ការធ្វើបច្ចុប្បន្នភាពបញ្ជីឈ្មោះបោះឆ្នោតឆ្នាំ២០១១ ជាបញ្ជីឈ្មោះទុកសម្រាប់ឲ្យពលរដ្ឋបោះឆ្នោតជ្រើសរើសក្រុមប្រឹក្សាឃុំសង្កាត់ នៅឆ្នាំ ២០១២។
យ៉ាងនេះក្ដី ពលរដ្ឋមកពីតាមបណ្ដាខេត្តមួយចំនួនក្នុងប្រទេសកម្ពុជា ថ្លែងថា ពួកគេមិនអាចទៅចុះឈ្មោះបោះឆ្នោតបានទេ ព្រោះមន្ត្រី គ.ជ.ប សួររកឯកសារមានភាពសាំញ៉ាំ។
ថ្នាក់ដឹកនាំគណបក្សប្រឆាំងធំពីរ គឺគណបក្សសិទ្ធិមនុស្ស និងបក្ស សម រង្ស៊ី បានអះអាងថា សន្លឹកឆ្នោតមួយសន្លឹករបស់ពលរដ្ឋ គឺមានសារៈសំខាន់សម្រាប់កំណត់ជោគវាសនាអនាគតរបស់ខ្លួន និងភាពរីកចំរើននៃសង្គមជាតិ។ ដូច្នេះ សូមពលរដ្ឋ ពិសេសយុវជន ដែលមានអាយុចាប់ពី១៨ ឆ្នាំឡើង ត្រូវទៅពិនិត្យ និងចុះឈ្មោះបោះឆ្នោត តាមឃុំសង្កាត់របស់ខ្លួន ចាប់ពីថ្ងៃទី១ ខែកញ្ញា ដល់ថ្ងៃទី១៥ ខែតុលា ឆ្នាំ២០១១ កុំបីខកខាន។
លោក កឹម សុខា ប្រធានគណបក្សសិទ្ធិមនុស្ស មានប្រសាសន៍ថា ដើម្បីអនាគតប្រទេសជាតិមានមេដឹកនាំល្អ ដឹកនាំប្រទេសឲ្យមានការអភិវឌ្ឍន៍រីកចំរើន ទៅថ្ងៃអនាគត ពលរដ្ឋគ្រប់អាយុបោះឆ្នោត ត្រូវបំពេញកាតព្វកិច្ចរបស់ខ្លួនឲ្យបានត្រឹមត្រូវ និងត្រូវទៅចុះឈ្មោះបោះឆ្នោតឲ្យបានគ្រប់គ្នា។
លោក កឹម សុខា ឲ្យដឹងដូច្នេះ ៖ «ការបោះឆ្នោតជ្រើសរើសថ្នាក់ដឹកនាំគួរតែក្មួយៗ មានអាយុ ១៨ ឆ្នាំឡើងជាអ្នកសម្រេចវាសនាដោយខ្លួនឯង កុំបណ្ដែតបណ្ដោយ។ នេះហើយជាគោលបំណងរបស់យើង គឺថាចង់ឃើញការចូលរួមក្នុងការបោះឆ្នោត ដោយក្រុមយុវជនភាគច្រើនជាអ្នកជាប់រវល់កិច្ចការរៀន កិច្ចការមុខរបរច្រើន ហើយភាគច្រើនគាត់អត់បានទៅចុះឈ្មោះ។ អ៊ីចឹងហើយ បានជាចង់ឲ្យគាត់ទៅ»។
ដូចគ្នាដែរ លោក យឹម សុវណ្ណ មន្ត្រីនាំពាក្យគណបក្ស សម រង្ស៊ី ក៏បានលើកទឹកចិត្តឲ្យពលរដ្ឋ និងយុវជនគ្រប់អាយុបោះឆ្នោតពី ១៨ ឆ្នាំឡើងទៅ ត្រូវទៅពិនិត្យ និងចុះឈ្មោះបោះឆ្នោត ទៅតាមកាលបរិច្ឆេទកំណត់របស់ គ.ជ.ប ពីថ្ងៃទី១ ខែកញ្ញាដល់ទី១៥ ខែតុលា ឆ្នាំ២០១១ កុំបីខាន។
លោក ទេព នីថា អគ្គលេខាធិការ គ.ជ.ប មានប្រសាសន៍ថា ការពិនិត្យ និងចុះឈ្មោះបោះឆ្នោត របស់ពលរដ្ឋនៅឆ្នាំ ២០១១ ជាការធ្វើបច្ចុប្បន្នភាពបញ្ជីឈ្មោះបោះឆ្នោតទុកសម្រាប់ប្រើប្រាស់ការបោះឆ្នោតជ្រើសរើសក្រុមប្រឹក្សាឃុំសង្កាត់ នៅឆ្នាំ ២០១២ ខាងមុខ។ មន្ត្រី គ.ជ.ប រូបនេះ បានស្នើទៅពលរដ្ឋគ្រប់អាយុបោះឆ្នោត ឲ្យឆ្លៀតពេលទៅពិនិត្យ និងចុះឈ្មោះឲ្យបានគ្រប់គ្នា ដើម្បីមានសិទ្ធិចូលរួមបោះឆ្នោត។
