លោក ហម ប៊ុនរិទ្ធិ មេធាវីការពារក្ដីអ្នកស្រី យ៉ោម បុប្ផា ឲ្យដឹងនៅថ្ងៃទី៩ តុលា ថា សាក្សីម្នាក់ត្រូវចៅក្រមសាលាដំបូងរាជធានីភ្នំពេញ លោក តែ សំអាង ចេញដីកាកោះហៅឲ្យចូលខ្លួនមកបំភ្លឺនៅតុលាការ។
លោកអះអាងបន្តថា សាក្សីនឹងត្រូវចូលខ្លួនបំភ្លឺនៅតុលាការពាក់ព័ន្ធរឿងក្ដីរបស់អ្នកស្រី យ៉ោម បុប្ផា មានពីរនាក់ ហើយតុលាការទើបតែកោះហៅបានម្នាក់ នៅព្រឹកថ្ងៃទី៩ តុលា៖ «ពីរនាក់ហ្នឹងគឺតុលាការបានស្ដាប់ម្នាក់ហើយ ហើយសង្ឃឹមថា លោកចៅក្រមនឹងស្ដាប់សាក្សីម្នាក់ទៀតនៅថ្ងៃណាមួយ»។
អ្នកស្រី ផាន់ ឈុនរ៉េត ដែលជាសាក្សីបានចូលផ្ដល់សក្ខីកម្មនៅតុលាការក្នុងរឿងរ៉ាវនៃការចោទថា អ្នកស្រី យ៉ោម បុប្ផា បានប្រព្រឹត្តបទល្មើសប្រើអំពើហិង្សាដោយចេតនាមានស្ថានទម្ងន់ទោសនោះ មានប្រសាសន៍ថា ក្រឡាបញ្ជីបានសាកសួរអ្នកស្រីពីហេតុការណ៍នៃថ្ងៃកើតហេតុ។
អ្នកស្រីបញ្ជាក់ថា នៅចំពោះក្រឡាបញ្ជី អ្នកស្រីបានឆ្លើយទៅតាមហេតុការណ៍ជាក់ស្ដែងដែលអ្នកស្រីបានឃើញ។ អ្នកស្រីលើកឡើងថា អ្នកស្រី យ៉ោម បុប្ផា មិនបានប្រព្រឹត្តបទល្មើសដោយផ្ទាល់ ឬបង្ហាញអាកប្បកិរិយាណាមួយបញ្ជាឲ្យអ្នកណាម្នាក់ឲ្យទៅវាយបុរសរងគ្រោះពីរនាក់ គឺលោក វ៉ាត ថៃសេង និង លោក ង៉ែត ចិត្ត ដូចការប្រកាន់របស់តុលាការនោះទេ៖ «ហើយ បុប្ផា ខ្ញុំគ្រាន់តែបញ្ជាក់ចុងក្រោយថា បុប្ផា អត់បានវ៉ៃគេទេ ហើយក៏អត់បានចូលផ្ទះហ្នឹងដែរ ខ្ញុំគ្រាន់តែនិយាយប៉ុណ្ណឹង»។
ជាមួយគ្នានឹងការចូលខ្លួនផ្ដល់សក្ខីកម្មរបស់អ្នកស្រី ផាន់ ឈុនរ៉េត នេះដែរ អ្នកភូមិបឹងកក់ជាង ៣០នាក់ ចូលសាកសួរតុលាការពីបណ្ដឹងរបស់ពួកគាត់ ដែលតុលាការបានតម្កល់ទុកមិនចាត់ការជាច្រើនខែមកហើយ។
អ្នកស្រី ទេព វន្នី មានប្រសាសន៍ថា ពាក្យបណ្ដឹងរបស់អ្នកបឹងកក់ ជាច្រើនករណីដែលបានប្ដឹងមន្ត្រីអាជ្ញាធរពីបទប្រើហិង្សាផ្សេងៗ ដូចជាការវាយអ្នកស្រី បូវ ស្រីស្រស់ ឲ្យរលូតកូន ការបង្ករបួសស្នាមលើអ្នកភូមិក្នុងហេតុការណ៍ប៉ះទង្គិចគ្នានៃការធ្វើកូដកម្មកន្លងមក មិនទាន់ត្រូវតុលាការដោះស្រាយនោះឡើយ៖ «ព្រោះពាក្យបណ្ដឹងរបស់ពួកខ្ញុំនេះ ខ្ញុំដាក់នៅថ្ងៃទី៧ ខែ១២ ឆ្នាំ២០១១ ដូចយាយ ង៉ែត ឃុន យាយ សួង សម័យ ដែរ ប៉ុន្តែអត់មានដំណោះស្រាយឲ្យពួកខ្ញុំទេ ដែលខ្ញុំបានប្ដឹងទៅលោក សុខ ប៉េងវុទ្ធ»។
ទោះយ៉ាងណា អ្នកស្រី ទេព វន្នី អះអាងបន្តថា បន្ទាប់ពីអ្នកភូមិបានជួបមន្ត្រីនៃតុលាការ ពួកគេប្រាប់ថា ព្រះរាជអាជ្ញា លោក មាស ច័ន្ទពិសិដ្ឋ ដែលកាន់ក្ដីរបស់អ្នកស្រី និងអ្នកភូមិផ្សេងទៀតនោះ មិនមកធ្វើការនោះទេ។ មន្ត្រីទាំងនោះសុំឲ្យអ្នកភូមិមកសាកសួរម្ដងទៀត នៅថ្ងៃទី១០ តុលា។ ចំណែករឿងក្ដីរបស់អ្នកស្រី បូវ ស្រីស្រស់ ដែលប្ដឹងអាជ្ញាធរពីបទបានប្រព្រឹត្តបទល្មើសវាយអ្នកស្រីឲ្យរលូតកូននោះ មន្ត្រីតុលាការក៏មិនទាន់បញ្ជាក់ថ្ងៃកំណត់ច្បាស់លាស់ក្នុងការលើកយកបញ្ហានេះមកចាត់ការដែរ។
រឿងរ៉ាវក្ដីដែលនាំឲ្យកើតការប្ដឹងផ្ដល់គ្នារវាងអ្នកភូមិបឹងកក់ ជាមួយនឹងអាជ្ញាធរ និងចាប់សកម្មជនដីធ្លី អ្នកស្រី យ៉ោម បុប្ផា ដាក់គុកនេះ ត្រូវគេជឿថា បណ្ដាលមកពីបញ្ហាជម្លោះដីធ្លីដ៏រ៉ាំរ៉ៃជាច្រើនឆ្នាំនៅតំបន់នេះ។
កន្លងមក អ្នកភូមិបឹងកក់ ចំនួន ១៥នាក់ ត្រូវតុលាការចាប់ដាក់គុក និងដោះលែង ២នាក់វិញ ចំណែក ១៣នាក់ផ្សេងទៀត ត្រូវតុលាការកាត់ក្ដីភ្លាមៗ បន្ទាប់ពីការចាប់ខ្លួនឲ្យជាប់គុកម្នាក់ ២ឆ្នាំកន្លះ។ ប៉ុន្តែស្ត្រីទាំងនោះត្រូវតុលាការដោះលែងមកវិញ បន្ទាប់ពីជាប់គុកបាន ១ខែ ដោយមានកិច្ចអន្តរាគមន៍ពីសំណាក់សហគមន៍អន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។