លោក វន់ ពៅ បានចោទប្រកាន់អាជ្ញាធរខេត្តព្រះសីហនុថា ធ្វើខុស និងផ្ទុយពីគោលការណ៍របស់រដ្ឋាភិបាល ដោយបិទសេរីភាពកម្មករមិនឲ្យជួបជុំ ដើម្បីអបអរទិវាពលកម្មអន្តរជាតិ ១ ឧសភានេះ។
លោកបានអះអាងថា ទោះបីមានការហាមប្រាមមិនឲ្យជួបជុំគ្នាក៏ដោយ ក៏ក្រុមលោក នៅតែ រៀបចំជួបជុំ ហើយហែក្បួនតាមគម្រោង។
លោក វន់ ពៅ៖ «គេអត់ឱ្យរៀបចំផង។ ព្រឹកមិញអភិបាលខេត្តរងបានចេញលិខិតមួយ ជូនគ្រប់អង្គភាពកងកម្លាំងប្រដាប់អាវុធនៅក្នុងខេត្ត ហើយផ្ញើមកឱ្យសមាគមមួយដែរ គឺគេអត់អនុញ្ញាតឱ្យយើងរៀបចំទិវា ១ ឧសភា នៅខេត្តព្រះសីហនុ ទេ។ គេឱ្យយើងលើកពេលពេលទៅថ្ងៃក្រោយវិញ ដោយសារគេគិតថា ថ្ងៃ ១ ឧសភានេះ ប្រមុខរដ្ឋាភិបាលចុះទៅសួរសុខទុក្ខកម្មករនៅកំពង់ផែព្រះសីហនុ។ អ៊ីចឹង គេអត់ឱ្យរៀបចំ។ សម្រាប់ជំហររបស់សមាគម អាយឌា (IDEA) គឺនៅតែធ្វើដដែល ព្រោះថ្ងៃនេះជាថ្ងៃបុណ្យជាតិសម្រាប់កម្មករ ហើយយើងគិតថា ការរំខាន ការបន្ទច់បង្អាក់របស់អភិបាលខេត្តព្រះសីហនុ គឺជាទង្វើខុសច្បាប់ ហើយជាទង្វើមួយ ដែលផ្ទុយទៅនឹងគោលនយោបាយរបស់រដ្ឋាភិបាល។ នាយករដ្ឋមន្ត្រីទៅខេត្តព្រះសីហនុ សួរសុខទុក្ខរបស់កម្មករ ហើយចុះយើងជាកម្មករក្រៅប្រព័ន្ធ ហេតុអីចៅហ្វាយខេត្តព្រះសីហនុ ធ្វើទង្វើមិនឱ្យយើងបញ្ចេញសេរីភាពបែបនេះទៅវិញ»។
ដើម្បីអបអរទិវាពលកម្មអន្តរជាតិ ១ ឧសភានេះ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ មានគម្រោងរៀបចំការជួបជុំកម្មករចំនួន ៣ កន្លែង។ ទី១ រៀបចំការជួបជុំកម្មករ នៅរាជធានីភ្នំពេញ។ ទី២ នៅខេត្តបន្ទាយមានជ័យ និងទី៣ នៅខេត្តព្រះសីហនុ។
តាមលោក វន់ ពៅ បានឲ្យដឹងថា សារដែលកម្មករសេរី នៅខេត្តព្រះសីហនុ ចង់បង្ហាញឲ្យអាជ្ញាធរខេត្តព្រះសីហនុ បានដឹងក្នុងឱកាសថ្ងៃ ១ ឧសភានេះ គឺទី១ អបអរទិវា ១ ឧសភា ទី២ គឺសុំឲ្យអាជ្ញាធរ ខេត្តព្រះសីហនុ ហាមឃាត់ការជួលម៉ូតូឲ្យជនបរទេសជាភ្ញៀវគ្មានប័ណ្ណបើកបរជិះក្នុងខេត្តព្រះសីហនុ និងទី៣ អាជ្ញាធរខេត្តព្រះសីហនុ ត្រូវតែគោរពសិទ្ធិកម្មករសេរី ដែលរកស៊ីរត់ម៉ូតូឌុប និងរ៉ឺម៉កទេសចរណ៍ នៅខេត្តព្រះសីហនុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។