ទាក់ទងនឹងការពិនិត្យឈ្មោះនេះ ពលរដ្ឋមិនបញ្ចេញឈ្មោះម្នាក់ រស់នៅឃុំកោះរកា ស្រុកពាមជរ ខេត្តព្រៃវែង បានរអ៊ូរទាំថា ពួកគេមានផលវិបាកក្នុងការចុះឈ្មោះបោះឆ្នោត ព្រោះមន្ត្រី គ.ជ. ប ទទួលខុសត្រូវចុះឈ្មោះបោះឆ្នោតក្នុងមូលដ្ឋាន បានសួរនាំរកឯកសារមានភាពសាំញាំ។
ពលរដ្ឋបានសំណូមពរដូច្នេះ ៖ «សំណូមពរទៅ គ.ជ.ប និងក្រសួងមហាផ្ទៃឲ្យកែសម្រួលសំបុត្រអត្រានុកូលដ្ឋាន ឬបញ្ជីគ្រួសារដែលខុសតិចតួចសូមឲ្យគាត់ជួយកែសម្រួលផង ដើម្បីឲ្យប្រជាពលរដ្ឋយើងទូទាំងប្រទេសបានបោះឆ្នោតទាំងអស់គ្នា។ ពីព្រោះថា ៨០% ហើយអ្នកដែលកែសំបុត្រអត្រានុកូលដ្ឋាន ដើម្បីឲ្យកូនទៅធ្វើរោងចក្រ កែអាយុកែអីជាដើម។ ដូច្នេះបើមិនកែសម្រួលទេ គឺគាត់អត់បានទៅចុះឈ្មោះបោះឆ្នោតទេ»។
ចំណែកយុវតី ជួប រង្សី ជានិស្សិតនៅសាកលវិទ្យាល័យន័រតុន មានស្រុកកំណើតនៅខេត្តកំពត ថ្លែងថា រូបគេមិនទាន់បានទៅពិនិត្យ និងចុះឈ្មោះបោះឆ្នោតនោះទេ ព្រោះមិនមានពេលវេលាគ្រប់គ្រាន់។ ប៉ុន្តែបានទទួលស្គាល់ថា សន្លឹកឆ្នោត១សន្លឹករបស់ប្អូន គឺមានសារៈសំខាន់ ហើយអាចកំណត់ជោគវាសនាខ្លួនឯង និងអនាគតប្រទេសជាតិទៅថ្ងៃអនាគត។
កញ្ញា ជួប រង្សី បន្ថែម ៖ «ពីព្រោះថានេះ គឺជាឱកាស ដែលយុវជនគ្រប់រូបមានឱកាសជ្រើសរើសមេឃុំសង្កាត់ ដើម្បីដឹកនាំឃុំសង្កាត់ឲ្យមានភាពរីកចំរើនតទៅថ្ងៃអនាគត។ អញ្ចឹងមានន័យថា ខ្ញុំនឹងឆ្លៀតឱកាសនេះ ឲ្យខាងតែបាន ដើម្បីទៅពិនិត្យ និងចុះឈ្មោះបោះឆ្នោត។ ខ្ញុំមិនអាចឱនអាក់ខានបានទេ ពីព្រោះថានេះគឺជាឱកាសមួយដ៏មានសារៈសំខាន់បំផុតសម្រាប់ពលរដ្ឋខ្មែរគ្រប់រូបដែលគ្រប់អាយុបោះឆ្នោត»។
ទោះយ៉ាងណាក៏ដោយ មន្ត្រីបក្សប្រឆាំង បានថ្លែងថា ដើម្បីឲ្យការងារពិនិត្យ និងចុះឈ្មោះបោះឆ្នោត មានភាពរលូន មន្ត្រីទាំងនេះស្នើសុំឲ្យមន្ត្រី គ.ជ.ប និងអាជ្ញាធរពាក់ព័ន្ធរដ្ឋាភិបាល ត្រូវបង្កលក្ខណៈងាយស្រួលឲ្យពលរដ្ឋគ្រប់អាយុបោះឆ្នោត អាចទៅចុះឈ្មោះបោះឆ្នោត ដោយគ្មានការរើសអើង ឬមិនត្រូវប្រើល្បិចកលនយោបាយទុច្ចរិតណាមួយ នាំឲ្យប៉ះពាល់ដល់សិទ្ធិបោះឆ្នោត របស់ពលរដ្ឋខ្មែរនោះទេ៕