ទិដ្ឋភាពថ្ងៃទី១នៃព្រះរាជពិធីបុណ្យអុំទូក
ដោយ អ៊ួន ឈិន
2009-11-02
សកម្មភាពនិងកម្មវិធីជាច្រើនត្រូវរៀបចំនៅថ្ងៃទី១នៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដូចជាយុទ្ធនាការឃោសនាផ្សព្វផ្សាយវិស័យយទេសចរណ៍ ការថែរក្សាបរិស្ថាននិងអនាម័យ ព្រមទាំងយុទ្ធនាការឃោសនាអបរំសុខភាពជាដើម។
ទិដ្ឋភាពនៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក នាថ្ងៃ១ វិច្ឆិកា ២០០៩។
រដ្ឋលេខាធិការក្រសួងទេសចរណ៍ លោក សូ ម៉ារ៉ា បានមានប្រសាសន៍ថា ក្រសួងទេសចរណ៍បាននិងកំពុងធ្វើកិច្ចការជាច្រើនដើម្បីបើកយុទ្ធនាការផ្សព្វផ្សាយឲ្យពិភពលោកបានស្គាល់អំពីព្រះរាជពិធីបុណ្យអុំទូក។
លោក សូ ម៉ារ៉ា បានបញ្ជាក់ថា ៖ «យើងមានការផ្សព្វផ្សាយតាមប្រព័ន្ធទូរទស្សន៍ជាតិដែលផ្សាយទៅបរទេស ទូរទស្សន៍អន្តរជាតិធំដូចជាស៊ីអិនអិន (CNN) ដូចជាវិទ្យុធំៗនានាដែលយើងបានធ្វើការជាមួយគេ តាមទស្សនាវដ្ដី ក៏ដូចជាតាមវ៉ឹបសាយថ៍ ហើយសំខាន់បំផុតយើងបានរៀបចំវេទិកាមួយពិសេស វេទិកាមួយដោយឡែក ដែលមានចំណុះ២៥០កៅអីជូនភ្ញៀវទេសចរណ៍ចូលទស្សនាពេញមួយថ្ងៃ ដោយមិនយកប្រាក់កម្រៃ ដោយមិនយកអ្វីទាំងអស់»។
ដើម្បីចូលរួមចំណែកក្នុងការថែរក្សាបរិស្ថាន អនាម័យនិងសណ្ដាប់ធ្នាប់សាធារណៈ ប្រធានគណៈកម្មការផ្សារអូរឫស្សី លោក គាង លក្ខណ៍ បានដឹកនាំកម្លាំងចំនួន២០០នាក់ដោយម្នាក់ៗកាន់អំបោសនិងប៉ែលចូកសំរាមធ្វើការបោសសម្អាតនៅតាមដងថ្លូវមួយចំនួន។
លោក គាង លក្ខណ៍ បានមានប្រសាសន៍ថា ៖ «ឯកឧត្ដមអភិបាលរាជធានីភ្នំពេញ លោកចាប់អាម្មរណ៍អំពីសណ្ដាប់ធ្នាប់ហើយនិងបរិស្ថាននៅក្នុងទិវាអុំទូកនេះ។ ក្រុមយើងខ្ញុំដែលមកពីផ្សារអូរឫស្សី គឺថាចាប់អារម្មណ៍ជាងគេគឺបញ្ហាសណ្ដាប់ធ្នាប់ជាមួយនឹងអនាម័យ»។
ទេសចរមកពីប្រទេសកូរ៉េខាងត្បូង កញ្ញា សេ ជិន ឃ្វ័ន បានសម្ដែងនូវសេចក្ដីរំភើបបន្ទាប់ពីកញ្ញាបានទស្សនាការប្រណាំងទូកនៅថ្ងៃទី១ វិច្ឆិកា។
