ក្រុមអ្នកសង្កេតការណ៍បានទស្សន៍ទាយទុកថា ប្រសិនបើលោក ង្វៀន តាន់យ៉ុង វិលមកកាន់អំណាចបន្ត ៥ឆ្នាំទៀតនោះ ស្ថានភាពសិទ្ធិសេរីភាពទាំងឡាយក្នុងប្រទេសវៀតណាម នឹងមានការគាបសង្កត់កាន់តែខ្លាំងឡើង។
កាលពីខែមេសា អង្គការលើកលែងទោសអន្តរជាតិ (Amnesty International) បានសំដែងនូវក្ដីបារម្ភចំពោះការដាក់គុកសកម្មជនសិទ្ធិមនុស្សជាបន្ត និងក្រុមអ្នកទិតៀនស្ថានភាពនយោបាយក្នុងប្រទេសវៀតណាមជាច្រើនរូប ដែលបានចាប់ឃុំខ្លួនតាំងពីឆ្នាំ២០០៩ មកនោះ។
លោក ង្វៀន តាន់យ៉ុង អាយុ ៦១ឆ្នាំ ត្រូវបានគេរំពឹងទុកថា នឹងត្រូវបានជ្រើសរើសជានាយករដ្ឋមន្ត្រីមួយអាណត្តិទៀត តាមរយៈការបោះឆ្នោតជានិមិត្តរូបដោយរដ្ឋសភា ដែលស្ថិតនៅក្រោមការគ្រប់គ្រងរបស់បក្សកុម្មុយនិស្តវៀតណាម។
ក្រុមសកម្មជនការពារសិទ្ធិមនុស្សក៏បានប្រមើលមើលឃើញផងដែរថា រដ្ឋាភិបាលកុម្មុយនិស្តវៀតណាម ក្រោមការដឹកនាំរបស់លោក ង្វៀន នឹងរឹតបន្តឹងការត្រួតត្រាលើសិទ្ធិសេរីភាពក្នុងការបញ្ចេញមតិ ដោយសារមានការព្រួយបារម្ភខ្លាចពលរដ្ឋវៀតណាមនាំគ្នាក្រោកឡើងធ្វើការបះបោរ ដែលអាចនឹងផ្ទុះឡើងដូចគ្នានឹងស្ថានភាពនៅពិភពអារ៉ាប និងការមិនពេញចិត្តចំពោះស្ថានភាពសេដ្ឋកិច្ចនៅក្នុងប្រទេស។
ទីភ្នាក់ងារព័ត៌មាន អាអេហ្វប៉េ កាលពីថ្ងៃទី២៤ ខែកក្កដា បានរាយការណ៍ថា ប្រទេសវៀតណាមមានអត្រាអតិផរណា ឬការស្រុតចុះនៃតម្លៃក្រដាសប្រាក់ខ្ពស់បំផុតក្នុងចំណោមបណ្ដាប្រទេសមួយចំនួនទៀតលើពិភពលោក ដែលសូម្បីតែប្រព័ន្ធផ្សព្វផ្សាយរបស់រដ្ឋាភិបាលវៀតណាមក៏បាននិយាយថា បញ្ហានេះបានបណ្ដាលឱ្យក្រុមកម្មករនាំគ្នាធ្វើកូដកម្មកាន់តែច្រើនឡើង។
សហរដ្ឋអាមេរិក និងចក្រភពអង់គ្លេសបានបង្ហាញឱ្យដឹងដូចគ្នាថា ក្នុងឆ្នាំមុននេះ ការគាបសង្កត់ទៅលើប្រព័ន្ធអ៊ីនធឺណិត និងការបញ្ចេញមតិនៅក្នុងប្រទេសវៀតណាមកាន់តែមានសភាពធ្ងន់ធ្ងរឡើង៕