ស្ត្រីជាម្ចាស់ផ្ទះជួញដូរសត្វព្រៃនៅភូមិស្វាយដូនកែវ ឃុំស្វាយដូនកែវ ស្រុកបាកាន ខេត្តពោធិ៍សាត់ បានចោទប្រកាន់មន្ត្រីអង្គការអភិរក្សសត្វព្រៃ និងក្រុមចម្រុះដែលចុះទៅឆែកចាប់សត្វព្រៃ បណ្ដាលឲ្យបាត់មាស និងពេជ្រក្នុងផ្ទះគាត់។
អ្នកស្រី លី វ៉ាន់នី អាយុ២៥ឆ្នាំ មានមុខរបរជាអ្នកសំអាងការ អ្នកស្រីបានឲ្យដឹងនៅព្រឹកថ្ងៃទី១៤ សីហា ថា មន្ត្រីអង្គការអភិរក្សសត្វព្រៃដែលគាត់បានស្គាល់ឈ្មោះពីររូប គឺលោក ពៅ សារី និងលោក អ៊ូ សុវណ្ណារ៉េត ព្រមទាំងសមត្ថកិច្ចប៉ូលិស ប៉េអិមជាច្រើននាក់ទៀត កាលពីថ្ងៃ២៦ កក្កដា បានឆ្មក់ចូលឆែកឆេរផ្ទះគាត់រកចាប់សត្វព្រៃ។
គាត់បន្តថា សកម្មភាពនេះបានបណ្ដាលឲ្យបាត់បង់គ្រឿងអលង្ការដែលជាមាសទឹកដប់មួយចំនួន មាសទឹក៧មួយចំនួន និងចិញ្ចៀនពេជ្រមួយវង់តម្លៃសរុបជាទឹកប្រាក់ជិតមួយម៉ឺនដុល្លារអាមេរិក៖ «បាត់មាសសុទ្ធ៣តម្លឹងកន្លះ ប្លាទីនហ្នឹង របស់ម្ដាយក្មេកខ្ញុំ៥តម្លឹង៣ជី៨ហ៊ុន និងរបស់ខ្ញុំ៨ជីកន្លះ និងចិញ្ចៀនពេជ្រមួយវង់ តម្លៃ៦០០ដុល្លារ។ របស់ទាំងនេះ ខ្ញុំមានវិក្កយបត្រទិញទាំងអស់។ ខ្ញុំដាក់គ្រឿងអលង្ការខ្ញុំក្នុងស្រោមខ្នើយ ក៏គេយកដែរ»។
មន្ត្រីអង្គការអភិរក្សសត្វព្រៃ គឺលោក អ៊ូ វណ្ណារ៉េត សុំមិនឆ្លើយតបសំណួររបស់វិទ្យុអាស៊ីសេរី ទេ នៅថ្ងៃទី១៤ សីហា រហូតដល់មានការអនុញ្ញាតពីមន្ត្រីជាន់ខ្ពស់នៃអង្គការនេះ៖ «ខ្ញុំធ្វើការជាមួយអង្គការ ដូច្នេះមុននឹងនិយាយអ្វីជាមួយអ្នកកាសែត ទាល់ខ្ញុំសួរប្រធានខ្ញុំសិនបង»។
យ៉ាងនេះក្ដី ប្រធានក្រុមបង្ក្រាបបទល្មើសសត្វព្រៃចល័តនៃអង្គការអភិរក្សសត្វព្រៃវ៉ាយអេដ ដែលសុំមិនបញ្ចេញឈ្មោះ ពន្យល់ចំពោះការចោទប្រកាន់នេះថា កើតចេញពីការខឹងសម្បារដោយសារអង្គការនេះបានចាប់សត្វព្រៃល្មើសច្បាប់របស់ស្ត្រីរូបនេះ៖ «តាមពិត ប្រតិបត្តិការនេះយើងមានការចូលរួមពីអាជ្ញាធរមូលដ្ឋានត្រឹមត្រូវ។ តាមដែលខ្ញុំដឹង នៅពេលដែលយើងធ្វើកំណត់សាមីខ្លួន គេបានផ្ដិតមេដៃទទួលស្គាល់ អីថាអត់មានបាត់អីទេ។ តែមនុស្សហ្នឹង ប្រហែលជាមានល្បិចអីហើយ បានជាទៅដល់ប៉ុស្តិ៍ប៉ូលិសគេថាមានបាត់អីហ្នឹងទៅ»។
ទាក់ទិននឹងការចោទប្រកាន់នេះដែរ នាយប៉ុស្តិ៍នគរបាលរដ្ឋបាលឃុំស្វាយដូនកែវ គឺលោក គុយ បូរ៉ា ដែលបានដឹកនាំកម្លាំងចូលរួមសហការជាមួយអង្គការអភិរក្សសត្វព្រៃក្នុងការឆ្មក់ចូលឆែកឆេរផ្ទះអ្នកស្រី លី វ៉ាន់នី នោះ មានប្រសាសន៍ថា នេះជាការចោទប្រកាន់ដែលគ្មានមូលដ្ឋានពិត៖ «ខាងប៉ូលិសប៉ុស្តិ៍យើង គ្រាន់តែតាមសហការទេ។ ខាងអង្គការគេជាអ្នកធ្វើការឆែកឆេរ។ ប៉ុន្តែ តាមការពិនិត្យរបស់ខ្ញុំឃើញថា អង្គការគេធ្វើត្រឹមត្រូវណាស់។ ចំណែកសត្វគេយកទៅលែងនៅតំបន់អភិរក្សអស់ហើយ»។
ការឆ្មក់ចូលឆែកឆេរផ្ទះអ្នកជួញដូរសត្វព្រៃ អ្នកស្រី លី វ៉ាន់នី នេះ បានរកឃើញប្រវឹក២៣ក្បាល ពស់៥៦គីឡូក្រាម អណ្ដើក១៧គីឡូក្រាម សត្វត្រកួតមួយក្បាលទម្ងន់១,៧គីឡូក្រាម។ អ្នកស្រី លី វ៉ាន់នី បានឲ្យដឹងថា អ្នកស្រីព្រមទទួលកំហុស និងទទួលការផាកពិន័យតាមផ្លូវច្បាប់ចំពោះបទល្មើសនេះ។ តែអ្នកស្រីបានដាក់បណ្ដឹងទៅតុលាការ អង្គការសិទ្ធិមនុស្សនានា ប្រចាំខេត្តពោធិ៍សាត់ ចំពោះករណីបាត់បង់ទ្រព្យសម្បត្តិរបស់គ្រួសារអ្នកស្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។