តុលាការក្រុងភ្នំពេញកំពុងចាត់ការលើពាក្យបណ្ដឹងរបស់តំណាងក្រុមហ៊ុនរោងចក្រកាត់ដេរ ដែលប្ដឹងលើតំណាងកម្មករដែលចេញមុខដឹកនាំធ្វើកូដកម្មទាមទារដំឡើងប្រាក់ខែ កាលពីប៉ុន្មានថ្ងៃមុននេះ។
លោក ជីវ កេង ប្រធានតុលាការក្រុងភ្នំពេញ បានឲ្យវិទ្យុអាស៊ីសេរីដឹងនៅថ្ងៃអាទិត្យ ទី១៩ កញ្ញាថា ៖ «តុលាការទទួលពាក្យបណ្ដឹង ប៉ុន្តែតុលាការបានបញ្ជូនពាក្យបណ្ដឹងនេះទៅមន្ត្រីនគរបាលឲ្យធ្វើការស៊ើបអង្កេតបញ្ជាក់ឡើងវិញ»។
ប៉ុន្តែលោក ជីវ កេង មិនបានបញ្ជាក់ទេថា តុលាការបានទទួលពាក្យបណ្ដឹងប៉ុន្មាននោះទេ។
ព្រះរាជអាជ្ញាតុលាការខេត្តកណ្ដាល ដែលមានរោងចក្រជាច្រើន បានផ្ទុះកូដកម្មនៅទីនោះដែរ លោក វង្ស ប៊ុនវិសុទ្ធ មានប្រសាសន៍ថា លោកមិនបានទទួលពាក្យបណ្ដឹងពីតំណាងរោងចក្រចោទប្រកាន់តំណាងកម្មករ ដែលធ្វើកូដកម្មនៅខេត្តកណ្ដាលនោះទេ ៖ «ចំពោះរឿងហ្នឹង ខ្ញុំអត់បានទទួលចាត់ការផង ក្រែងលោគេដទៃទៀត មិនដឹង»។
កាលពីថ្ងៃសៅរ៍ ទី១៨ កញ្ញា មន្ត្រីជាន់ខ្ពស់នៃសមាគមរោងចក្រកាត់ដេរកម្ពុជា បានបញ្ជាក់ថា សមាគមបានទទួលពាក្យបណ្ដឹងព្រហ្មទណ្ឌ ពីសមាជិកបានជាង១០បណ្ដឹង លើតំណាងកម្មករដែលដឹកនាំធ្វើកូដកម្ម ពីបទធ្វើឲ្យខាត់បង់ប្រាក់ ប៉ះពាល់ផលប្រយោជន៍នានា ឬកេរ្តិ៍ឈ្មោះរោងចក្រ។ ប៉ុន្តែមិនបានបញ្ជាក់ប្រាប់ថា ពាក្យបណ្ដឹងនោះដាក់ទៅតុលាការខេត្ត ក្រុង ខាងណាខ្លះទេ។
នៅថ្ងៃអាទិត្យ ទី១៩ កញ្ញា កម្មករដែលមានវិវាទទាំងអស់ បានសម្រាកស្ងៀមស្ងាត់។ កម្មកររីវើរិច ស្ថិតនៅស្រុកស្អាង ខេត្តកណ្ដាល រោងចក្រវិនណើ និងរោងចក្រប្រមាណ៣ផ្សេងទៀត ដែលពុំទាន់មានដំណោះស្រាយដាច់ស្រេច តាមការសម្របសម្រួលពីក្រសួងសង្គមកិច្ច ឲ្យកម្មករចូលធ្វើការបណ្ដោះអាសន្ន កាលពីថ្ងៃទី១៦ កញ្ញានោះ បានព្រមានថា ពួកគេនឹងមិនចូលធ្វើការវិញទេ បើសិនថៅកែរោងចក្រ នៅតែព្យួរឈ្មោះតំណាងពួកគេជាច្រើននាក់មិនឲ្យចូលធ្វើការដូចធម្មតាវិញទេនោះ។
តំណាងកម្មកររោងចក្ររីវើរិច លោក ភិន សុធា បានថ្លែងបញ្ជាក់យ៉ាងដូច្នេះ ៖ «គឺសម្ដែងឆន្ទៈពីខ្លួនគាត់ មិនសុខចិត្តទេ លុះត្រាតែមានពួកខ្ញុំ ២៥នាក់ចូលធ្វើការបានគាត់សុខចិត្ត»។
ខាងតំណាងរោងចក្រវិនណើ និងរោងចក្ររីវើរិច លោក តាំង ស៊ុនហេង នៅតែប្រកាន់ជំហរគឺសូមឲ្យអនុវត្តទៅតាមផ្លូវច្បាប់។ លោកបន្តថា តំណាងកម្មករដែលត្រូវព្យួរឈ្មោះនោះ មាន៣៤នាក់ ៖ «ក្នុងនោះយើងបានអនុវត្តតាមដីកាសម្រេច ដែលបានចេញមកដែរ យើងមិនអាចរំលោភលើច្បាប់ដូចជាដីកាសម្រេចចេញមកត្រឹមត្រូវអ៊ីចឹងហើយយើងរំលោភ អត់បានទេ ហើយកម្មករយើងបានអំពាវនាវហើយ ឲ្យចូលធ្វើការជាធម្មតា លុះត្រាតែប៉ុន្មាននាក់ហ្នឹង យើងអាចដោះស្រាយតាមសន្តិវិធីច្បាប់ក្រោយបានតើ»។
មន្ត្រីក្រសួងសង្គមកិច្ច ដែលទទួលយកការសម្របសម្រួល ដើម្បីដោះស្រាយវិវាទកម្មករ ឲ្យមានការពិភាក្សាគ្នាដោយសន្តិវិធី នៅថ្ងៃ២៧ កញ្ញាខាងមុខ មិនធ្វើការអធិប្បាយទេជុំវិញបញ្ហាខាងលើនេះ។
លោក អាត់ ធន់ ប្រធានសហភាពការងារកម្ពុជា ដែលផ្ដើមដឹកនាំធ្វើកូដកម្មកន្លងមក បានឲ្យដឹងថា ការព្យួរការងារតំណាងកម្មករ មិនឲ្យចូលធ្វើការ គឺជាការរំលោភលើសេចក្ដីប្រកាសរបស់ក្រសួងសង្គមកិច្ចដែលសូមឲ្យកម្មការទាំងអស់ ចូលធ្វើការជាធម្មតា ទាំងអស់គ្នា ដោយរង់ចាំការដោះស្រាយជាក្រោយ។ លោកបន្តថា លោកនឹងធ្វើការជជែកជាថ្មីជាមួយមន្ត្រីក្រសួងសង្គមកិច្ច នៅថ្ងៃចន្ទ ទី២០ កញ្ញា ដើម្បីរកដំណោះស្រាយជៀសវាងការប្រឈមមុខដាក់គ្នាបន្តទៀត ៖ «អ៊ីចឹងខ្ញុំគិតថា ក្រសួងសង្គមកិច្ចនៅថ្ងៃចន្ទនេះ គេនឹងជជែកគ្នាឲ្យកាន់តែប្រសើរឡើង»។
ទោះយ៉ាងណាក្តី តំណាងរោងចក្រវិនណើ និងរោងចក្ររីវើរិច លោក តាំង ស៊ុនហេង បានសម្ដែងក្ដីបារម្ភថា ការអូសបន្លាយជម្លោះ អាចជំរុញឲ្យរោងចក្របិទទ្វា ហើយវានឹងខាតបង់ប្រយោជន៍ទាំងសងខាង៕