កញ្ញា សេ ជិន ឃ្វ័ន បានឲ្យដឹងថា ៖ "ពិធីបុណ្យនេះគួរឲ្យចាប់អារម្មណ៍ហើយអស្ចារ្យមែនទែន។ នៅប្រទេសកូរ៉េគ្មានទេពិធីបុណ្យនេះ។ ហេតុដូច្នេះហើយ ខ្ញុំមានសេចក្ដីសប្បាយរីករាយណាស់"។
ចំណែកឯទេសចរមកពីខេត្តកំពង់ឆ្នាំង កញ្ញា ខៀវ ស្រីពេជ្រ ក៏បានសម្ដែងនូវការពេញចិត្តដែរ ៖ «សប្បាយដូចថា រកអីប្រៀបអត់បាន!»។
តំណាងក្រុមកីឡាករចំណុះឲ្យទូកឈ្មោះ ប្រសិដ្ឋ-បុប្ផា បញ្ញាពេចន៍កំពង់ឃ្លាំង មកពីខេត្តសៀមរាប ដែលទទួលបានជ័យជម្នះក្នុងការប្រកួតនៅថ្ងៃដំបូង លោក មាស ស៊ិនម៉ូវ បានអះអាងថា ពួកលោកមិនត្រេកត្រអាលនឹងជីវិតពេលរាត្រីនៅទីក្រុងភ្នំពេញទេ ថាហើយក៏នាំគ្នាច្រៀងរាំកម្រាន្តនៅមាត់ទន្លេតែម្ដង។
លោក មាស ស៊ិនម៉ូវ បានអះអាងថា ៖ «ខ្ញុំអត់ចាញ់ភ្លើងពណ៌នៅទីក្រុងនេះទេ ទោះបីវាស្រស់ស្អាត ក៏ប៉ុន្តែមិនអាចទាក់ទាញទឹកចិត្តកីឡាករខ្ញុំឲ្យទៅជ្រើមជ្រួលបានដែរ...»។
តាមការអះអាងរបស់មន្ត្រីរៀបចំពិធីបុណ្យ ទូកដែលបានចូលរួមប្រកួតនៅឆ្នាំនេះមានចំនួន៣៩០ទូក គឺមានការថយចុះបើប្រៀបធៀបទៅនឹងចំនួនទូកដែលបានចូលរួមប្រកួតកាលពីឆ្នាំមុន ដែលមានជាង៤០០ទូក។ មន្ត្រីដដែលបានបញ្ជាក់ថា ការថយចុះនូវចំនួនទូកក៏អាស្រ័យដោយវិបត្តិសេដ្ឋកិច្ចពិភពលោកដែរ៕
អត្ថបទដែលទាក់ទង
អង្គការសេដាក់គ្រោងនាំអង្ករសរីរាង្គទៅទីផ្សារអឺរ៉ុបនិងអាមេរិក
អាជ្ញាធរស្វែងរកការបិទមន្ទីរព្យាបាលជំងឺមួយនៅរតនគិរី
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីតាំងផលិតប្រេងម្រះព្រៅភ្នំ២កន្លែងនៅពោធិ៍សាត់ត្រូវបានកម្ទេច
គណៈកម្មការខ្មែរម្ចាស់ស្រុកនឹងរៀបចំកិច្ចប្រជុំស្ដីពីបញ្ហានៅកម្ពុជា
អាជ្ញាធរខេត្តឧត្ដរមានជ័យរារាំងរថយន្តដឹកព្រះពុទ្ធបដិមារបស់ម៉មសូណង់ដូ
ប្រជានេសាទប្រតិកម្មចំពោះការកំណត់ប្រភេទឧបករណ៍នេសាទ
បញ្ហាធូលីហុយនៅតាមផ្លូវជាតិលេខ៣ប៉ះពាល់ដល់សុខភាពអ្នកស្រុក
ពលរដ្ឋនៅព្រៃវែងត្អូញពីបញ្ហាសមត្ថកិច្ចស្ទាក់ទារប្រាក់តាមផ្លូវ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.