កាលថ្ងៃទី៧ ខែកញ្ញា គ.ជ.ប. សម្រេចជាគោលការណ៍ឲ្យលេខាធិការដ្ឋានរាជធានី-ខេត្តរៀបចំការបោះឆ្នោត បង្កើតមជ្ឈមណ្ឌលស្វែងរកឈ្មោះអ្នកបោះឆ្នោត ក្នុងបញ្ជីបោះឆ្នោតតាមប្រព័ន្ធអ៊ីនធឺណិត តាមគេហទំព័រ voterlist.org.kh ដើម្បីផ្តល់ព័ត៌មានជូនអ្នកបោះឆ្នោត។
គ.ជ.ប. សង្ឃឹមថាមជ្ឈមណ្ឌលបង្កើតថ្មីនេះ នឹងជួយសម្រួលដល់ការផ្តល់ព័ត៌មានដល់ប្រជាពលរដ្ឋ ដែលមានការលំបាករកឈ្មោះបោះឆ្នោត នៅតាមឃុំសង្កាត់នានា។ ម្យ៉ាងវិញទៀត វាក៏ផ្តល់ភាពងាយស្រួលដល់ស្មៀនឃុំ ក្នុងការសំអាតបញ្ជីបោះឆ្នោត និងចុះឈ្មោះបោះឆ្នោត។
អគ្គលេខាធិការ គ.ជ.ប. លោក ទេព នីថា ឲ្យដឹងនៅថ្ងៃទី៩ ខែកញ្ញា ថាមជ្ឈមណ្ឌលស្វែងរកឈ្មោះអ្នកបោះឆ្នោត មានតាំងពីឆ្នាំ២០០៨ មកម្ល៉េះ។ តែ គ.ជ.ប. ទើបប្រកាសមជ្ឈមណ្ឌលនេះជាផ្លូវការកាលពីថ្ងៃទី៧ ខែកញ្ញា។ ទោះជាយ៉ាងណា មជ្ឈមណ្ឌលស្វែងរកឈ្មោះអ្នកបោះឆ្នោតនេះ នៅមិនទាន់អាចប្រើប្រាស់ដល់ថ្នាក់ឃុំសង្កាត់ នៅរាជធានីខេត្តទាំង២៤ បាន១០០% នៅឡើយទេ ដោយកង្វះធនធានមនុស្ស និងសំភារៈរួមមានកុំព្យូទ័រជាដើម៖ «ដូចជានៅរាជធានីភ្នំពេញ ឥឡូវនេះគឺក្នុងឃុំសង្កាត់ទាំង៩៦ នឹងវាជា៨០ឃុំសង្កាត់ហើយ ដែលបានប្រើប្រាស់ប្រព័ន្ធអ៊ីនធឺណិត ដើម្បីរកឈ្មោះក្នុងបញ្ជីបោះឆ្នោតជួយដល់ស្មៀនក្នុងការលុបឈ្មោះ និងកែតម្រូវឈ្មោះ ឬក៏ចុះឈ្មោះអ្នកបោះឆ្នោត។ ប្រជាពលរដ្ឋមួយចំនួន គាត់ធ្លាប់ចុះឈ្មោះហើយ ពេលដែលគាត់ទៅចុះឈ្មោះម្តងទៀត គាត់ផ្លាស់ទីលំនៅអីគាត់មិនចាំកន្លែងចាស់ គាត់អ៊ីចឹងពេលយើងភ្ជាប់ប្រព័ន្ធហ្នឹងទៅ គឺស្មៀនអាចរកឈ្មោះគាត់នៅកន្លែងចាស់ភ្លាមៗ ហើយយើងអាចបំពេញឯកសារលុបឈ្មោះគាត់បានទាន់ពេលវេលា»។
យុទ្ធនាការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ មានរយៈពេល ៤២ថ្ងៃ គឺចាប់ពីថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២។ តាមការប៉ាន់ស្មាន គ.ជ.ប. សង្ឃឹមថានឹងមានអ្នកចុះឈ្មោះបោះឆ្នោតថ្មីចំនួន ៦១ម៉ឺននាក់។ គ.ជ.ប. ក៏បានប្រកាសលទ្ធផលបណ្ដោះអាសន្ននៃការពិនិត្យបញ្ជីឈ្មោះ និងចុះឈ្មោះបោះឆ្នោត ចាប់ពីថ្ងៃទី១ ដល់ថ្ងៃទី៧ ខែកញ្ញា មានប្រជាពលរដ្ឋមកចុះឈ្មោះចំនួនជាង ១០ម៉ឺននាក់ ស្មើនឹងជាង ១៦% នៅទូទាំងប្រទេស និងបានកែតម្រូវឈ្មោះអ្នកបោះឆ្នោតបានចំនួនជិត ៩ពាន់នាក់ និងលុបឈ្មោះបានចំនួនជាង ៣ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។