀល ក្នុងមួយក្បាល។
ការប្រមូលទិញនេះកំពុងតែប្រព្រឹត្តទៅស្ទើរទូទាំងខេត្តព្រៃវែង ហើយមានរថយន្តធំៗសម្រាប់ដឹកចេញទៅប្រទេសវៀតណាម ដែលគេទិញក្នុងតម្លៃថ្លៃជាងនៅក្នុងប្រទេសកម្ពុជា។
ទាក់ទងនឹងការប្រមូលទិញសត្វគោក្របីខាងលើនេះ ប្រធានក្រុមហ៊ុនឈ្មោះ យុវពាណិជ្ជ គឺលោក ជីម សុខ បានមានប្រសាសន៍ថា ក្រុមហ៊ុនរបស់លោកប្រមូលទិញសត្វគោក្របីចំនួនជាង ២ម៉ឺនក្បាលក្នុង ១ឆ្នាំៗ នៅទូទាំងប្រទេសកម្ពុជា ដើម្បីនាំចេញទៅប្រទេសវៀតណាម។
លោក ជីម សុខ បានបញ្ជាក់ថា ៖ «ប្រជាពលរដ្ឋលោកលក់ដូរហ្នឹង ដើម្បីដោះស្រាយការហូបចុកក្នុងគ្រួសាររបស់គាត់ ហ្នឹងធម្មតាទេ! គោក្របីដែលគេសល់ពីការប្រើប្រាស់អីហ្នឹង គេលក់ដូរសម្រាប់តម្រូវការលក្ខណៈគ្រួសាររបស់គេ»។
ក្រុមហ៊ុនរបស់លោកបានទទួលអាជ្ញាប័ណ្ណពីរដ្ឋាភិបាលកម្ពុជា កាលពីឆ្នាំ២០០៣កន្លងទៅ ក្នុងនាំចេញសត្វគោក្របីនោះ។
មន្ត្រីក្រសួងកសិកម្ម រុក្ខាប្រមាញ់ និងនេសាទ ធ្លាប់បានឲ្យដឹងថា ប្រទេសកម្ពុជាមានកម្លាំងអូសទាញ មានដូចជាសត្វគោ និងក្របី ចំនួនជាង ២លានក្បាល។
វិទ្យុអាស៊ីសេរីមិនទាន់អាចទាក់ទងមន្ត្រីក្រសួងកសិកម្ម រុក្ខាប្រមាញ់ និងនេសាទ បាននៅឡើយទេ ជុំវិញរឿងខាងលើនេះ ដោយលោក កៅ ផល និងលោក ចាន់ ទុងអ៊ីវ បានប្រាប់ថា លោកកំពុងតែជាប់រវល់ប្រជុំ។
ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា លោក យ៉ង សាំងកុមារ អាយុ ៤៣ឆ្នាំ ដែលតែងតែតាមដានស្ថានការណ៍កសិកម្មនៅក្នុងប្រទេសកម្ពុជា បានមានប្រសាសន៍ថា វាមានផលល្អផង និងផលអាក្រក់ផង ចំពោះការប្រមូលទិញកម្លាំងអូសទាញសម្រាប់ធ្វើស្រែនេះ។
លោក យ៉ង សាំងកុមារ បានអះអាងថា ៖ «រឿងល្អនៅត្រង់អ៊ីចេះទេ ត្រង់ថា វាអាចចូលរួមចំណែកឲ្យមានទីផ្សារសម្រាប់គោក្របីហ្នឹង។ វាអាចមានការឡើងថ្លៃ ដោយសារមានតម្រូវការអ៊ីចឹងណា៎! ហើយទី២ វាអាចជារឿងមិនល្អ។ អ្នកខ្លះមានជីវភាពខ្វះខាត អាចបង្ខំចិត្តលក់ទាំងអស់ហ្នឹងទៅ វាអាចប៉ះពាល់ដល់កម្លាំងអូសទាញ»។
លោកទទូចសុំឲ្យកសិករខ្មែរនានាចេះរក្សាទុកកម្លាំងអូសទាញខ្លះ សម្រាប់ជីវភាពរស់នៅប្រចាំថ្ងៃ៕