លោកស្រី ពិន សាវ៉ាត់ អាយុ៥៦ឆ្នាំ បានថ្លែងនៅព្រឹកថ្ងៃអាទិត្យ ទី២៣ វិច្ឆិកា ថា កូនស្រីពីរនាក់ម្នាក់ ឈ្មោះ យ៉ាន់ គឹមហ៊ាន អាយុ២១ឆ្នាំ រងរបួសឆេះរលាកពេញខ្លួន និងកូនស្រីមា្នក់ទៀតឈ្មោះ យ៉ាន់ ចាន់រិទ្ធ អាយុ ១៤ឆ្នំា រងរបួសឆេះជើងដៃ បន្ទាប់ពីឈ្មោះ តាន់ នីឡុង អាយុ ៥៦ឆ្នាំ ជាអនិកជននៅសហរដ្ឋអាមេរិកយកសាំងចាក់ដុត ខណៈពួកគេកំពុងលាងចាននៅផ្នែកខាងក្រោយផ្ទះ។
លោកស្រីបានបញ្ជាក់ថា ឈ្មោះ តាន់ នីឡុង មានអាយុ៥៦ឆ្នាំ ស្មើនឹងអាយុលោកស្រី ធ្លាប់ភ្ជាប់ពាក្យជាកូនស្រីរបស់ខ្លួន ហើយមានការខឹងសម្បាចំពោះការផ្តាច់ពាក្យមិនឲ្យកូនស្រីរៀបការជាមួយទើបបង្កអំពើហិង្សានេះ។
លោកស្រី ពិន សាវ៉ាត់ មានប្រសាសន៍ដូច្នេះថា ៖ «វាសុំចប់គ្នា ហើយអាហ្នឹងវាឆ្លើយចប់ ក៏ចប់ទៅ ហើយក៏វាជិះម៉ូតូ ចេញទៅ អ្នកណាដឹងថា វាមកធ្វើអ៊ីចឹង។ កូនខ្ញុំកំពុងលាងចាននៅខាងក្រោយ វាមកចាក់ពីក្រោយដុតកូនខ្ញុំទាំងរស់»។
កុមារីរងគ្រោះ យ៉ាន់ ចាន់រិទ្ធ បានបញ្ជាក់ពីហេតុការណ៍ថា ៖ «លាងចានជាមួយបងខ្ញុំ ឃើញ តាឡុង ហ្នឹង ដើរមកយកសាំងចាក់លើពីរនាក់ខ្ញុំ ហើយខ្ញុំឈរទៅមើលឃើញមុខច្បាស់ណាស់ តាឡុងហ្នឹងឯង អ្នកចាក់សាំងដុត»។
អំពើហិង្សានេះបានកើតឡើងកាលពីវេលាម៉ោង ៧ និង៣០នាទី នាថ្ងៃសៅរ៍ ទី២២ ខែវិច្ឆិកា នៅភូមិបែកចាន ឃុំព្រែកព្រះស្តេច ស្រុកនិងខែត្របាត់ដំបង ខណៈដែលកូនទាំងពីររបស់លោកស្រីកំពុងអង្គុយលាងចាននៅខាងក្រោយផ្ទះ។
ជនរងគ្រោះត្រូវបានគេបញ្ជូនមកសង្គ្រោះបន្ទាន់ នៅពហុព្យាបាលវិសាលសុខ ក្នុងខែត្របាត់ដំបង ហើយនៅព្រឹកថ្ងៃអាទិត្យ ទី២៣ ក្រុមគ្រួសារបានដឹកយកទៅព្យាបាលនៅទីក្រុងភ្នំពេញ។
នាយការិយាល័យស្រាវជ្រាវនៃកងរាជអាវុធហត្ថខេត្តបាត់ដំបង លោក តាន់ សុផល បានថ្លែងថា លោក តាន់ នីឡុង ត្រូវបានចាប់ខ្លួនកាលពីព្រឹកថ្ងៃទី២៣ ខែវិច្ឆិកា ហើយបច្ចុប្បន្នសមត្ថកិច្ចកំពុងរកភស្តុតាងដើម្បីកសាងសំណុំរឿងបញ្ជូនទៅតុលាការ។
លោក តាន់ សុផល មានប្រសាសន៍ដូច្នេះថា ៖ «ជនល្មើសវានៅព្យាយាមបដិសេធ យកវាមកដាក់កងរាជអាវុធហត្ថខែត្រ ប៉ុន្តែខ្ញុំមកកន្លែងកើតហេតុ នៅកន្លែងកើតហេតុ យើងប្រមូលបាន ប្រដាប់ដុតសាំងកុំឲ្យវាឈួលខ្លួន»។
លោកស្រី ពិន សាវ៉ាត់ ម្តាយជនរងគ្រោះ បានស្នើឲ្យតុលាការកាត់ទោសតាមច្បាប់និងទារសំណងជំងឺចិត្តនិងទាមទារឲ្យមានការចេញថ្លៃព្យាបាលដល់កូនលោកស្រីទាំងពីរ។
បើតាមក្រុមគ្រួសារជនរងគ្រោះ លោក តាន់ នីឡុង វ័យ ៥៦ឆ្នាំ ជាអនិកជនខ្មែររស់នៅសហរដ្ឋអាមេរិក បានភ្ជាប់ពាក្យជាមួយជនរងគ្រោះ ឈ្មោះ យ៉ាន់ គឹមហ៊ាន អាយុ ២១ឆ្នាំ កាលពីថ្ងៃទី២៩ ខែមិថុនា ឆ្នាំ២០០៨ ហើយភាគីខាងស្រីបានផ្តាច់ពាក្យវិញកាលពីដើមខែវិច្ឆិកា បន្ទាប់ពីមានការមិនជឿជាក់គ្នាទៅវិញទៅមក៕