លោក ជា សុគន់ ប្រធានដោះស្រាយវិវាទសមាគមប្រជាធិបតេយ្យសេដ្ឋកិច្ចឯករាជ្យក្រៅប្រព័ន្ធបានថ្លែងនៅថ្ងៃអាទិត្យថា ស្នាមមេដៃចំនួន៧០នាក់នឹងដាក់ជូនក្រសួងមហាផ្ទៃនាពេលឆាប់ៗខាងមុខនេះតាមរយៈមជ្ឈមណ្ឌលសិទ្ធិមនុស្សកម្ពុជា។
លោក ជា សុគន់ បានឲ្យដឹងថា ៖ «យើងមានថែមពីលើហ្នឹងទៀត ព្រោះអីកម្មករច្រើនណាស់ដែលគេចង់ប្ដឹង»។
មន្ត្រីមជ្ឈមណ្ឌលសិទ្ធិកម្ពុជា លោក សែម ចៅសុខ បានថ្លែងថា មជ្ឈមណ្ឌលសិទ្ធិមនុស្សកម្ពុជា ស្វាគមន៍ក្នុងការទទួលនិងបញ្ជូនស្នាមមេដៃទាំងនោះដាក់ទៅក្រសួងមហាផ្ទៃជំរុញឲ្យមានវិធានការដោះស្រាយ។
នគរបាលច្រកទ្វារអន្តរជាតិប៉ោយប៉ែតរងការចោទប្រកាន់ថា បានជំរិតទារលុយ២០០បាតពីពលករខ្មែរដែលថៃចាប់បញ្ជូនមកកម្ពុជាវិញ យកលុយពីកម្មករអូសរទេះ អាជីវករខ្មែរលក់ដូរនៅផ្សារថៃ និងមានការចាប់ម៉ូតូឌុបជំរិតទារយកលុយ។
លោក អ៊ឹម ថុន នាយផ្នែករដ្ឋបាលនៃនគរបាលច្រកអន្តរជាតិប៉ោយប៉ែតបានថ្លែងថា ក្រោយពីមានរឿងអាស្រូវផ្ទុះឡើងលោកបានសរសេរអក្សរបិទនៅជញ្ជាំងអគារនគរបាលអន្តោប្រវេសន៍ថា មិនមានការគំរាមកំហែងជំរិតយកលុយទេ។
លោកបានទទួលស្គាល់ថា នគរបាលពិតជាបានចាប់ម៉ូតូឌុបនិងកម្មករអូសរទេះយកលុយតិចតួចមែន ចំណែកការយកលុយ២០០បាតពីក្រុមអាជីវករគឺភាគីថៃជាអ្នកយក។
លោក អ៊ឹម ថុន បានមានប្រសាសន៍ថា ៖ «ឥឡូវតាំងពីមានរឿងម្ដងហ្នឹងមក មានអីឥឡូវហ្នឹងដាក់ផ្លាកដាក់អីនៅជុំវិញជញ្ជាំងអស់ហើយតើ! គ្មានអ្នកណាគាបសង្កត់យកលុយយកកាក់អីទេ ខ្ញុំសរសេរផ្លាកប៉ុនៗណាណីដាក់នៅជាប់ជញ្ជាំងហ្នឹង»។
ប្រជាពលរដ្ឋនៅប៉ោយប៉ែតបានថ្លែងប្រតិកម្មថា ការអះអាងរបស់មន្ត្រីនគរបាលគឺជាការដោះសាប៉ុណ្ណោះ ៖ «ទោះបីបិទក៏នៅតែយកហ្នឹង ចេះតែថាហ្នឹង វាហ៊ានឲ្យយើងចូល? យើងទៅក៏មិនឲ្យចូលដែរ»។
ចំណែកឯអាជីវករខ្មែរនៅផ្សារលុងកឿថៃបានថ្លែងថា ៖ «ទិញសំបុត្រហ្នឹង សំបុត្រដែលអស់លុយហ្នឹងគឺទិញពីខ្មែរ ដល់ពេលអ្នកធ្វើគឺថៃអត់អស់លុយទេ»។
មន្ត្រីអ្នកនាំពាក្យក្រសួងមហាផ្ទៃ លោក ខៀវ សុភ័គ បានមានប្រសាសន៍ថា ក្រសួងមហាផ្ទៃនឹងមានវិធានការទប់ស្កាត់ចំពោះករណីនេះ។
លោក ខៀវ សុភ័គ បានមានប្រសាសន៍ថា ៖ «បើតាមពាក្យបណ្ដឹងអ៊ីចឹងមែន គឺត្រូវតែមានវិធានការដើម្បីដោះស្រាយក្នុងនាមជានគរបាលការពារច្រកព្រំដែនអ៊ីចឹង យើងមិនគួរណាធ្វើតាមដូចជាពាក្យបណ្ដឹងអ៊ីចឹងទេ គឺវាមិនត្រឹមត្រូវទេ»។
កាលពីថ្ងៃទី២៣ ខែតុលា កម្មករអូសរទេះ អាជីវករ ពលករខ្មែរជាង១៣០នាក់នៅប៉ោយប៉ែត បានផ្តិតមេដៃទាមទារលក្ខខណ្ឌបីចំណុច ទី១ សុំឲ្យប៉ូលិសឈប់យកលុយពីកម្មករអូររទេះ ទី២ សុំឲ្យអាជីវករខ្មែរលក់ដូរនៅផ្សារថៃចេញចូលអត់បង់លុយ ទី៣ សុំកុំឲ្យជំរិតទារលុយ២០០បាតពីកម្មករដែលត្រូវចាប់បញ្ជូនមកពីថៃវិញ និងសុំដក លោក ពេជ្រ សារ៉ន ចេញពីប្រធានច្រកទ្វារអន្តរជាតិប៉ោយប៉ែត៕