អ្នកស្រី ថេង ចន្ថា អាយុ៣៥ឆ្នាំ បច្ចុប្បន្នមានទីលំនៅឯខេត្តសៀមរាប បានអះអាងថា ខ្លួនពិតជាម្តាយរបស់កុមារីអាយុ១១ឆ្នាំនេះពិតប្រាកដមែន ហើយខ្លួនពិតជាបានប្រគល់កូនស្រីរងគ្រោះនេះទៅឲ្យឈ្មោះ ថឺង រ៉េត អាយុ៦១ឆ្នាំ ជាអ្នកស៊ីឈ្នួលចិញ្ចឹមតាំងពីអាយុ៤ឆ្នាំមកម្ល៉េះ។ ក៏ប៉ុន្តែបានបែកគ្នានិងបាត់ដំណឹងទើបរកមិនឃើញកន្លងមកនេះ។ ស្រ្តីរូបនេះបានបន្តទៀតថា គាត់ទើបតែបានដឹងដំណឹងតាមរយៈកាសែត ទស្សនាវដ្តីប៉ុណ្ណោះ។ គាត់មានបំណងយកកុមារីរងគ្រោះនេះមកបីបាច់ថែរក្សាវិញ។
អ្នកស្រី ថែង ចន្ថា បានឲ្យដឹងដូច្នេះ ៖ «ខ្ញុំមានអារម្មណ៍ថា សប្បាយចិត្ត ហើយត្រេកអររកអ្វីនិយាយមិនបានទេ។ សប្បាយចិត្តនឹងបានជួបកូន។ ខ្ញុំមានបំណងសុំអង្គការយកទៅចិញ្ចឹមវិញ។ ខ្ញុំមានអារម្មណ៍រន្ធត់ហើយស្ដាយក្រោយ។ កាលហ្នុងខ្ញុំជួលគាត់មើល ដល់ពេលក្រោយមកគាត់យកកូនខ្ញុំមកនៅភ្នំពេញ ដល់ពេលខ្ញុំទៅរកនៅកំពតវិញរកអត់ឃើញ»។
បើទោះបីជាមានការស្នើសុំនៅក្នុងកិច្ចជំនួបរវាងម្តាយនិងកូននិងអង្គការសង្គមស៊ីវិលមួយចំនួននៅថ្ងៃអង្គារ ទី២ កុម្ភៈ បែបនេះក្តី អ្នកស្រី សន ស៊ូដាឡែន មេធាវីនៃអង្គការលីកាដូ បានឲ្យដឹងថា ទាល់តែមានសាលក្រមពីតុលាការអនុញ្ញាតឲ្យកូននេះទៅរស់នៅជាមួយម្តាយជាមុនសិន ទើបសម្រេចបាន។
អ្នកស្រី សន ស៊ូដាឡែន មានប្រសាសន៍ថា ៖ «ដំណាក់កាលដែលយើងរង់ចាំការប្រកាសសាលក្រមថា តើជនល្មើសដែលធ្វើនូវអំពើដូចគាត់អ៊ីចឹង ជួញដូរ ទាំងបង្ករបួសស្នាមធ្វើទារុណកម្មហ្នឹង ប្រកាសសាលក្រមថាយ៉ាងម៉េចៗ។ គាត់ចង់បានកូនវិញទាល់តែមានការប្រកាសសាលក្រមមួយថា ២នាក់ហ្នឹងគឺជាម្ដាយនិងកូន»។
ទាក់ទងទៅនឹងបញ្ហាខាងលើនេះដែរ អ្នកស្រី សឹង្ហ វាសនា ប្រធានសង្រ្គោះវិបត្តិនៃអង្គការហាហ្កា ដែលបានយកកុមារីរងគ្រោះទៅថែទាំនិងព្យាបាលជំងឺមានប្រសាសន៍ថា ពួកគាត់មានការភ្ញាក់ផ្អើលជាខ្លាំងនៅពេលដែលបានដឹងថា មានស្រ្តីម្នាក់មកអះអាងថា ជាម្តាយរបស់កុមារីរងគ្រោះ។ ក៏ប៉ុន្តែទោះជាយ៉ាងណាក៏ពួកគាត់សប្បាយចិត្ត ប្រសិនបើស្រ្តីរូបនេះជាម្តាយពិតប្រាកដមែន។ អ្នកស្រីបន្តថា អង្គការហាហ្កាកំពុងយកកុមាររងគ្រោះទៅព្យាបាលជំងឺ ចិញ្ចឹម ផ្គត់ផ្គង់សម្លៀកបំពាក់ ការហូបចុកនិងផ្តល់ការសិក្សារហូតដល់ថ្នាក់មហាវិទ្យាល័យ។
អ្នកស្រី សឹង្ហ វាសនា បានឲ្យដឹងដូច្នេះ ៖ «ដោយសារតែកំពុងតែរឿងក្ដីនៅតុលាការអត់ទាន់ចប់ផង ហើយស្រាប់តែលេចម្ដាយបង្កើតចេញមក ហើយអត់មានភស្តុតាងណាមួយដែលបញ្ជាក់ថា ជាម្ដាយបង្កើតនៅឡើយទេ យើងត្រូវទៅតុលាការសិន ហើយសុំទៅចៅក្រមឲ្យគាត់ជួយរឿងហ្នឹង»។
គួរបញ្ជាក់ថា កុមាររងគ្រោះអាយុ១១ឆ្នាំ បានត្រូវម្តាយចិញ្ចឹមធ្វើទារុណកម្មក្នុងរូបភាពធ្ងន់ធ្ងរនោះ បានត្រូវគេជួយសង្រ្គោះ ហើយបានប្តឹងដល់ជនជាប់ចោទជាស្រ្តីម្តាយចិញ្ចឹមឈ្មោះ មាស ណារី អាយុ៤១ឆ្នាំ មានមុខរបរជាគ្រូបង្រៀនជនជាប់ចោទឈ្មោះ វ៉ា រឿន អាយុ៦២ឆ្នាំជាប្តី ជាអតីតមន្រ្តីក្រសួងអប់រំ បច្ចុប្បន្នចូលនិវត្តន៍ និងស្រ្តីវ័យចំណាស់ម្នាក់ទៀតឈ្មោះ ថឺង រ៉េត អាយុ៦១ឆ្នាំជាយាយចិញ្ចឹម។
កាលពីថ្ងៃច័ន្ទ ទី២៦ មករា សាលាដំបូងរាជធានីភ្នំពេញ បានបើកសវនាការជម្រះក្តីលើជនសង្ស័យ៣រូប ក្នុងនោះ២រូបជាប្តីប្រពន្ធ ក្នុងបទចោទលើករណីជួញដូរមនុស្សដោយមានគោលដៅក្នុងរូបភាពស្មុំកូនចិញ្ចឹមនិងការធ្វើទារុណកម្មលើកុមារក្នុងរូបភាពធ្ងន់ធ្ងរ។ ក៏ប៉ុន្តែប្រធានសវនាការ ចៅក្រមសាលាដំបូងបានសម្រេចបន្តឃុំខ្លួនជនជាប់ចោទ ហើយនឹងប្រកាសសាលក្រមនៅនៅថ្ងៃទី១៩ កម្ភៈ ខាងមុខនេះ៕